Taga-Colosas 3 - Ti Biblia (1973)

Balacad tapno tungpalenda dagiti nadumaduma a rebbeng nga aramiden.

¹ Ngarud no napagungarcayo a naicuyog ken Cristo, sapulenyo dagiti banbanag sadi ngato, isu a yan ni Cristo nga agtutugaw iti macanawan ti Dios.

² Panunutenyo dagiti banbanag sadi ngato, saan a dagiti banbanag ditoy daga.

³ Ta nataycayon, ket ti biagyo naidulin a nairaman ken Cristo iti Dios.

⁴ Inton ni Cristo, a biagtayo, maiparangarangto maiparangarangcayonto metten a mairaman kencuana iti gloria.

⁵ Papatayenyo ngarud dagiti camcamengyo nga addada iti rabaw ti daga, nga isuda ti pannakicamalala, ti kinarugit, dagiti derrep, dagiti dakes a tarigagay, ken ti agum, isu a panagrucbab cadagiti didios;

⁶ Gapu cadagitoy a banag umay ti pungtot ti Dios cadagiti annac ti kinasukir:

⁷ Cadacuada, nagnacay met idi naminsan idi nagbibiagcayo cadagitoy a banbanag;

⁸ Ngem ita, idianyo coma metten amin dagitoy a banbanag; pungtot, gura, kinadakes ti nakem, kinasalawasaw, naalas a sasao a rumuar iti ngiwatyo:

⁹ Saancayo nga agiinnulbod, yantangay inucsubyo daydi tao a lacay agraman dagiti ar-aramidna,

¹⁰ Ket incawesyo ti tao a baro, isu a mapabpabaro iti pannacaammo nga umasping iti daydiay namarsua kencuana:

¹¹ A kencuana awan ti Griego ken Judio, pannacacugit ken di pannacacugit uray gangannaet, uray Escita, uray adipen ken agwayawaya; no di ket ni Cristo ti isu-amin ket adda cadagiti isu-amin.

¹² Agcawescayo ngarud, cas cadagiti pinili ti Dios, sasanto ken ayayaten, iti maysa a puso a naasi, iti kinaimbag ti nakem, iti kinapacumbaba; iti kinaemma, ken iti nabayag a panagiturtured;

¹³ Nga agi-innanuscayo, ket agpipinnacawancayo, no ti asinoman adda pangidarumanna iti sabali; cas iti pammacawan ti Apo cadacayo, castacayo met.

¹⁴ Ket cangronaan cadagitoy a banbanag, agcawescayo ti ayat, isu ti singgalut ti pannacaananay.

¹⁵ Ket agari coma cadagiti puspusoyo ti talna ni Cristo, isu met a nacaawisanyo iti maymaysa a bagi; ket siiyamancayo coma.

¹⁶ Ti sao ni Cristo agtaeng coma cadacayo a sibabacnang iti amin a kinasirib nga agsisinnurocayo, ken agbibinnalacadcayo babaen cadagiti salmos ken himhimno, ken naespirituan a cancancion a cancantaenyo a siiyaman cadagiti puspusoyo iti Dios.

¹⁷ Ket dagup ti isu-amin nga aramidenyo, iti sao wenno iti aramid, aramidenyo babaen iti nagan ni Apo Jesus, nga agyamancayo iti Dios Ama gapu kencuana.

¹⁸ Babbai, agtulnogcayo cadagiti assawayo, cas mayannugot iti Apo.

¹⁹ Lallaki, ayatenyo dagiti assawayo ket dicayo ida pagledleddaangen.

²⁰ Annac, agtulnogcayo cadagiti naganac cadacayo cadagiti isu-amin a banag; ta daytoy macaay-ayo unay iti Apo.

²¹ Amma, saanyo a sursuronen dagiti annacyo, di la ket ta maupay ti nakemda.

²² Paad-adipen, agtulnogcayo iti isu-amin cadagiti appoyo a tattao, saan la nga iti imatangda, a cas cadagiti agayat a mangay-ayo cadagiti tattao no di ket buyugen ti kinadalus ti puso, a cabutengyo ti Apo:

²³ Dagup ti aramidenyo, aramidenyo a napusoan, a cas la maipaay iti Apo, ket saan a maipaay cadagiti tattao;

²⁴ A pagaammoyo nga iti biang ti Apo awatenyonto ti gunguna a tawid; agservicayo ken Cristo nga Apo.

²⁵ Ta ti agaramid ti dakes, awatennanto ti supapac ti dakes nga inaramidna: ket awan ti pagdudumaan dagiti tao.