Ruth 4 - Ti Biblia (1973)

Ni Booz subbotenna ti tawid ni Elimelec, ket asawaenna ni Ruth. Ti pannacayanac ni Obed.

¹ Ket ni Booz napan idi iti ruangan, ket nagtugaw sadiay: ket, adtoy, ti asideg a cabagian, a nasao idi Booz, lumabas; nagtimcanna a kinunana, Nay, dumagasca, tumugawca ditoy. Ket isu dimmagas, ket nagtugaw.

² Ket isu nangala cadagiti sangapulo a lallaki cadagiti lallacay ti ili, ket kinunana, Tumugawcayo ditoy. Ket isuda timmugawda.

³ Ket isu kinunana idi asideg a cabagian, Ni Noemi, isu a naggapu manen iti daga ti Moab, inlacona ti paset ti daga, a cucua idi ni cabsattayo nga Elimelec:

⁴ Ket siac napanunotco nga ibatad kenca, a cunaec, Isu gatangem iti saclang dagitoy a situtugaw ditoy, ken iti saclang dagiti lallacay ti ilic. No sica isu subbotem, isu subbotem: ngem no isu dica subboten, iti casta ipalawagmo caniac, tapno maammoac coma; ta awan ti sabali a mangsubbot kencuana malacsid kenca; ken siac iti calpasam. Ket isu simmungbat, Siac isu subbotecto.

⁵ Idin ni Booz kinunana, Iti met laeng aldaw a pananggatangmo iti talon iti ima ni Noemi, sica rebbengmo met a gatangen ni Ruth a Moabita, nga asawa daydi natay, tapno ibangonmo coma ti nagan daydi natay iti rabaw ti tawidna.

⁶ Ket ti asideg a cabagian kinunana, Isu diac mabalin a subboten nga agpaay caniac met laeng, tapno diac dadaelen ti tawidco met laeng: alaem kenca ti calintegac a panangsubbot; diac mabalin a subboten.

⁷ Ket daytoy adda idi a cadawyan idi unana a tiempo idiay Israel iti maipapan iti panangsubbot ken iti maipapan iti panagsisinnucat, tapno pamasingked iti amin a panggep: ti maysa a tao suctoenna idi ti zapatosna, ket isu ti itedna idi iti catulagna; daytoy isu idi ti wagas ti panangsacsi idiay Israel.

⁸ Iti casta ti asideg a cabagian kinunana ken Booz, Isu gatangem nga agpaay kenca met laeng: ket isu sinuctona ti zapatosna.

⁹ Ket ni Booz kinunana cadagiti lallacay, ken iti amin a tattao, Dacayo ti macasacsi iti daytoy nga aldaw, a ginatangco amin a cucua idi ni Elimelec, ken amin nga adda idi ken ni Quelion ken ni Mahalon, manipud iti ima ni Noemi.

¹⁰ Casta met ni Ruth a Moabita, nga asawa ni Mahalon, ginatangco tapno isu asawac, tapno bangonec ti nagan daydi natay iti rabaw ti tawidna, tapno ti nagan daydi natay saan coma a maiccat iti tengnga dagiti cacabsatna, ken iti ruangan ti lugarna: dacayo dagiti macasacsi iti daytoy nga aldaw.

¹¹ Ket amin a tattao nga adda idi ruangan, ken dagiti lallacay, kinunada, Dacami dagiti macasacsi. Ni Jehova aramidenna coma ti babai a sumrec iti balaymo a cas ken Raquel ken cas ken Lea, isuda a dua idi dagiti namangon iti balay ni Israel: ket agaramidca a sitatacneng idiay Efrata, ken sica ti madaydayaw coma iti Bet-lehem:

¹² Ket ti balaymo isu coma ti cas iti balay ni Fares, nga impasngay idi ni Tamar ken Juda, iti putot a ni Jehova itdennanto coma kenca gapu iti agtutubo a babbai.

¹³ Iti casta ni Booz innalana ni Ruth, ket nagbalin nga asawana; ket ni Booz simrec kencuana, ni Jehova intedna kencuana ti panagsicugket nangipasngay iti maysa nga anac a lalaki.

¹⁴ Ket dagiti babbai kinunada ken Noemi, Madaydayaw coma ni Jehova, nga iti daytoy nga aldaw saannaca a binaybay-an nga awananca iti asideg a cabagian; ket mapadpadayawan coma ti naganna iti Israel.

¹⁵ Ket isunto kenca ti maysa a mamaimbag iti biagmo, ken isunto ti manaraon iti kinabaketmo; ta ti manugangmo, nga agayat kenca, nga isu ti naimimbag kenca ngem cadagiti pito nga annac a lallaki, nangipasngay kencuana.

¹⁶ Ket ni Noemi innalana ti ubing, ket isu impaiddana iti saclotna, ket nagbalin a mangsisiwa kencuana.

¹⁷ Ket dagiti caarrubana a babbai intedda kencuana ti maysa a nagan, a kinunada, Adda maysa nga anac a lalaki a nayanac ken Noemi; ket isuda impanaganda ti nagan nga Obed: Isu ti ama ni Jesse, nga ama ni David.

¹⁸ Ket dagiti capcaputotan ni Fares isuda dagitoy: ni Fares pinutotna ni Hesron,

¹⁹ Ket ni Hesron pinutotna ni Ram, ket ni Ram pinutotna ni Aminadab,

²⁰ Ket ni Aminadab pinutotna ni Nahason, ket ni Nahason pinutotna ni Salmon,

²¹ Ket ni Salmon pinutotna ni Booz, ket ni Booz, pinutotna ni Obed,

²² Ket ni Obed pinutotna ni Jesse, ket ni Jesse pinutotna ni David.