Sofonias 3 - Ti Biblia (1973)

Ti panangay-ay a maipaay iti Jerusalem ken cadagiti nasnacion. Ti pannacaisubli ken kinatalged ti Israel.

¹ Asi pay daydiay nasungit ken narugit! Ti manangilupit nga ili!

² Isu saan a nagtulnog iti timec; saan nga immawat iti panagisuro; saan a nagcammatalec ken ni Jehova; saan nga immasideg iti Diosna.

³ Dagiti piprincipena iti nagtengngaanna isuda dagiti ngumerngernger a leon; dagiti oc-ocomna isuda dagiti lobo ti rumabii; isuda dida mangitidda iti uray aniaman agingga iti bigat.

⁴ Dagiti mammadtona nadursocda ken manangallilawda a tattao; dagiti papadina binassawanganda ti santuario, sinalungasingda ti linteg.

⁵ Ni Jehova nalinteg iti nagtengngaanna; dinto agaramid iti kinadakes; iti tunggal bigat yegna ti kinajusticiana iti lawag, isu saan nga agcurang; ngem ti nakillo dina ammo ti bain.

⁶ Siac dadaelecto dagiti nasnacion; dagiti torre iti pagsulianda walangwalangda; pinaglangalangco dagiti calcalsadada, iti casta awan ti aglasat; dagiti il-ilida madadaelda, iti casta awan ti tao, casta met awan ti agnaed.

⁷ Kinunac, Isuna laeng nga agbutengca caniac; umawatca iti panangisuro, iti casta ti pagnaedanna dinto mapucaw; a mayalubog iti amin nga inkeddengco a maipapan kencuana: ngem timmacderda a nasapa ket pinadakesda dagiti amin nga aramidda.

⁸ Ngarud aguraycayo a maipaay caniac, cuna ni Jehova, agingga iti aldaw nga itatacderco a mangsamsam; ta ti panangikeddengco isu ti panangurnong cadagiti nasnacion, tapno maummongco coma dagiti pagpagarian, tapno ibucbocco cadacuada ti ungetco, ti met laeng narungsot a pungtotco; ta isu-amin a daga malamutto iti apuy ti imonco.

⁹ Iti casta isublicton cadagiti il-ili ti nadalus a pagsasao, tapno isuda amin awaganda coma ti nagan ni Jehova, tapno agservida a situtonos kencuana.

¹⁰ Manipud iti ballasiw dagiti carcarayan ti Etiopia dagiti agdawdawat caniac, ti anac met laeng a babai di inwarac, yegdanto ti daton caniac.

¹¹ Iti daydiay nga aldaw saancanto a mabainan gapu cadagiti amin nga ar-aramidmo, a nagsalungasingam a maicaniwas caniac; ta iti casta iccatecton iti tengngam dagiti tattaom a sitatangsit nga agragragsac, ket dicanto tangsitenen iti nasantoan a bantayco.

¹² Ngem tiddaecto iti tengngam ti maysa a naparigat ken napanglaw nga ili ket isuda agcamangdanto iti nagan ni Jehova.

¹³ Ti matda ti Israel didanto agaramid iti kinadakes, didanto met agsao cadagiti ul-ulbod; ti naulbod a dila saanto met a masaracan iti ngiwatda: ta isuda agtaraondanto ken agiddadanto, ket awanto ti mangpabuteng cadacuada.

¹⁴ Agcantaca, O anac a babai ti Sion; agdir-ica, O Israel; agrag-oca ken agragsacca iti isu-amin a puso, O anac a babai ti Jerusalem.

¹⁵ Ni Jehova iniccatna dagiti pannacaocommo, impuruacna ti cabusormo: ti Ari ti Israel, a ni met laeng Jehova, adda iti nagtengngaam; dicanto agbutengen iti dakes uray caano.

¹⁶ Iti daydiay nga aldaw macunanto iti Jerusalem, Dica agbuteng; O Sion, dica palubosan a cumapuy coma dagita im-imam.

¹⁷ Ni Jehova a Diosmo adda iti nagtengngaam, ti maingel a mangisalacanto; agrag-onto kenca a mabuyugan iti panagragragsac; aginananto iti ayatna; agragsacto kenca a mabuyugan iti panagcancanta.

¹⁸ Urnongecto dagidiay agladladingit nga agpaay iti nangayed a gimong, isuda a cucuam idi; a ti awit kencuana isu idi ti pannacaumumsi.

¹⁹ Adtoy, iti dayta a pannawen supapacacto dagiti isu-amin a mangpaladingit kenca: ket ispalecto daydiay pilay, ket yurnongconto daydiay napassia; ket pagbalinecto ida a madaydayaw ken mainaganan iti isu-amin a daga a nacaibabainanda idi.

²⁰ Iti daydiay a pannawen iserreccanto, ken iti daydiay a pannawen urnongencanto; ta aramidencanto a nagan ken madaydayaw cadagiti isu-amin nga il-ili ti daga, intono pagbaliwec ti pannacacayawmo iti sango dagiti matayo, cuna ni Jehova.