Taga-Efeso 6 - Ti Biblia (1973)

Ibilinna dagiti nadumaduma a rebbeng nga aramiden.

¹ Annac agtulnogcayo cadagiti dadackelyo gapu iti Apo; ta daytoy nalinteg.

² Dayawem ni amam ken ni inam, (nga isu ti umuna a bilin nga adda carina),

³ Tapno naimbag ti lac-ammo ket atiddag ti biagmo iti rabaw ti daga.

⁴ Ket dacayo nga amma, dicay ruroden dagiti annacyo, no di ket idalanyo ida iti alagaden ken pammagbaga ti Apo.

⁵ Dacayo a paad-adipen, agtulnogcayo cadagiti appoyo a tattao, a mabuyugan ti buteng ken pigerger, iti kinadalus ti pusoyo, a cas ken Cristo;

⁶ A dicay agservi iti mata, a cas cadagiti umagawa a mangay-ayo cadagiti tattao, no di ket, cas adadipen ni Cristo, agaramidcayo a napusoan iti pagayatan ti Dios;

⁷ Nga agservicayo a siaayat, a cas la maipaay iti Apo, ket saan a cadagiti tattao:

⁸ A siammocayo nga uray ania a banag a naimbag nga aramidento ti tunggal maysa, adipen man wenno saan, awatennanto ti supapacna iti biang ti Apo,

⁹ Ket dacayo nga appo, casta met ti aramidenyo cadacuada, ket baybay-anyo dagiti panangam-ames; a siammocayo a ti Apoda ken Apoyo adda sadi langit, ket awan ti pagdudumaan dagiti tattao kencuana.

Ti cabal ti Dios ken ti calasag ti pammati.

¹⁰ Panungpalanna, cacabsat, agsarikekedcayo iti Apo ken iti pigsa ti pannacabalinna.

¹¹ Icawesyo ti amin a cabal a nadiosan tapno mabalinyo ti agtalinaed a bumusor cadagiti pangal-lilaw ti sairo.

¹² Ta ti pannakidangadangtayo saan a maibusor iti lasag ken dara, no di ket cadagiti ar-ari, cadagiti mannacabalin, cadagiti agturay iti lubong daytoy a sipnget, cadagiti espiritu ti kinadakes idiay ngato.

¹³ Gapuna, alaenyo ti amin a cabal a nadiosan, tapno mabalinyo ti sumarikedked inton dakes nga aldaw, ket inton naisaganayon amin, addacayo a sititibker.

¹⁴ Bumilegcayo ngarud a sibabarikescayo iti kinapudno, ken sicacawescayo iti cabal ti kinalinteg,

¹⁵ Ket sisasapatozcayo iti pannacaisagana iti evangelio ti cappia;

¹⁶ Nangrona unay, alaenyo a calasag ti pammati, isu a mabalinyonto a pangsarapa cadagiti isu-amin a dumardarang a gayang ti sairo.

¹⁷ Alaenyo met a pannacacabal ti ulo, ti pannacaisalacan, ken ti campilan ti Espiritu, nga isu ti sao ti Dios:

¹⁸ Nga agdawdawatcayo a cancanayon babaen ti Espiritu cadagiti dawdawat ken carcararag ket agsalucagcayo ti maipaay itoy a mabuyugan ti amin a panagtalinaed ken panangidawdawat cadagiti isu-amin a sasanto,

¹⁹ Ken gapu caniac, tapno maited coma caniac ti Sao agraman ti panagsao a situtured tapno ipacaammoc ti palimed ti evangelio,

²⁰ Gapu iti daytoy siac ti maysa a babaonen a nacawaran; tapno kencuana macapagsaoac coma a situtured, a cas rebbengco a panagsao.

Ni Tiquico, ken panagpacada.

²¹ Ngem tapno ammoyo met dagiti banbanag a maipapan caniac ken ti casasaadco, ni Tiquico, ayayaten a cabsat ken mapagtalcan a ministro iti Apo, ipacaammonanto amin cadacayo:

²² Isu nga imbaonco cadacayo, gapu itoy met laeng, tapno maammoanyo ti maipapan cadacami, ken tapno isu liwliwaenna dagiti puspusoyo.

²³ Talna coma cadagiti cacabsat, ken ayat a buyugen ti pammati, iti biang ti Dios Ama ken ni Apo Jesu-Cristo.

²⁴ Ti parabur adda coma cadagiti isu-amin nga agayat a di-agressat ken Apotayo a Jesu-Cristo.