Paltiing 3 - Ti Biblia (1973)

Maicalima a surat: iti Iglesia sadi Sardis,

¹ Ket isuratmo iti angel ti Iglesia sadi Sardis Dagitoy: a banbanag cuna ti addaan cadagiti pito nga Espiritu ti Dios ken dagiti pito a bituen: Siac ammoc dagiti ar-aramidmo, a managananca sibibiag, ket natayca.

² Agsalucagca, ket pasingkedam dagiti banag a natda pay, isuda a nganngani natay; ta cadagiti ar-aramidmo awan ti nasaracac a nasayaat unay iti sangoanan ti Diosco.

³ Lagipem ngarud no casano ti panangawat ken panagdengngegmo; ket aywanam, ket agbabawica. No saancanto ngarud nga agsalucag, umayacto a cas la mannanacaw, ket dicanto ammo no ania nga horas ti iyaayco kenca.

⁴ Ngem adda kenca sumagmamano a nagnagan dita Sardis a dida rinugitan dagiti pagananayda; ket dagitoy makicuyogdanto caniac nga agcawesda iti puraw; ta isuda dagiti maicari.

⁵ Ti agbal-liginto castoyto a macawesan cadagiti pagananay a puraw; ket uray caano diacto punasen ti naganna iti libro ti biag, no di ket ipaduyacyacconto ti naganna iti sangoanan ni Amac ken dagiti angelna.

⁶ Ti adda pagdengngegna, denggenna coma ti cuna ti Espiritu cadagiti Iglesia.

Maicanem a surat: iti Iglesia sadi Filadelfia.

⁷ Ket isuratmo iti angel ti Iglesia sadi Filadelfia: Dagitoy a banbanag cuna ti santo, ti napudno, ti addaan ti tulbec ni David, ti manglucat, ket awan ti macapunit, ken ti mangpunit ket awan ti macalucat:

⁸ Siac ammoc dagiti ar-aramidmo: (adtoy, incabilco iti sangoanam ti maysa a ruangan a silulucat, isu nga awan ti macairikepto; ta adda bassit a pannacabalinmo, ket sinalimetmetam ti saoc, ket dica naglibacan ti naganco.

⁹ Adtoy, siac itdec manipud iti sinagoga ni Satanas, dagidiay mangnagan iti bagida Judio, ket saan met no di ket agulbodda: Adtoy, aramidecto nga umayda ken agrucbabda cadagiti sacsacam, ket maammoanda a dinungdongngoca.

¹⁰ Gapu ta sinalimetmetam ti saoc a kinaanos, siac igagacanto met iti horas ti pannacasuut isu nga umayto iti isu-amin a lubong a natao-an, tapno masuut dagiti agnaed iti rabaw ti daga.

¹¹ Siac umayac iti madaras; salimetmetam a sititibker ti adda kenca, tapno awan ti mangala iti balangatmo.

¹² Daydiay agbal-ligi aramidento nga isu ti maysa nga adigi iti templo ti Diosco, ket saanto a rummuaren sadiay; ket isuratconto kencuana ti nagan ti Diosco, ken ti nagan ti ciudad ti Diosco, ti baro a Jerusalem, isu a bumaba manipud langit, nga aggapu iti Diosco: ket isuratconto met kencuana ti baro a naganco.

¹³ Ti adda pagdengngegna denggenna coma ti cuna ti Espiritu cadagiti Iglesia.

Maicapito a surat: iti Iglesia sadi Laodicea.

¹⁴ Ket isuratmo iti angel ti Iglesia sadi Laodicea: Dagitoy a banbanag cuna ni Amen, ti mamanecnec a matalec ken napudno, ti poon ti pinarsua ti Dios:

¹⁵ Siac ammoc dagiti ar-aramidmo, a saanca a nalamiis ket saanca met a napudot. Siac cayatco coma a nalamiisca wenno napudotca.

¹⁶ Iti casta, gapu ta napatay ti lamiismo ket saanca a napudot ket saanca met a nalamiis, itupracanto iti ngiwatco.

¹⁷ Agsipud ta cunam: Siac nabacnangac ket nagunodacon ti kinabacnang, ket awan ti pacasapulac iti aniaman; ket dica ammo a sica ti dacsan-gasat ken marigrigat, ken napanglaw, ken bulsec ken lamolamo:

¹⁸ Ibalacadco kenca a gumatangca caniac iti balitoc a napasudi iti apuy, tapno bumacnangca coma; ken dagiti pagananay a puraw, tapno agcawesca, ket saan a maiparang ti nacababain a kinalamolamom; ken ti agas ti mata, tapno sapsapoam dagiti matam tapno macakitaca.

¹⁹ Cadagiti isu-amin a dungdungngoec siac babalawec ken gugurac ida; aggagetca ngarud ket agbabawica.

²⁰ Adtoy, siac addaac nga agtactacder iti ruangan, ket agtugtugac; no adda dumngegto iti timecco ket luctannanto ti ruangan, sumrecacto kencuana, ket makipanganacto kencuana, ket isu, caniac.

²¹ Daydiay agbal-ligi, ipaayconto kencuana, a makicatugaw caniac iti tronoc a casmet caniac a nagballigiac ket nakicatugawac ken Amac idiay tronona.

²² Ti adda pagdengngegna, denggenna coma ti cuna ti Espiritu cadagiti Iglesia.