Paltiing 8 - Ti Biblia (1973)

Pannacalucat ti maicapito a sello—Dagiti pito nga angel a nagtrompeta.

¹ Ket idi a linuctanna daydi maicapito a sello, napasamac ti panagulimec sadi langit iti bayat ti guddua ti horas.

² Ket nakitac dagiti pito nga angel nga agtatacder iti sangoanan ti Dios; ket naited cadacuada dagiti pito a tangguyob.

³ Ket sabali nga angel ti immay ket nagtacder iti sangoanan ti altar, a nagiggem iti maysa a paginciensoan a balitoc; ket naited kencuana ti adu nga incienso, tapno inayonna cadagiti carcararag dagiti isu-amin a sasanto, iti rabaw di altar a balitoc, nga adda idi iti sangoanan di trono.

⁴ Ket ti asuc daydi incienso, a naicuyog cadagidi cararag dagiti sasanto, nagpangato manipud iti ima daydi angel agingga iti sangoanan ti Dios.

⁵ Ket daydi angel innalana daydi paginciensoan; ket pinunnona iti apuy di altar, ket imbellengna iti daga ket simmaruno dagiti gurgurrood, ririaw, ken kimkimat ken maysa a gingined.

⁶ Ket dagidi pito nga angel, a nagiggem cadagidi pito a tangguyob, nagsaganada nga agtangguyob.

⁷ Ket daydi immuna nagtangguyob; ket timmaud ti uraro ken apuy a nalaocan iti dara; ket naibellengda iti rabaw ti daga; ket daydi apagcatlo ti daga napuuran, ket daydi apagcatlo dagidi caycayo napuuran, ket amin dagiti nalangto a root napuuranda.

⁸ Ket daydi maicadua nga angel nagtangguyob: ket maysa a cas la dackel a bantay, a sumsumged iti apuy, naitappuac iti baybay; ket ti apagcatlo ti baybay nagbalin a dara;

⁹ Ket natay ti apagcatlo dagiti parsua nga adda idi iti baybay, dagiti addaan biag: ket ti apagcatlo dagiti sasacayan nadadaelda.

¹⁰ Ket daydi maicatlo nga angel nagtangguyob: ket natnag nanipud sadi langit ti maysa dackel a bituen a sumsumged a cas la maysa nga aluten; ket nagdisso iti apagcatlo dagiti carcarayan, ken dagiti ub-ubbog, dagiti dandanum:

¹¹ Ket daydi a bituen nagnaganenda ti Ajenco: ket ti apagcatlo dagiti dandanum nagbalin nga ajenco; ket adu cadagiti tattao natayda gapu cadagidi dandanum, ta nagbalinda a napait.

¹² Ket daydi maicapat nga angel nagtangguyob: ket nadadael ti apagcatlo ti init, ken ti apagcatlo ti bulan, ken ti apagcatlo, dagiti bitbituen, tapno ti apagcatloda, mapasipnget coma ket ti aldaw saan coma nga aglawag ti apagcatlona, ken casta met, ti rabii.

¹³ Ket nakitac ken nangngegco ti maysa nga aguila nga agtaytayab iti nagtangatangan, a cuncunana iti dackel a timec: Ay, ay, ay pay dagiti agnaed iti rabaw ti daga, maipuon cadagiti sabali nga uni ti tangguyob dagiti tal-lo nga angel nga agtangguyobto pay.