Taga-Efeso 4 - Ti Biblia (1973)

Ibalakadna ti panagmaymaysa.

¹ Siac a balud iti Apo, dawatec ngarud cadacayo, a magnacay coma a maicari iti pannacaayab a nacaawisanyo,

² A buyugen ti amin a kinaemma ken kinapacumbaba, agraman ti panaganus, nga agiinnanuscayo iti ayat;

³ Nga agawaanyo a salimetmetan ti panagmaymaysa ti Espiritu iti singgalut ti talna.

⁴ Adda maysa a bagi, ken maysa nga Espiritu, a cas met iti pannacaawisyo iti maysa nga inanama ti pannacaayabyo;

⁵ Maysa nga Apo, maysa a pammati, maysa a pammautizar,

⁶ Maysa a Dios ken Ama dagiti isu-amin, isu a panguloen dagiti isu-amin, ken adda iti nagtengaan dagiti isu-amin, ken adda cadacay amin.

⁷ Ngem iti tunggal maysa cadatayo naiccan ti parabur, cas iti rucod ti sagut ni Cristo.

⁸ Gapuna a cunana: Idi nga immuli iti ngato, impanna a kinayawan ti pannacacayaw, ket iniccanna ti rangrangcap dagiti tattao.

⁹ Ket daytoy nga iyuuli, ania ti cayatna a sao-en, no di ket immulog met cadagiti disso a nababbaba iti daga?

¹⁰ Daydi immulog isu met laeng daydi immuli iti nangatngato pay ngem cadagiti isu-amin a langlangit, tapno punoenna dagiti amin a banbanag.

¹¹ Ket dagiti dadduma incabilna nga apostol; ket dagiti dadduma mammadto; ket dagiti dadduma evangelistas; ket dagiti sabsabali, paspastor ken mannursuro;

¹² A maipaay iti pannacapaananay dagiti sasanto a maipaay iti aramid ti panagservi, a maipaay iti pannacabangon ti bagi ni Cristo:

¹³ Agingga iti macagtengtay amin iti panagmaymaysa ti pammati ken ti pannacaammo iti Anac ti Dios, iti casasaad ti tao a nataengan, iti rucod ti kinatayag ti pannacapunno ni Cristo:

¹⁴ Tapno ditay agub-ubinganen, nga agal-la-al-latayo ditoy ken idiay, a pailawlaw iti amin nga angin ti sursuro, gapu cadagiti salsalamangca dagiti tattao, iti kinasicapda a di madmadlaw a pangal-lilaw ti kinaulbod;

¹⁵ No di ket, sao-entayo ti pudno a buyugen ni ayat ket rumangaytayo coma cadagiti isu-amin ken Cristo, isu nga ulo;

¹⁶ A kencuana amin a bagi, nga agaal-lot ti pannacasangalna ken natonos gapu iti itutulong ti tunggal nagsusuupan, cas iti panagaramid a maitutup iti tunggal camcameng, padackelenna ti bagi, tapno pacapatibkeranna met laeng, ken ayat.

Ti nasingpet a cristiano dina rebbeng a tuladen dagiti dakes a cadaoyan dagiti Gentil.

¹⁷ Daytoy ngarud ibagac ken sacsiac iti Apo, a dicay coma magmagnan a cas iti pannagna dagiti Gentil iti kinapalangguad ti isipda,

¹⁸ Idinto a nacudrepan ti pannacaawatda, a nayadayuda iti biag ti Dios, gapu iti kinacuneng nga adda cadacuada, a maipoon iti itatangken ti pusoda;

¹⁹ Nga idinto a napucaw ti amin a ricnadan inyawatda ti bagida iti kinaderrep, tapno aramidenda, a siaagum ti amin a kinarugit.

²⁰ Ngem saanyo nga inadal a casta ni Cristo;

²¹ No casta ngarud a nagdengngegcayo kencuana, ken nasursuroancayo kencuana, cas iti kinapudno ken Jesus:

²² Iccatenyo coma ti maipapan iti napalabes a panagbibiagyo, di tao a lacay nga agruprupsa a maitonos cadagiti derrep a mangal-lilaw;

²³ Ket mapabarocay coma iti espiritu ti isipyo.

²⁴ Ket macawesancay coma iti tao a baro nga naparsua a maitonos iti Dios, iti kinalinteg ken kinasanto ti kinapudno.

²⁵ Gapuna, baybay-anyo ti kinaulbod ket sao-enyo ti pudno tunggal maysa iti padana a tao, ta datayo agkikinnamcamengtayo ti maysa ken maysa.

²⁶ No agpungtotcayo, dicay agbasol; saan coma a lumnec ti init a sipupungtotcay pay laeng:

²⁷ Ket dicay iccan ti lugar ti sairo.

²⁸ Daydi nagtactacaw, saan coma nga agtacawen, no di ket agtrabajo, nga aramidenna ti naimbag, babaen ti imana, tapno adda pagitedna iti adda pacasapulanna.

²⁹ Awan coma ti sao a naalas a rumuar iti ngiwatyo, no di ket ti naimbag a maipaay a pagsingpetan, cas maiparbeng iti pacasapulan, tapno paraburanna dagiti agdengngeg.

³⁰ Ket dicay pagleddaangen ti Espiritu Santo ti Dios, isu a pacamarcaanyo a naisagana iti aldaw ti pannacasubbot.

³¹ Isu-amin a pait, ken gura, ken unget, ken ariwawa, ken dakes a panagsao, maiccat coma cadacayo, agraman ti amin a dakes a panggep:

³² Ket managayanayatcayo, agkikinnaasi ken agpipinnacawancayo, a cas met ti Dios pinacawannacayo gapu ken Cristo.