Ruth 1 - Ti Biblia (1973)

Ni Elimelec ken ti familiana aggangannaetda idiay Moab. Da Noemi ken Ruth agsublida idiay Juda.

¹ Ket naaramid idi cadagiti al-aldaw a panagocom dagiti oc-ocom, nga adda idi bisin iti daga. Ket maysa a lalaki a taga Bet-lehem ti Juda napan naggangannaet cadagiti daga ti Moab, isu, ken ni asawana, ken dua nga annacna a lallaki.

² Ti nagan daydi a lalaki Elimelec, ti nagan ni asawana Noemi, ket ti nagan dagiti dua nga annacna isuda Mahalon ken Quelion, Efrateosda ti Bet-lehem ti Juda. Ket immayda iti daga ti Moab, ket nagbayagda sadiay.

³ Ket ni Elimelec, nga asawa ni Noemi, natay idi; ket isu natda, ken dagiti dua nga annacna a lallaki.

⁴ Ket isuda nangalada iti agpaay cadacuada nga assawa cadagiti babbai ti Moab; ti nagan ti maysa Orfa, ket ti nagan ti sabali Ruth: ket nagnaedda sadiay bayat ti sangapulo a tawen.

⁵ Ket da Mahalon ken Quelion; natayda met idi a dua, ket daydi babai nabaybay-an idi cadagiti dua nga annacna ken ti asawana.

⁶ Idin isu timmacder agraman cadagiti manugangna a babbai, tapno agsubli coma manipud iti daga ti Moab: ta nangngegna idiay daga ti Moab no casano ti panangsarungcar ni Jehova iti ilina iti panangtedna cadacuada iti taraon.

⁷ Ket rimmuar nanipud iti disso a nagyananna idi, ket dagiti dua a mamanugangna naicuyogda kencuana; ket napanda iti dalan a sumubli iti daga ti Juda.

⁸ Ket ni Noemi kinunana cadagiti dua a manugangna, Incayo, agsublicayo tunggal maysa cadacayo iti balay ni inana: ni Jehova agaramid coma ti caasi cadacayo, a cas inaramidyo cadagidi natay, ken caniac.

⁹ Ni Jehova ipalubosna cadacayo a macasaraccayo coma iti inana, ti tunggal maysa cadacayo idiay balay ni asawana. Calpasanna inagcanna ida, ket isuda impigsada ti timecda, ket nagsangitda.

¹⁰ Ket kinunada kencuana, Saan, no di ket dacami makipagsublicaminto kenca iti ilim.

¹¹ Ket ni Noemi kinunana, Agsublicayo, annacco: apay aya nga umaycayto a makicuyog caniac? adda pay laeng aya annacco a lallaki iti tianco, a mabalindanto coma nga assawayo?

¹² Agsublicayo annacco, incayo iti dalanyo; ta siac baketac unayen a maaddaan ti asawa. No siac cunac coma, Siac addaanac iti inanama, no iti daytoy met laeng a rabii addaanac coma ti asawa, ket agpasngayac pay coma cadagiti annac a lallaki;

¹³ Dacayo urayenyo coma ida agingga iti dadackelda? agtaengcayo coma gapu itoy a di makiasawa? saan, annacco; ta isu paladingitennac iti adu a gapu cadacayo, ta ti ima ni Jehova rimmuar a maibusor caniac.

¹⁴ Ket isuda impigsada ti timecda, ket nagsangitda manen: ket ni Orfa inagcanna ni catuganganna; ngem ni Ruth kimpet kencuana.

¹⁵ Ket isu kinunana, Adtoy, ni abiratmo nagsubli iti ilina, ket iti diosna: agsublica ala a sumurot ken ni abiratmo.

¹⁶ Ket ni Ruth kinunana, Dica coma tarigagayan caniac a baybay-anca, ken agsubliac manipud iti isusurot kenca; ta sadinoman a papanam, umayacto; sadinoman a pagnaedam, agnanedacto, ti ilim isunto ti ilic, ket ti Diosmo isunto ti Diosco;

¹⁷ Sadinoman a pacatayam, matayacto, ket sadiay maitabonacto: ni Jehova aramidenna coma a casta caniac, ken ad-adda pay, iti uray ania ni laeng patay ti mamagsina cadata.

¹⁸ Ket idi nga isu makitana a nabileg ti nakemna iti pannakicuyogna kencuana dina insasaon kencuana.

¹⁹ Iti casta isuda a dua napanda agingga ti dimtengda iti Belen. Ket naaramid, nga idi a nacadanonda iti Belen, nga amin ti ili nagderraaw a gapu cadacuada, ket dagiti babbai kinunada, Isu daytoy ni Noemi?

²⁰ Ket isu kinunana cadacuada: Didac coma naganen iti Noemi, naganendac iti Mara; ta ti Mannacabalin-amin nagaramid a napait unay caniac.

²¹ Siac napanac idi a sipupuno, ket ni Jehova inyegnac manen nga ongngaong iti balayco; apayapay naganendac iti Noemi, idinto a ni Jehova namanecnec a maibusor caniac, ket ti Mannacabalin pinaladingitnac?

²² Iti casta nagsubli da Noemi, ken Ruth a Moabita, a manugangna a kimmuyog kencuana, a nagsubli nanipud iti daga ti Moab: ket dimtengda iti Bet-lehem iti carugrugi ti panagapit iti cebada.