Paltiing 22 - Ti Biblia (1973)

Ti carayan ken ti cayo ti biag.

¹ Ket impakitana caniac ti maysa a carayan ti danum ti biag, a sumilsilap a cas iti sarming a rummuar iti trono ti Dios ken iti Cordero, ket agayus.

² Iti tengnga ti calzada sadiay, ket iti agsumbangir nga igid daydi carayan, adda daydi cayo ti biag, nga adda sangapulo ket dua a kita ti bungana, nga agbunga iti binulan; ket dagiti bulbulong daydi cayo maipaayda iti pannacaagas dagiti pagpagarian.

³ Ket awanton ti lunod ket ti trono ti Dios ken ti Cordero addadanto kencuana, ket dagiti adipenna agservidanto kencuana;

⁴ Ket makitadanto ti rupana, ket ti naganna addanto cadagiti mugmugingda.

⁵ Ket awanton ti rabii; ket dida masapul ti lawag ti pagsilawan, wenno ti lawag ti init: ta ni Apo Dios lawaganna ida: ket agaridanto iti awan inggana.

Dagiti bilbilin ken camaudianan a carcari.

⁶ Ket kinunana caniac: Dagitoy a sasao papatien ken napudnoda: ket ti Apo, daydi Dios dagiti espiritu dagiti mammadto, imbaonna daydi angelna, tapno ipakitana cadagiti ad-adipenna dagiti banbanag a maipapilit a mapasamac iti mabiit.

⁷ Adtoy, siac umayac iti madaras. Nagasat daydiay mangsalimetmet cadagiti sasao ti padto daytoy a pagbasaan.

⁸ Ket siac ni Juan a nacangngeg ken nacakita cadagitoy a banag. Ket idi nangngegco ken nakitac, nagrucnoyac tapno agdaydayawac iti sangoanan dagiti sacsaca daydi angel a nangipakita caniac cadagitoy a banbanag.

⁹ Ket isu kinunana caniac: Bay-am, dica aramiden dayta; siac adipenac a caduam ken cadua dagiti cacabsatmo a mammadto, ken dagiti mangsalimetmet cadagiti sasao daytoy a pagbasaan. Agdaydayawca iti Dios.

¹⁰ Ket kinunana caniac: Saanmo a selloan dagiti sasao ti padto daytoy a pagbasaan: ta ti aldaw asidegen.

¹¹ Ti nakil-lo agaramid laeng iti kinakil-lo; ket ti narugit, narugit laeng; ket ti nalinteg, nalinlinteg pay coma; ket ti santo nasansanto pay coma.

¹² Adtoy, siac umayac a dagus; ket ti panggongona adda caniac, tapno gongonaac ti tunggal maysa cas mayannatup iti aramidna.

¹³ Siac ti Alpha ken ti Omega, ti umuna ken ti camaudianan ti pangrugian ken ti pagpatinggaan.

¹⁴ Nagasat dagidiay mangdalus cadagiti pagananayda, tapno adda calinteganda nga aglac-am iti cayo ti biag, ken tapno mabalinda ti sumrec cadagiti ruruangan ti ciudad.

¹⁵ Idiay ruar addada dagiti asaso, ken dagiti managanito, ken dagiti mannakicamalala, ken dagiti nacapapatay, ken dagiti agrucbab cadagiti didiosen, ken tunggal maysa nga agayat ken agaramid iti ulbod.

¹⁶ Siac ni Jesus imbaonco ti angelco tapno sacsianna cadacayo dagitoy a banbanag cadagiti Iglesia. Siac ti capuonan ken ti caputotan ni David, siac ti naraniag, siac ti baggac.

¹⁷ Ket daydi Espiritu ken daydi novia cunada: Umayca! ket ti dumngeg, cunaenna coma: Umayca! Ket ti mawaw, umay coma. Ket ti mayat, awatenna ti danum ti biag, nga awan baybayadna.

¹⁸ Siac sacsiac iti tunggal maysa a dumngeg cadagiti sasao ti padto daytoy a pagbasaan: No addanto mangnayon cadacuada, ti Dios inayonnanto kencuana dagiti pannaplit a naisurat itoy a pagbasaan.

¹⁹ Ket no addanto mangkissay cadagiti sasao ti pagbasaan daytoy a padto, ti Dios iccatennanto ti pannacabagina iti cayo ti biag, ken idiay nasantoan a ciudad, ken cadagiti banbanag a naisurat itoy a pagbasaan.

²⁰ Ti mangsacsi cadagitoy a banbanag, cunana: Wen siac umayac a dagus. Amen! Umayca, Apo Jesus!

²¹ Ti parabur ni Apo Jesus agtaeng coma cadagiti amin a sasanto! Amen.