Sofonias 2 - Ti Biblia (1973)

Ti dusa a maipatayto cadagiti cabusor ti Juda.

¹ Aguornongcayo, wen, aguornongcayo, O nacion nga awan ti bainna;

² Iti casacbayan ti pannacaibanag ti naikedeng, iti casacbayan ti panaglabas ti aldaw a cas iti taep, iti casacbayan ti iyaay cadacayo ti narungsot a pungtot ni Jehova, iti casacbayan ti iyaay cadacayo ti aldaw ti pungtot ni Jehova.

³ Birukenyo ni Jehova, dacayo amin a naemma iti daga, a nagtungpal cadagiti bilbilinna; birukenyo ti kinalinteg, birukenyo ti kinaemma: nalabit a dacayo maitalimengcayto iti aldaw ti pungtot ni Jehova.

⁴ Ta ti Gaza mabaybay-anto, ket ti Ascalon walangwalangto: passiaendanto ti Asdod iti tengnga ti aldaw, ket ti Ecron maparutto.

⁵ Asi pay dagiti agnaed iti igid ti taaw, ti nacion ti Keretim! Ti sao ni Jehova maibusor cadacayo, O Canaan, a daga dagiti Filisteos; dadaelencanto, tapno awanto ti agnaed.

⁶ Ket ti igid ti taaw agbalinto a pagpaaraban, nga addaan cadagiti calapaw a maipaay cadagiti pastor ken pagyaponan cadagiti pangen.

⁷ Ket ti igid ti taaw agpaayto iti matda ti balay ti Juda; ipaarabdanto dagiti pangenda sadiay; cadagiti balbalay ti Ascalon agiddadanto iti rumabili; ta ni Jehova a Diosda sarungcarannanto ida, ket pagbaliwennanto ti pannacacayawda.

⁸ Nangngegco ti panangumsi ti Moab, ken dagiti pananglais dagiti annac ti Ammon, a pinangrabngisda iti ilic, ket intan-ocda dagiti bagbagida met laeng a maibusor iti beddengda.

⁹ Gapuna a cas sibibiagac, cuna ni Jehova dagiti buybuyot, a Dios ti Israel, Pudno unay a ti Moab caslanto iti Sodoma, ket dagiti annac ti Ammon casladanto iti Gomorra, tagicuaen dagiti sisiit, ken apaya ti asin, ken agnanayon a langalang: ti matda ti ilic aramidennanto ida a samsam, ket ti matda ti nacionco tawidennanto ida.

¹⁰ Daytoy addanto cadacuada a pagtangsitda, agsipud ta nangrabngisda ken intan-ocda dagiti bagbagida met laeng a maibusor iti ili ni Jehova dagiti buybuyot.

¹¹ Ni Jehova nacakigkigtotto cadacuada; ta bisinannanto dagiti isu-amin a didios ti daga; ket dagiti tattao agdaydayawdanto kencuana, ti tumunggal maysa manipud iti dissona, isu-amin met laeng a purpuro dagiti nasnacion.

¹² Dacayo met taga Etiopia, mataycayonto iti campilanco.

¹³ Ket yunnatnanto ti imana a maibusor iti amianan, ket dadaelennanto ti Asiria, ket aramidennanto ti Ninive a walangwalang, ken namaga a cas iti let-ang.

¹⁴ Ket dagiti arban agiddadanto iti tengngana, isu-amin dagiti animal dagiti nasnacion; ti pelicano ken ti anaping agpadpadanto a dumagus cadagiti capitalna; ti timecda umawengdanto cadagiti tawtawa; ti pannacawalangwalang addanto cadagiti dapdapian; ta lucasanna ti tinubay a cantingen.

¹⁵ Daytoy ti naragsac nga ili a nagnaed a sililiway, a nagcuna iti pusona, Addaac, ket awan ti sabali no saan a siac: Anian a panagbalinna a walangwalang, maysa a disso a pagiddaan dagiti an-animal! siasinoman a lumabas iti dennana agsanamticto, ket isinasna ti imana.