Santiago 3 - Ti Biblia (1973)

Panangtengngel iti dila.

¹ Saan nga aducayo coma a mannursuro, cacabsatco; idinto nga ammoyo nga awatentayto ti naing-inget a pannacaocom.

² Ta maitibcultayo amin cadagiti adu a banbanag. No adda saan a macabasol iti sao, maysa a tao, a naimbag unay, a macabalin a mangngednged iti isu-amin a bagi.

³ Ta no icabiltayo dagiti freno dagiti caballo, cadagiti ngiwatda, tapno agtulocda cadatayo, mapagtuloctayo met ti amin a bagida.

⁴ Kitaenyo met dagiti sasacayan uray nagdadackelda ken iduron ida dagiti angin a napigsa, mapusipusda pay gapu iti maysa a bassit unay a timon, iti uray sadino a cayatto a pangiturongan ti mangidalan.

⁵ Casta met ti dila maysa a camcameng a bassit, ket pagpasindayagna dagiti dadackel a banbanag. Kitaenyo ti nagdackel a cacaycayoan silmutan ti bassit nga apuy!

⁶ Ket ti dila isu ti maysa nga apuy, ti maysa a lubong ti kinadakes, a maicabil iti nagtengngaan dagiti camcamengtayo; isu a mangtulaw iti isu-amin a bagi, ket pasgedanna ti pilid ti sangcaparsuaan ket mapasgedan ti infierno.

⁷ Ta isu-amin a kita dagiti animal ken tumatayab, dagiti agcarcarayam ken dagiti adda iti baybay, paammoen ida ken pinaamo ti tao:

⁸ Ngem ti dila saan a mabalin a paammoen ti uray siasino a tao: maysa a dakes a di aginana, napno iti gamut a macapatay.

⁹ Isu ti pangdayawtayo iti Apo ken Ama, ket isu ti pangilunodtayo cadagiti tattao isuda a naaramid a caasping ti Dios:

¹⁰ Iti maymaysa a ngiwat rummuar ti panangidayaw ken panangilunod. Cacabsat, dagitoy a banbanag saanda a maipaay a casta ti pannacaaramidda.

¹¹ Ipussoac aya ti maysa nga ubbog iti maymaysa nga abut, ti danum a nasam-it ken napait?

¹² Mabalin aya, cacabsatco, ti higos a patauden ti olivas, wenno ti uvas, higos? Di met mabalin ti apgad a patauden ti danum a nasam-it.

¹³ Siasino ti masirib ken mannacaammo cadacayo? Ipakitana coma gapu iti naimbag a panagbiagna, dagiti aramidna iti kinaemma ti sirib,

¹⁴ Ngem no adda cadagiti puspusoyo dagiti napait nga agum ken ti pannakilasin, dicay agpasindayag ken dicay agulbod a maisalungasing iti pudno.

¹⁵ Saan nga isu daytoy ti sirib nga aggapu sadi ngato; no di ket ti sirib a nailubungan, dinederrep, sinasairo.

¹⁶ Ta no sadino ti yan dagiti agum ken panagriringgor adda idiay ti riribuc ken amin nga aramid a kinadangcuc.

¹⁷ Ngem ti sirib nga aggapu sadi ngato, umuna nadalus, sumaganad natalna, nalaing, nalaca a pagdawatan napno iti asi ken cadagiti nasayaat a bungbunga, awan ti idumdumana, awan ti panaginsisingpetna.

¹⁸ Ket ti bunga ti kinalinteg maimula iti talna a maipaay cadagiti agar-aramid ti talna.