Paltiing 5 - Ti Biblia (1973)

Ti libro a naselloan cadagiti pito a sello.

¹ Ket nakitac iti macanawan daydi agtutugaw iti trono, ti maysa a pagbasaan a nasuratan iti uneg ken iti ruar, ket naselloan cadagiti pito a sello.

² Ket nacakitaac iti maysa nga angel a mannacabalin nga iyawawagna iti dackel a timec: Siasino ti maicari a mangbistrad iti pagbasaan, ken mangwarwar cadagiti sellona?

³ Ket awan idiay langit, ket uray ditoy rabaw ti daga, uray iti uneg ti daga, ti nacabalin a mangbistrad idi a pagbasaan, uray no cumita laeng kencuana.

⁴ Ket siac nagsangsangitac unay ta awan ti nasaracan a maicari a nangbistrad idi a pagbasaan, wenno cumita kencuana:

⁵ Ket maysa cadagidi lallacay kinunana caniac: Saanca nga agsangit; adtoy ti Leon iti tribu ni Juda, iti ramut ni David, nagbal-laigi tapno bistradenna ti pagbasaan, ken tapno warwarenna dagiti pito a sellona.

⁶ Ket nakitac, nga agtatacder iti nagtengngaan di trono ken dagiti uppat a parsua a sibibiag, ken dagidi lallacay, ti maysa a Cordero, a cas la napapatay idi: isu nga adda pito a sarana, ken pito a matana, nga isuda dagiti pito nga Espiritu ti Dios, a naibaon iti isu-amin a daga.

⁷ Isu nga immasideg, ket innalana daydi pagbasaan iti ima a macanawan daydi agtutugaw idi trono.

⁸ Ket idi a naalana daydi pagbasaan, dagiti uppat a parsua a sibibiag ken dagidi duapulo ket uppat a lallacay nagrucnoyda, iti sangoanan daydi Cordero, a ti tunggal maysa adda maysa nga arpana, ken malmalocong a balitoc a napno iti incienso, nga isuda dagiti carcararag dagiti sasanto.

⁹ Ket icancantada ti maysa a canta a baro, a cuncunada: Maicarica a mangala iti libro, ken manglucat cadagiti sellona; ta napapatayca idi, ket nagatangmo a maipaay iti Dios babaen ti daram met laeng, dagiti tattao ti amin a capututan, ken pagsasao, ken ili ken pagarian.

¹⁰ Ket pinagbalinmo ida a maipaay iti Diostayo a pagarian ken papadi; ket agarida iti rabaw ti daga.

¹¹ Ket kimmitaac, ket nangngegco ti timec dagiti adu nga angel iti aglicmut daydi trono ken dagiti parsua a sibibiag ken dagidi lallacay; ket ti bilangda idi linacsa a lacsa ken rinibo a ribo;

¹² A cuncunada iti dackel a timec: Maiparbeng daydi Cordero a napapatay idi, nga umawat iti kinapigsa; ti kinabacnang ken ti kinasirib, ken ti pannacabalin, ket ti dayaw ken ti dayag, ken ti bendicion.

¹³ Ket isu-amin a naparsua idiay langit, ken iti rabaw ti daga, ken iti uneg ti daga, ken iti baybay, ken dagiti isu-amin nga adda cadacuada, nangngegco ida nga agcuncuna; Bendicion, ken dayaw ken dayag ken pannacabalin ti adda coma iti daydiay agtutugaw iti trono, ken iti Cordero, iti awan inggana.

¹⁴ Ket dagidi uppat a parsua a sibibiag cuncunada idi, Amen. Ket dagidi lallacay nagrucbabda ket nagdaydayawda.