Paltiing 9 - Ti Biblia (1973)

Ti maicalima nga angel pagunienna ti trompeta.

¹ Ket daydi maicalima nga angel nagtangguyob ket nakitac ti maysa a bituen a natnag ditoy daga, nanipud sadi langit ket naited kencuana ti tulbec ti abut a mangliwengliweng.

² Ket linuctanna daydi abut a mangliwengliweng; ket rimmuar ti asuc idi abut, a cas la iti asuc ti maysa a dackel nga horno, ket nagsipnget ti init ken ti angin iti daga maipuon iti asuc daydi abut.

³ Ket rimmuar iti asuc dagiti dudon iti rabaw ti daga; ket naiccanda ti pannacabalin, a cas ti pannacabalin dagiti manggagama ti daga.

⁴ Ket naibaga cadacuada a dida coma ranggasan ti root ti daga wenno aniaman a nalangto ken uray ania a cayo, no di laeng dagidiay tattao nga awanan ti sello ti Dios, cadagiti mugmugingda.

⁵ Ket naibaga cadacuada a saanda a papatayen ida no di ket tutuokenda ida bayat ti lima a bulan; ket ti pannacatutuocda cas la iti tuoc a patauden idi ti manggagama no siludenna ti tao.

⁶ Ket cadagidiay nga al-aldaw dagiti tattao birukendanto ni patay, ket isu didanto masaracan; ket tarigagayandanto ti natay, ket ni patay itarayannanto ida.

⁷ Ket ti langa dagiti dudon umas-aspingda cadagiti cabayo a maisagana iti gubat; ket iti rabaw dagidi ol-oloda adda sinan balangat a cas la balitoc; ket dagidi ruprupada cas la ruprupa dagiti tattao.

⁸ Ket adda boocda a cas la booc dagiti babbai; ket dagidi ngipngipenda cas la ngipngipen dagiti leon.

⁹ Ket adda cabalda, a cas la cabal a landoc; ket ti daranudor dagiti paypayacda cas la iti daranudor dagiti luglugan ken dagiti adu a cabcabayo, a sisisiglat a simbrec iti gubat.

¹⁰ Ket adda ipusda nga umas-asping cadagiti manggagama, ken pangsilsilud; ket cadagiti ipusda ti pacabalinanda a mangranggas cadagiti tattao iti bayat dagiti lima a bulan.

¹¹ Ket adda a pannacaarida daydi angel ti mangliwengliweng: ti naganna iti pagsasao nga hebreo, isu ti Abaddon ket iti griego managan Apolyon.

¹² Daydi umuna nga Ay! limmabasen; adtoy, sumarunoda pay dagiti dua nga ay! ayen!

Ti maicanen nga angel pagunienna ti trompeta.

¹³ Ket daydi maicanem nga angel nagtangguyob: ket nangngegco ti maysa a timec a naggapu cadagidi sarsara ti altar a balitoc, nga adda iti sangoanan ti Dios.

¹⁴ A cuncunana idi maicanem nga angel a nagiggem iti tangguyob: Luc-atam dagiti uppat nga angel a sibabalud, iti asideg ti dackel a carayan nga Eufrates.

¹⁵ Ket naluc-atan dagidi uppat nga angel, isuda a naisagana iti horas, ken aldaw, ken bulan, ken tawen tapno papatayenda ti apagcatlo dagiti tattao.

¹⁶ Ket ti bilang dagiti buybuyot dagidi nagcabayo mamindua a sangalacsa a lacsa: nangngegco ti bilangda.

¹⁷ Ket iti casta nakitac dagidi cacabayo iti parparmatac, ken dagidi nagsacay cadacuada, nga adda cabalda a cas iti apuy, ket color ti jacinto ken azufre; ket dagidi ol-olo dagidi cabayo cas la cadagiti olo dagiti leon; ket cadagidi ngiwatda rumrummuar ti apuy ken azuc ken azufre.

¹⁸ Gapu cadagitoy tal-lo a pannaplit napapatay ti apagcatlo dagidi tattao, babaen ti apuy ken azuc ken azufre a rimmuar cadagidi ngiwatda.

¹⁹ Ta ti pannacabalin dagiti cabayo adda idi cadagiti ngiwatda, ken cadagiti ipusda; ta dagiti ipusda umas-aspingda cadagiti ululeg, ket adda oloda: ket dagitoy ti pangranggasda.

²⁰ Ket dagiti natda a tattao a saan a napapatay cadagitoy a pannaplit, saanda a nagbabawian dagiti ar-aramid dagiti imimada, tapno dida coma pagrucbaban dagiti demonio ken dagiti didiosen a balitoc ken pirac, ken bronce ken bato, ken cayo; isuda a dida mabalin ti cumita, wenno dumngeg uray magna.

²¹ Ket saanda a nagbabawian dagiti panagpapatayda ti tao: uray dagiti an-anitoda, wenno ti pannakicamalalada, uray dagiti panagtactacawda.