Taga-Filipos 2 - Ti Biblia (1973)

Ibalacadna ti panagmaymaysa ken ti kinaemma.

¹ No adda ngarud, aniaman a pammagbaga a maipuon ken Cristo, no adda aniaman a pangliwliwa ti ayat, no adda aniaman a pannacaicadcadua iti Espiritu, no adda aniaman nga ayat ti puso ken panangngaasi,

² Anayenyo ti rag-oc, nga agmaymaysa coma ti panggepyo, adda agmaymaysa nga ayatyo, maymaysa a panagtitimpuyog, ken agmaymaysa a nakem;

³ Awan coma ti maaramid gapu iti supiat wenno iti kinatangsit, no di ket mabuyugan coma iti kinapacumbaba, a ti tunggal maysa padayawanna ti sabali a cas natantan-oc ngem isu met laeng;

⁴ A saan a kitaen ti tunggal maysa cadacayo ti cucuana laeng, no di ket tunggal maysa kitaenna met coma ti cucua dagiti sabsabali.

⁵ Adda coma cadacayo daytoy a nakem nga adda met ken Cristo:

⁶ Isu, nga idinto nga addaan galad a Dios, saanna nga incancano ti pannakipada iti Dios, banag a rebbengna idi a salimetmetan,

⁷ No di ket binaybay-anna ket innalana ti galad nga adipen, a naaramid a capadpada dagiti tao;

⁸ Ket idinto a nagparang iti casasaad ti tao, nagpacumbaba a nacnakemna, a nagtulnog agingga ken patay, wen, patay iti cruz.

⁹ Gapuna met a ti Dios intan-ocna iti cangatoan unay, ket iniccanna ti nagan a natantan-oc ngem iti amin a nagan;

¹⁰ Tapno, iti nagan ni Jesus, isu-amin a tumeng agparintumeng, dagiti adda sadi langit, dagiti adda iti daga ken dagiti adda iti uneg ti daga.

¹¹ Ken amin a dila ipudnoda a ni Jesu-Cristo, isu ti Apo, tapno paca idayawan ti Dios Ama.

¹² Iti casta, ay-ayatec, cas ti iyaannugotyo a cancanayon, saan laeng nga iti sangoc, no di ket nangnangrona pay ita nga awanac, turposenyo ti pannacaisalacanyo met laeng, a buyugen ti buteng ken pigerger;

¹³ Ta ti Dios ti mamagaramid cadacayo, ti panagayat ken casta met ti panagaramid ti mayalubog iti pagayatanna;

¹⁴ Aramidenyo dagiti isu-amin a banbanag nga awan tantanabutob ken supsupiat;

¹⁵ Tapno awan coma ti pacababalawanyo ket natarnawcayo, annacnacayo, ti Dios nga awan pacapilawanyo, iti nagtengngaan ti maysa a kaputotan a nakil-lo ken managdacdakes, ket iti tengngada aglawagcayo a cas la silsilaw iti lubong.

¹⁶ Nga iracuracyo ti sao ti biag; tapno addanto pagragsacac iti aldaw ni Cristo, ta diac nagtartaray nga awan nagmamaayanna ket diac met nagbannog nga awan capapayanna.

¹⁷ Ngem uray no maidatonacto iti rabaw ti daton ken panagservi ti pammatiyo, agrag-oac ken makipagrag-oac cadacay amin:

¹⁸ Ket casta met agragsaccayo ken makipagragsaccayo caniac.

Panangidayaw cada Timoteo ken Epafrodito.

¹⁹ Ngem inanamaec ken Apo Jesus nga ibaonco cadacayo iti mabi-it ni Timoteo, tapno mabang-aran met ti nakemco, no maammoac ti casasaadyo.

²⁰ Ta awan caniac ti sabali a canacnakemna, a mangisakit a siaanep iti casasaadyo.

²¹ Ta isuda amin sapsapulenda ti sanicuada laeng, saan a dagiti sanicua ni Jesu-Cristo.

²² Ngem ammoyo ti pannacapadasna, a cas iti anac ken amana, casta ti pannakipagservina caniac a maipaay iti evangelio.

²³ Gapuna, daytoy isu ti namnamaec nga ibaon, apaman a maammoac no ania ti casasaadco:

²⁴ Ngem manginanamaac iti Apo nga umayacto met iti mabiit.

²⁵ Nupay casta, pinagarupco a masapul nga ibaonco cadacayo ni Epafrodito, a cabsatco ken catultulongan ken cabuyotac, ken babaonenyo, isu a cumitkita cadagiti masapsapulco;

²⁶ Ta mailiw cadacayo amin, ket sidadanag unay agsipud ta nadamagyo a nagsakit:

²⁷ Kinapudnona a nagsakit, nganngani natay; ngem kinaasian ti Dios, ket saan la nga is-isu, no di siac pay, tapno awan ladingitco nga agsusucot.

²⁸ Iti casta ngarud imbaonco a madagdagus, tapno inton isu makitayo manen agragsaccayo, ket mapabassit met coma ti lidayco.

²⁹ Gapuna awatenyo iti biang ti Apo a mapacuyogan ti amin a ragsac, ket dagiti cacastoy patgenyo:

³⁰ Ta gapu iti panagservi ken Cristo, nganngani natay, nga impeggadna ti biagna, tapno talalianna ti pagcuranganyo iti panagservi caniac.