Paltiing 20 - Ti Biblia (1973)

Ti panungpalan a pannacaocom.

¹ Ket nakitac ti maysa nga angel a bumaba nanipud langit, nga adda kencuana daydi tulbec ti mangliwengliweng nga abut ken ti maysa a dackel a cawar, iti imana.

² Ket tiniliwna daydi dragon, daydi uleg a cadaanan, nga isu ti Diablo ken Satanas, ket pinarautanna iti bayat ti sangaribo a tawen.

³ Ket isu ingarangogongna iti abut a mangliwengliweng, ket inrikepanna ken sinelloanna ti rabawna, tapno dina allilawenen dagiti pagpagarian agingga iti maturpos dagiti sangaribo a tawen; ket inton maturpos daytoy, masapul a maluc-atan iti bassit a canito.

⁴ Ket nakitac dagiti trono; ken dagiti nagtugaw cadacuada; ket naitalec cadacuada ti panangocom ket dagiti carcararua dagiti naputulan gapu iti pammanecnec ken Jesus ken gapu iti sao ti Dios, ken dagup dagiti saan a nagdaydayaw idi animal ken iti ladawanna ken saan a mamarcaan cadagiti mugmugingda ken iti imada; ket dagitoy nagbiagda, ket nakipagarida ken Cristo iti sangaribo a tawen.

⁵ Dagiti sabsabali cadagiti natay saanda a napagbiag, agingga iti di maturpos dagiti sangaribo a tawen. Daytoy isu ti umuna a panagungar.

⁶ Nagasat ken santo ti mairaman iti panagungar nga umuna: cadacuada awan pannacabalin ti maicadua nga ipapatay; no di ket isudanto dagiti papadi ti Dios ken ni Cristo, ket makipagaridanto kencuana bayat ti sangaribo a tawen.

Ni Satanas mawarwaran iti cawar ket maabac iti gubat.

⁷ Ket no maturpos dagiti sangaribo a tawen, ni Satanas maluc-atanto iti nacabaludanna.

⁸ Ket rummuarto tapno allilawenna dagiti pagpagarian nga adda cadagiti uppat a suli ti daga, da Gog ken Magog, tapno urnongenna ida a maipaay iti gubat: ti bilangda cas cadagiti darat ti baybay.

⁹ Ket nagwarasda iti naglawaan ti daga, ket linawlawda daydi campamento dagiti sasanto iti aglicmut, ken ti ciudad nga ay-ayaten; ket bimmaba ti apuy sadi langit, ket inalun-unna ida.

¹⁰ Ket daydi diablo a nangallilaw cadacuada naibelleng idi danaw nga apuy ken azufre, isu met a yan daydi animal ken daydi saan a pudno a mammadto; ket matutuocdanto iti aldaw ken rabii iti awan inggana.

Ti pannacaocom a panungpalan.

¹¹ Ket nakitac ti maysa a dackel a trono a puraw, ken daydi nagtugaw kencuana, nga iti sangoananna nagtalaw ti daga ken langit; ket saan a nasaracan ti dissoda.

¹² Ket nakitac dagiti natay, babassit ken dadackel, a nagtatacder iti sangoanan di trono; ket nabistrad dagiti pagbasaan; nabistrad met ti sabali a pagbasaan, nga isu ti pagbasaan ti biag, ket dagiti natay naocomda cadagiti banbanag a naisurat cadagiti pagbasaan cas mayannurot cadagiti aramidda.

¹³ Ket ti baybay inyawatna dagiti natay nga addada kencuana, ket ni patay ken ti Hades inyawatda dagiti natay nga adda idi cadacuada: ket naocomda tunggal maysa cas mayannurot cadagiti aramidna.

¹⁴ Ket ni patay ken ti Hades naitappuacda idi danaw nga apuy: daytoy ti maicadua nga ipapatay, ti danaw nga apuy.

¹⁵ Ket no ti siasinoman saan a nasaracan a naisurat iti pagbasaan ti biag, naitappuac idiay danaw nga apuy.