Paltiing 6 - Ti Biblia (1973)

Dagiti innem a sello a naluctan.

¹ Ket nakitac idi linuctan daydi Cordero daydi maysa cadagidi pito a sello; ket nangngegco daydi maysa cadagidi uppat a parsua a sibibiag, a nagcuna iti casla timec ti gurruod, Umayca.

² Ket kimmitaac, ket adtoy, ti maysa a cabayo a puraw; ket daydi adda a sisasacay kencuana, adda idi maysa a bai ti panana, ket naited kencuana ti maysa a balangat; ket rimmuar a sibabal-ligi, ken tapno agbal-ligi.

³ Ket idi a linuctanna daydi maicadua a sello, nangngegco daydi maicadua a parsua a sibibiag a nagcuna, Umayca.

⁴ Ket rimmuar ti sabali a cabayo, a nalabaga: ket iti daydi nagsacay itoy, naited kencuana ti panangiccat ditoy daga ti talna, ken tapno agpipinnatayda ket naited kencuana ti maysa a dackel a campilan.

⁵ Ket idi linuctanna daydi maicatlo a sello, nangngegco daydi maicatlo a parsua a sibibiag a nagcuna: Umayca. Ket kimmitaac, ket adtoy, ti maysa a cabayo a nangisit; ket daydi adda a nagsacay kencuana, adda maysa a pagtimbengan iti imana.

⁶ Ket nangngegco ti casla maysa a timec iti tengnga dagidi uppat a parsua a sibibiag, a nagcuna: Maysa a casucat ti trigo mapatgan iti maysa a denario ket tal-lo a casucat ti cebada mapatgan iti maysa a denario; ken: Saanmo a dadaelen ti lana ken ti arac.

⁷ Ket idi linucatanna daydi maicapat a sello, nangngegco ti timec daydi maicapat a parsua a sibibiag, a nagcuna, Umayca.

⁸ Ket kimmitaac, ket adtoy, ti maysa a cabayo a nabessag, ket daydi adda a nagsacay kencuana managan idi ti Patay; ket ti Hades sumursurot kencuana. Ket naited cadagitoy ti panagturay iti apagcapat ti daga, tapno agpapatayda babaen ti campilan, ken ti bisin, ti angel ken cadagiti narungsot nga animal ditoy daga.

⁹ Ket idi linuctanna ti maicalima a sello, nakitac iti siroc ti altar dagiti carcararua dagiti napapatay idi gapu iti sao ti Dios, ken gapu iti pammanecnec a tinaginayonda:

¹⁰ Ket agasasugda iti dackel a timec; Casano ti cabayagna, O Apo a santo ken napudno, a dica ocomen ken ibales ti darami cadagiti agnaed iti rabaw ti daga?

¹¹ Ket naited iti tunggal maysa cadacuada ti maysa a pagananay a puraw; ket naibaga cadacuada nga aginanada pay iti bassit a pannawen agingga iti maturpos ti dalan dagiti caduada met nga adipen, ken dagiti cacabsatda, a mapapataydanto a cas met cadacuada idi.

¹² Ket nakitac idi linuctanna daydi maicanem a sello ket immay ti maysa a dackel a gingined, ket daydi init ngimmisit a cas la maysa a panes a booc; ket daydi bulan nagbalin amin a cas la dara;

¹³ Ket dagiti bitbituen ti langit nagtinnagda iti daga, a cas iti maysa nga higos nga iregregna dagiti bungbungana, a saanda pay a naluum, no gongonem ti maysa a napigsa nga angin.

¹⁴ Ket ti langit nailisi a cas la maysa a pagbasaan no malucot; ket isu-amin a bantay ken puro mayalisda cadagiti dissoda.

¹⁵ Ket dagiti ar-ari ti daga, ken dagiti annac ti ari, ken dagiti cocoronel ken dagiti babacnang, ken dagiti mannacabalin, ken isu-amin nga adipen ken agwayawaya, naglemmengda cadagiti rucrukib, ken cadagiti batbato cadagiti banbantay;

¹⁶ Ket kinunada cadagiti banbantay ken cadagiti batbato: Agtinnagcayo cadacami, ket ilemmengdacami iti imatang daydiay agtutugaw iti trono, ken iti pungtot daydiay Cordero.

¹⁷ Ta dimtengen ti dackel nga aldaw ti pungtotda, ket siasinonto ti macabalin nga agtacder?