Taga-Efeso 2 - Ti Biblia (1973)

Panagduma ti immun-una a casasaad ken ti agdama.

¹ Ket pinagbiagnacayo, idinto a nataycayon gapu cadagiti panangsalungasing ken basbasol,

² A nagnaanyo idi naminsan cas iti ugali daytoy lubong, cas mayannurot iti panguloen ti pannacabalin ti angin, ti espiritu nga ita agaramid cadagiti annac ti kinasukir;

³ Nga iti tengnga dagitoy, datay met amin idi naminsan nagbiagtay cadagiti derderrep ti lasagtayo, a tungpalentay dagiti tarigagay ti lasag ken dagiti panpanunot; ket iti nacayanacan, annacnatayo idi ti pungtot, a cas cadagiti sabsabali:—

⁴ Ngem ti Dios, idinto a nabacnang iti caasi, gapu iti dackel nga ayatna a pinangayatna cadatayo,

⁵ Uray pay nataytayon idi gapu cadagiti basbasoltayo, pinagbiagnatayo a nairanud ken Cristo (gapu iti parabur naisalacancayo),

⁶ Ket pinagungarnatayo a nairaman kencuana, ket pinagtugawnatayo a naicuyog kencuana cadagiti yan a nailangitan, ken Cristo Jesus:

⁷ Tapno, cadagiti pannawen a mapasungad iparangarangna ti naindaclan a kinabacnang ti paraburna ti kinaimbag cadatayo ken Cristo Jesus:

⁸ Ta gapu iti parabur naisalacancayo gapu iti pammati; ket daytoy saan a nagtaud cadacayo ta sagut ti Dios;

⁹ Saan nga aggapu cadagiti ar-aramid, tapno awan ti siasinoman nga agpasindayaw.

¹⁰ Ta datayo aramidnatayo, a naparsua ken Cristo Jesus a maipaay cadagiti naimbag nga ar-aramid, isuda nga insagana ti Dios idi, tapno magmagnatay coma cadacuada.

Ti cruz ni Cristo pinagmaymaysana iti Dios dagiti Gentil ken Judio.

¹¹ Gapuna, laglagipenyo, nga idi naminsan dacayo a Gentil iti lasag managancay idi ti; Di pannacacugit gapu iti daydiay managan Pannacacugit iti lasag; nga aramid ti ima;

¹² Idi a tiempo nga awancay pay ken Cristo, a saancay a nairaman iti pannakipagili iti Israel, ket gangannaetcayo ti maipapan cadagiti tulag ti cari; nga awan ti inanamayo ket addacay ditoy lubong nga awanan Dios.

¹³ Ngem ita, ken Cristo Jesus, dacayo nga idi adayucayo iti Dios, naiyasidegcayo kencuana, gapu iti dara ni Cristo.

¹⁴ Ta isu ti cappiatayo, isu a namagcaycaysa cadagiti dua ket dinupracna ti pader a mamaglasin idi,

¹⁵ Nga isu, ti panaggurangurada; ket pinucawna babaen ti lasagna, ti linteg dagiti bilbilin agraman cadagiti alalagaden; tapno mamarsua kencuana met laeng ti maysa a baro a tao cadagiti dua, nga aramidenna ti cappia;

¹⁶ Ken maicappiana ida nga agpadpada iti Dios iti maymaysa a bagi, gapu iti cruz, idinto a pinapatayna ti gurangura kencuana (iti cruz:)

¹⁷ Ket immay ket incascasabana ti cappia cadacayo nga adda idi iti adayu, ken ti cappia cadagidi adda iti asideg:

¹⁸ Ta gapu kencuana dacami ken dacayo addaantayo ti gundaway ti iyaasideg iti Ama, babaen ti maymaysa nga Espiritu.

¹⁹ Iti casta ngarud, saancayon, a gangannaet ken dumagdagus, no di ket cailiandacayon dagiti sasanto, ken cabbalay ti Dios,

²⁰ A nabangon iti rabaw ti cimiento dagiti apostol ken dagiti mammadto, ket ni Cristo Jesus met laeng ti bato a nangnangrona ti iking;

²¹ Kencuana, tunggal balay nga agaal-lot ti pannacasangsangalna, rumang-ay a maipaay a maysa a Templo a nasantoan iti Apo;

²² Isu a pacaicuyoganyo met a mabangbangon tapno pagbalayan ti Dios babaen ti Espiritu.