Ruth 2 - Ti Biblia (1973)

Ni Ruth agadas iti talon ni Booz. Ni Booz agaramid a sicacaasi kencuana.

¹ Ni Noemi addaan idi iti maysa a cabagian ni asawana, lalaki a mannacabalin ken masanicua, ti familia ni Elimelec; ket ti naganna Booz.

² Ket ni Ruth a Moabita kinunana idi ken Noemi, Palubosannac coma ita a mapan iti away, ket agadasac cadagiti dawdawa ti trigo iti malicudan daydiay a cadagiti matana macasaracac coma iti parabur. Ket isu kinunana kencuana, Anacco, inca.

³ Ket isu napan, ket dimteng, ket nagadas iti talon iti licudan dagiti agani: ket ti gasatna naibatog iti paset ti talon a cucua ni Booz, a cafamiliaan ni Elimelec.

⁴ Ket, adtoy, ni Booz a naggapu iti Bet-lehem, ket kinunana cadagiti agan-ani, Ni Jehova adda coma cadacayo. Ket isuda simmungbatda kencuana, Ni Jehova bendicionannaca coma.

⁵ Idin ni Booz kinunana iti tagabuna a naicabil a pangolo dagiti agani, Siasino ti akinbalasang iti daytoy?

⁶ Ket ti tagabu a naicabil a pangolo dagiti agani simmungbat ket kinunana, Isu ti balasang a Moabita a nakipagsubli ken Noemi nanipud iti daga ti Moab:

⁷ Ket ni Ruth imbagana, Agdawatac kenca, palubosannac coma nga agadasac, ken agummong iti licudan dagiti agani iti baet dagiti binettec. Iti casta isu immay, ket nagtuloy laeng nanipud iti bigat agingga ita, malacsid nga isu nagyan iti apagbiit idiay balay.

⁸ Idin ni Booz kinunana ken Ruth, Dica denggen, anacco? dica mapan agadas iti sabali a talon, dica coma lumabas manipud ditoy, no di ket agyanca ditoy a canayon iti sibay dagiti tagabuc a babbalasang.

⁹ Bay-am a dagita matam adda coma iti talon a paganianda, ket sumurotca cadacuada: diac imbilin aya cadagiti agtutubo a lallaki a didacanto sagiden? ket no mawawcanto, inca cadagiti caramba, ket uminumca iti danum a sinacdo dagiti agtutubo a lallaki.

¹⁰ Idin isu inrucnoyna ti rupana, ket nagrucob iti daga, ket kinunana kencuana, Apayapay a nacasaracac iti parabur iti imatangmo, a sica malasinnac, idinto a siac maysaac a gangannaet?

¹¹ Ket ni Booz simmungbat ket kinunana kencuana, Naipacaammo a naimbag caniac, amin daydi nga inaramidmo ken catugangam nanipud iti pannacatay daydi asawam; ken no casano ti panangbaybay-am ken ni amam ken ni inam, ken iti daga a nacayanacam, nga immayca iti ili a dica amammo idi.

¹² Ni Jehova gungunaanna coma ta aramidmo, ket ti maysa a napnec a gunguna maited kenca nga aggapu ken Jehova, a Dios ti Israel, nga iti baba dagiti pay-payacna immayca nga agcamang.

¹³ Ket ni Ruth kinunana, Palubosannac coma, apoc, a macasarac iti parabur iti imatangmo; gapu ta liniwliwanac, ken gapu ta nagsaoca a siimbag iti adipenmo a babai, nupay siac saanac a cas iti maysa la coma cadagiti babbalasang a tagabum.

¹⁴ Ket ni Booz kinunana kencuana iti horas ti pannangan, Umadanica ditoy, ket manganca coma iti tinapay, ket isawsawmo ti isacmolmo iti suca. Ket ni Ruth nagtugaw idi iti abay dagiti aganani; ket inyawatda kencuana dagiti kinirog a bucbukel, ket isu nangan, ket napnec ket nagsuroc pay kencuana.

¹⁵ Ket idi a timmacder nga agadas, ni Booz imbilinna cadagiti agtutubo a lallakina, a kinunana, Bay-anyo daydiay nga agadas uray iti tengnga dagiti binettec ket isu dicayo babainen coma.

¹⁶ Ket casta met nga ipuruacanyonto ti dadduma cadagiti binettec iti agpaay kencuana, ket isu baybay-anyo, ket bay-anyonto nga agadas coma, ket isu dicay coma tubngaren.

¹⁷ Iti casta isu nagadas idi talon agingga iti malem; ket binayona daydi nga inadasna, ket nganngani maysa nga efa a cebada.

¹⁸ Ket isu innalana, ket napan iti ili; ket ni catuganganna nakitana daydi nga inadasna: ket isu incuyogna met ket intedna kencuana daydi a natda kencuana iti calpasan ti pannacapnecna.

¹⁹ Ket ni catuganganna kinunana kencuana, Sadino ti nagadasam ita nga aldaw? ken sadino ti nagtrabajoam? bendito coma daydiay a nacailasin kenca. Ket isu imbagana ken catuganganna daydiay a nakipagtrabajoanna, ket kinunana, Ti nagan ti lalaki a nakipagtrabajoac iti daytoy nga aldaw isu ni Booz.

²⁰ Ket ni Noemi kinunana ken manugangna, Isu coma ti mabendicionan ken Jehova, isu a dina inidian ti caasina uray iti nabiag ken iti natay. Ket ni Noemi kinunana kencuana, Ti lalaki asideg a cabagiantayo, maysa cadagiti asideg a cabagiantayo.

²¹ Ket ni Ruth a Moabita kinunana, Wen, isu kinunana caniac, Sica agyancanto a canayon agraman cadagiti agtutuboc a lallaki, agingga iti magibusda amin ti panagapitco.

²² Ket ni Noemi kinunana ken Ruth a manugangna, Nasayaat, anacco, a makicuyogcanto a rumuar cadagiti tagabuna a babbalasang, ken tapno didaca masaracan iti sabali a talon.

²³ Iti casta nagyan iti asideg cadagiti tagabu a babbalasang ni Booz, a nagadas a agingga iti panaggibus ti panagapit ti cebada ken ti panagapit ti trigo; ket isu nakinaed ken catuganganna.