Taga-Colosas 2 - Ti Biblia (1973)

Bilbilinna tapno maidian dagiti dakes a sursuro.

¹ Ta cayatco a maammoanyo ti dackel unay a pannakidangadangco gapu cadacayo ken cadagiti taga Laodicea, ken cadagiti isu-amin a dipay nacakita ti rupac;

² Tapno maliwliwa coma dagiti puspusoda, nga agsisinggalutda coma ken ayat ken maipaay iti amin a kinabacnang ti naan-anay a pannacaawat, a maipaay iti panangammo iti palimed ti Dios, isu ni Cristo,

³ Isu a nacailemmengan dagiti isu-amin a gameng ti sirib ken pannacaammo.

⁴ Cunac daytoy, tapno awan coma ti mangal-lilaw cadacayo cadagiti sao a macauy-uyot.

⁵ Ta uray no awanac a sibabagi, ngem adda ti espirituc cadacayo a siraragsacac ken sikikita iti ornosyo, ken ti kinatibker ti pammatiyo ken Cristo.

⁶ Idinto ngarud nga inawatyo ni Cristo Jesus nga Apo, agbiagcayo kencuana,

⁷ A maparamutcayo, ken mapadackelcayo kencuana, ket mapalagdacayo iti pammati, a cas met iti pannacaisuroyo ket mapnocayo iti panagyaman.

⁸ Agannadcayo, di la ket ta adda mangcayaw cadacayo, gapu iti filosafiana ken macaallilaw a sursuro cas mayalubog cadagiti sarsarita a natao-an, ken mayalubog cadagiti nailubongan a pamunganayan ket saan a mayannurot ken Cristo;

⁹ Ta kencuana agtaeng ti naananay a Kinadios a sibubukel,

¹⁰ Ket ti caaddayo kencuana naaramidcayo a naananay ket isu ti ulo ti amin a kinaturay ken pannacabalin:

¹¹ Isu met a nacacugitanyo iti maysa a pannacacugit a saan nga inaramid iti ima, babaen ti pannacaiwacsi ti bagi a linalasag gapu iti pangcugit ni Cristo;

¹² A naitabuncayo a naicuyog kencuana iti pannacabautizar isu met a nacapagungaranyo a naicuyog kencuana, gapu iti pammati iti panangaramid ti Dios, a namagungar kencuana cadagiti natay.

¹³ Ket dacayo, idinto a nataycayo gapu cadagiti basbasolyo, ken ti di pannacacugit ti lasagyo, iniccannacayo ti biag a naicuyog kencuana, a pinacawannatayo, cadagiti isu-amin a basbasoltayo;

¹⁴ A pinunasna ti maibusor cadatayo, ti surat a nacailanadan dagiti bilbilin, a nangparigat cadatayo idi; ket isu pinucawna, nga inlansana iti cruzna:

¹⁵ Idi nga inabacna, dagiti kinaturay ken dagiti pannacabalin, imparangna iti napatac, ti panagballigina cadacuada iti cruzna.

¹⁶ Dicay coma ngarud paocom iti siasinoman no maipapan iti pannangan wenno iyiinum, wenno maipapan iti aldaw ti fiesta, wenno luttuad, wenno aldaw a panaginana:

¹⁷ Dagitoy a banbanag isuda idi ti aniniwan dagiti banbanag nga umay; ngem ti bagi cucua ni Cristo.

¹⁸ Dicay coma papucaw ti gungunayo, babaen ti siasinoman nga aginpapacumbaba ken gapu iti panagrucbab cadagiti angel; nga agtalged cadagiti banbanag a nakitana, a sipapalangguad gapu iti panunutna a linalasag,

¹⁹ Ket saan nga agtalinaed iti ulo, a gapu kencuana amin a bagi, idinto a mataraonan ken masangal gapu cadagiti nagsusuupan ken ururat, rumang-ay iti irarang-ay a nadiosan:

²⁰ No nataycayon a naicanunong ken Cristo iti maipapan cadagiti nailubongan a sursuro apayapay a cas la agbibiagcayo babaen ti lubong, nga agtulnogcayo cadagiti al-alagaden:

²¹ Dicay igganan, dicay ramanan, dicay sagiden.

²² Banbanag amin a mapucawda iti pannacaaramatda a mayannurot cadagiti bilbilin ken sursuro dagiti tattao?

²³ Dagitoy a banbanag agpayso nga agparangda a nainsiriban, babaen ti cananakem a panagdayaw ken kinapacumbaba ken panangparigat iti bagi; ngem awan ti aniaman a pategda, a manglapped iti tarigagay ti lasag.