Paltiing 2 - Ti Biblia (1973)

Sursurat cadagiti pito nga Iglesia ti Asia.—Ti umuna a surat: iti Iglesia sadi Efeso.

¹ Isuratmo iti angel ti Iglesia sadi Efeso: Dagitoy a banbanag cuna ti agig-iggem cadagiti pito a bituen iti macanawanna, ken magna iti tengnga dagiti pito a pagsilawan a nabalitocan:

² Siac ammoc dagiti aramidmo, ken ti panagbannogmo ken ti anusmo; ken ti dica pannacaibtor cadagiti dakes a tattao, ket sinuutmo dagiti mangnagnagan cadagiti bagbagida nga apostol, ket saanda met nga apostol ket nasaracam ida a naulbod;

³ Ket naganusca ken nagituredca gapu iti naganco ket saanca a nagbannog.

⁴ Ngem adda bassit busurec kenca, ta pinanawam daydi immuna nga ayatmo.

⁵ Lagipem ngarud, no sadino ti nacatnagam, ket agbabawica, ket aramidem dagiti immuna nga aramidmo; ta no saan, umayacto kenca, ket iccatecto ti pagsilawam iti yanna, malacsid no agbabawica.

⁶ Ngem adda kenca daytoy, a guraem dagiti ar-aramid dagiti Nicolaitas isuda a cagurac met,

⁷ Ti adda pagdengngegna, denggenna coma ti cuna ti Espiritu cadagiti Iglesia. Daydiay agbal-ligi isu ti pacanecto iti cayo ti biag, nga adda iti Paraiso ti Dios.

Maicadua a surat: iti Iglesia sadi Smirna.

⁸ Ket isuratmo iti angel ti Iglesia ti Smirna: Dagitoy a banbanag cuna ti umuna ken ti camaudianan, daydi natay, ket nagbiag manen:

⁹ Siac ammoc ti rigatmo ken ti kinapanglawmo (ngem nabacnangca), ket ammoc ti kinasalawasaw dagiti agcuna nga Judioda, ngem saan met, no di ket isuda ti maysa a sinagoga ni Satanas.

¹⁰ Dica cabuteng dagiti banbanag nga inca lac-amen: Adtoy, ti diablo mapanna ipisoc iti pagbaludan dagiti dadduma cadacayo, tapno masuutcayo; ket addanto rigatyo bayat ti sangapulo nga aldaw. Agtalgedca agingga ken patay, ket itdecto kenca ti balangat ti biag.

¹¹ Ti adda pagdengngegna, denggenna coma ti cuna ti Espiritu cadagiti Iglesia. Ti agbal-liginto, saanto a maranggasan iti ipapatay a maicadua.

Maicatlo a surat: iti Iglesia sadi Pergamo.

¹² Ket isuratmo iti angel ti Iglesia sadi Pergamo: Dagitoy a banbanag cuna ti agig-iggem iti natarumamis a campilan a dua ti tademna:

¹³ Siac ammoc no sadino ti pagnaedam, iti yan ti trono ni Satanas; ket taginayonem ti naganco, ket saanmo a naglicudan ti pammatic; uray cadagidi aldaw ni Antipas, daydi matalec a sacsic napapatay iti tengngayo, a pagbalayan ni Satanas.

¹⁴ Ngem adda sumagmamano a banag a cagurac kenca, agsipud ta pagnaedem dita dagiti mangsalimetmet iti sursuro ni Balaam, isu a nangisuro ken Balac a mangicabil iti pacaitibcolan iti sangoanan dagiti annac ti Israel, a manganda iti maidaton cadagiti didiosen, ken makicamalalada.

¹⁵ Casti caadda met kenca dagiti dadduma a mangsalimetmet, iti sursuro dagiti Nicolaitas:

¹⁶ Agbabawica ngarud; ta no saan, umayacto kenca iti madaras, ket gubatecto ida iti campilan iti ngiwatco.

¹⁷ Ti adda pagdengngegna, denggenna coma ti cuna ti Espiritu cadagiti Iglesia. Daydiay agbal-ligi, isu ti pangtedacto iti mana a nailemmeng. Ket itdecto kencuana ti maysa a bato a puraw, ket maibutac iti bato ti maysa a nagan a baro, nga awan ti macaammo uray siasino, no di laeng daydiay umawat kencuana.

Maicapat a surat: iti Iglesia sadi Tiatira.

¹⁸ Ket isuratmo iti angel ti Iglesia sadi Tiatira: Dagitoy a banbanag cuna ti Anac ti Dios, isu nga adda matana a cas la darang ti apuy, ket dagiti sacsacana cas la bronce a napasileng:

¹⁹ Siac ammoc dagiti ar-aramidmo, ken ti ayatmo, ken ti pammatim, ken ti panagservim, ken ti kinaanusmo; ket ammoc a dagiti ar-aramidmo a naud-udi adaduda ngem dagidi immun-una.

²⁰ Ngem adda cagurac kenca, ta ipalubosmo ita babai a Jezabel, a nagnaganenna ti bagina mammadto ket mangisursuro ken manggargari cadagiti adipenco a makicamalala ken manganda iti maidaton cadagiti didiosen.

²¹ Ket impaayco kencuana ti tiempo tapno agbabawi coma, ngem dina cayat ti agbabawi iti pannakicamcamalalana.

²² Adtoy, ta innac ipisoc iti maysa a pagiddaan, ken dagiti makiabig kencuana, a maipaay iti dackel a rigat, malacsid no agbabawida cadagiti ar-aramidda.

²³ Ket patayecto dagiti annacna iti angol, ket amin nga Iglesia maammoandanto a siac mangsukimat cadagiti nalimed a panggep ken cadagiti puspuso; ket itedconto iti tunggal maysa cadacayo cas mayannatup cadagiti ar-aramidyo.

²⁴ Ngem cunac cadacayo, ken cadagiti sabsabali idiay Tiatira, dagup dagidiay awanan itoy a sursuro, a dida naammoan dagiti banbanag a nauneg ni Satanas cas naganenda. Diac ipabaclay cadacayo ti sabali nga awit.

²⁵ Nupay casta ti adda cadacayo salimetmetanyo a naimbag, agingga iti umayac.

²⁶ Ket ti agbal-ligi ken mangsalimetmet cadagiti aramidco agingga iti panungpalan, itdecto kencuana iti panagturay cadagiti pagpagarian:

²⁷ Ket iturayannanto ida iti maysa a sarucod a landoc; marumrumecdanto; a cas la caramba ti agdamdamili, a cas caniac inawatco met ken Amac:

²⁸ Ket itdecto kencuana ti baggac.

²⁹ Ti adda pagdengngegna, denggenna coma ti cuna ti Espiritu cadagiti Iglesia.