Paltiing 21 - Ti Biblia (1973)

Ti baro a langit ken ti baro a daga.

¹ Ket nakitac ti maysa a langit a baro ken maysa a daga a baro; ta daydi immuna a langit ken daydi immuna a daga napalabasdan, ket ti baybay awanen.

² Ket nakitac ti santo a ciudad ti baro a Jerusalem, a bimmaba, manipud langit nga aggapu iti Dios, a naisagana a cas la maysa a novia a naarcosan a maipaay iti noviona.

³ Ket nangngegco ti maysa a dackel a timec a naggapu iti trono nga agcuncuna: Adtoy ti tabernaculo ti Dios adda cadagiti tattao, ket isu makipagnaedto cadacuada, ket isudanto dagiti tattaona, ket ti Dios met laeng addanto cadacuada, a Dios da:

⁴ Ket punasennanto ti amin a lulua cadagiti matada; ket awanton ni patay; ket awanto met-ten ti sasaibbec, wenno sangsangit, wenno rigrigat; ta dagidi immuna a banbanag napalabasdan.

⁵ Ket daydi situtugaw idi trono kinunana: Adtoy pagbalinec a babbaro dagiti isu-amin a banbanag. Ket kinunana: Isuratmo: ta dagitoy a sasao papatien ken napudnoda.

⁶ Ket kinunana caniac: Nalpasdan. Siac ti Alfa ken Omega, ti pangrugian ken panungpalan. Iti mawaw Siac painumecto daydiay mawaw iti ubbog ti danum ti biag, nga awan baybayadna.

⁷ Ti agbal-liginto, tawidennanto dagitoy a banbanag ket siacto ti Diosna, ket isunto ti anacco.

⁸ Ngem no maipapan cadagiti natacrut, ken cadagiti di mammati, ken dagiti nasabrac, ken dagiti nacapapatay, ken dagiti mannakicamalala, ken dagiti managanito, ken dagiti agrucbab cadagiti didiosen, ken dagiti isu-amin nga agululbod ti bingayda addanto idiay danaw a sumsumged ti apuy ken azufre: daytoy ti ipapatay a maicadua.

Ti baro a Jerusalem.

⁹ Ket maysa cadagiti pito nga angel nga addaanda cadagiti pito a malocong a napnoda cadagiti pito a camaudianan a pannaplit; immay ket nakisao caniac, a cuncunana: Umayca ditoy; ipakitacto kenca ti novia, ti asawa ti Cordero.

¹⁰ Ket impannac babaen ti Espiritu iti maysa a bantay a dackel ken natayag, ket impakitana caniac ti nasantoan a ciudad ti Jerusalem, a bimmaba nanipud langit a naggapu iti Dios.

¹¹ Isu nga addaan ti dayag ti Dios: ti raniagna umas-asping iti maysa a bato a napateg unay, cas bato a jaspe, aganinaw a cas la cristal:

¹² Adda maysa a bacudna a dackel ken natayag, adda sangapulo ket dua a ruanganna, ket cadagiti ruangan adda sangapulo ket dua nga angel; ket adda nagnagan a naisurat cadagiti mangan, nga isuda dagiti nagnagan dagiti sangapulo ket dua a capututan ti Israel:

¹³ Iti daya adda idi dagiti tal-lo a ruangan; iti amianan, tal-lo a ruangan iti abagatan, tal-lo a ruangan, ket iti laud, tal-lo a ruangan.

¹⁴ Ket daydi bacud ti ciudad adda sangapulo ket dua a pamunganayanna ket cadacuada adda dagiti nagnagan dagiti sangapulo ket dua nga apostol ti Cordero.

¹⁵ Ket daydi makisasao caniac, adda maysa a pagrucudna a balitoc, tapno rucudenna ti ciudad ken dagiti ruanganna, ken ti bacudna.

¹⁶ Ket daydi ciudad nagcuadrado, ket ti rucud ti caatiddugna castamet ti caacabana: ket rinucudna idi pagrucudna daydi ciudad, sangapulo ket dua ribo nga estadio. Ti caatiddug ken caacaba ken ti cangato agpapadada.

¹⁷ Ket rinucudna daydi bacudna, ket sangagasut uppat a pulo ket uppat a casico, cas panagrucud ti maysa a tao, isu ti panagrucud daydi angel.

¹⁸ Ket daydi naaramat iti bacudna jaspe; ket daydi ciudad balitoc a pulpulos a cas iti pulpulos a sarming.

¹⁹ Dagidi pamunganayan daydi bacud ti ciudad naarcosanda iti amin a kita dagiti batbato a napateg. Daydi umuna a pamunganayan jaspe; daydi maicadua, zafiro; daydi maicatlo, calcedona; daydi maicapat, esmeralda.

²⁰ Daydi maicalima, sardonica; daydi maicanem sardio; daydi maicapito, crisolito; daydi maicawalo, berilo; daydi maicasiam, topacio; daydi maicasangapulo, crisoprasio; daydi maicasangapulo ket maysa, jacinto; ti maicasangapulo ket dua, amatista.

²¹ Ket dagidi sangapulo ket dua a ruangan perlasda: tunggal maysa cadagiti ruangan maymaysa a perlas ket ti calzada daydi ciudad balitoc a pulpulos, nga aganinaw a cas la cristal.

²² Ket awan ti nakitac a templo kencuana; ta ni Apo Dios, a Mannacabalin-amin, ken daydi Cordero isuda ti templona.

²³ Ket ti ciudad awan ti pacasapulanna iti init wenno iti bulan, tapno silnaganda: ta ti dayag ti Dios isu ti nanglawag kencuana, ket ti pagsilawanna isu ti Cordero.

²⁴ Ket dagiti pagpagarian magmagnadanto iti lawagna; ket dagiti ar-ari ti daga yegda kencuana ti dayagda.

²⁵ Ket dagiti ruanganna saandanto a maripcan uray caano iti aldaw (ta awanto ti rabii sadiay:)

²⁶ Ket yegdanto kencuana ti dayag ken ti dayaw dagiti pagpagarian:

²⁷ Ket saanto a sumrec kencuana uray caano ti aniaman a narugit, wenno uray siasino nga agaramid ti macarimon wenno ulbod; no di laeng dagidiay adda a naisurat iti pagbasaan ti biag a cucua ti Cordero.