Taga-Efeso 3 - Ti Biblia (1973)

Ti parabur ti Dios a naited ken Pablo.

¹ Gapu itoy, siac ni Pablo, a balud ni Cristo Jesus, gapu cadacay a Gentil,

² No casta a nadamagyo ti pannacaaywan ti parabur ti Dios, a naited caniac a maipaay cadacayo;

³ Ta gapu iti palti-ing naipacaammo caniac ti palimed, cas insuratco iti ababa a sao:

⁴ A no basaenyo, maawatanyo ti pannacacaammoc iti palimed ni Cristo;

⁵ Isu a cadagidi sabsabali a caputotan saan a naipacaammo cadagiti annac dagiti tattao, cas iti pannacaipalti-ingna ita cadagiti sasanto nga apostol ken mammadto babaen ti Espiritu;

⁶ A dagiti Gentil makipagtawidda ken makipagcamcamengda iti bagi, ket makiranudda iti naicari ken Cristo Jesus, gapu iti evangelio.

⁷ Gapu itoy naaramidac a ministro cas iti sagut daydi parabur ti Dios a naited caniac, cas iti panangaramid ti pannacabalinna.

⁸ Caniac, a siac ti canomoan cadagiti isu-amin a sasanto, naited daytoy a parabur ti panangicascasabac cadagiti Gentil dagiti di matucod a kinabacnang ni Cristo;

⁹ Ken ti panangilawlawag cadagiti amin a tattao, no ania ti ornos ti palimed, a nanipud idi damo nailemmeng iti Dios, a namarsua cadagiti amin a banbanag;

¹⁰ Tapno ita gapu iti Iglesia, maipacaammo coma cadagiti panguloen ken agturturay cadagiti yan a nailangitan, ti nadumaduma a kinasirib ti Dios.

¹¹ A mayannurot iti gandat nga agnanayon a tinungpalna ken Cristo Jesus, nga Apotayo:

¹² Isu a pacagun-odantayo ti wayawaya ken pacaasicgantayo a sitatalged iti Dios, gapu iti pammatitayo kencuana.

¹³ Gapuna dawatec a dicay maupay gapu cadagiti rigrigat a sagabaec gapu cadacayo, ta isuda ti pacaidayawanyo.

Ti araraw ni Pablo a maipoon cadagiti taga Efeso.

¹⁴ Gapu itoy, irucnoyco dagiti tumengco iti sangoanan ti Ama,

¹⁵ Isu a pangalaan ti nagan ti amin a sangacabbalayan idiay langit ken ditoy daga,

¹⁶ Tapno ipaayna coma cadacayo, cas iti kinabacnang ti dayagna a mapapigsacayo iti pannacabalin, iti tao a makin-uneg; gapu iti Espirituna,

¹⁷ Tapno agnaed coma ni Cristo cadagiti puspusoyo, gapu iti pammati; tapno idinto nga agramutcayo ket macimientoancayo ken ayat,

¹⁸ Mabaelanyo coma a maawatan, agraman dagiti amin a sasanto, no ania ti caacaba ken caatiddug, ken ti cangato ken cauneg,

¹⁹ Ken maammoan ti ayat ni Cristo, nga atiwenna ti amin a pannacaammo; tapno mapnocayo iti isu-amin a pannacapunno ti Dios.

²⁰ Ket iti daydiay mannacabalin nga agaramid iti di matucod nga ad-adu ngem iti dagup ti isu-amin a mabalintayo a dawaten, wenno panunuten, cas iti pannacabalin nga agaramid cadatayo,

²¹ Maipaay coma kencuana ti dayaw iti Iglesia ken ni Cristo Jesus, cadagiti isu-amin a caputotan nga agnanayon. Amen.