Paltiing 19 - Ti Biblia (1973)

Rag-o ken daydayaw sadi langit.

¹ Calpasan dagitoy, nangngegco ti maysa a dackel a timec a cas la ariwawa ti umariwecwec sadi langit a cuncunana: Aleluya Ti pacaisalacanan ken ti dayag ken ti pannacabalin cucua ti Diostayo:

² Ta napudno ken nalinteg dagiti panangipatona; ta isu inocomna daydi dackel a balangcantis, isu a nangparugit iti daga babaen ti pannakicamcamalalana: ket cadagiti im-ima di babai naibales ti dara dagiti adipenna.

³ Ket kinunada iti maicadua: Aleluya. Ket daydi asucna agpangato iti agnanayon.

⁴ Ket dagiti duapulo ket uppat a lallacay ken dagiti uppat a parsua a sibibiag, nagrucbabda ket nagdaydayawda iti Dios, nga adda a nagtugaw iti trono, a cuncunada: Amen; Aleluya.

⁵ Ket manipud iti trono rimmuar ti maysa a timec, a cuncunana: Dayawenyo ti Diostayo, dacayo amin nga ad-adipenna dacayo nga agbuteng kencuana babassit ken dadackel.

⁶ Ket nangegco ti ariwawa ti cas la umariwecwec, ken cas la ungor dagiti adu a dandanum ken ti cas la uni ti napigsa a gurgurood, a cuncunada: Aleluya; ta agari ni Apo Dios, a Mannacabalin-amin.

⁷ Agragrag-otayo, ket agvivatayo, ket agdaydayawto kencuana ta dimteng ti panagboda ti Cordero, ket ti asawaenna nacasaganan.

⁸ Ket naipaay kencuana ti panagcawesna iti lupot a nalapat ken puraw, nasileng ken natarnaw: ta ti lupot a nalapat a puraw isu dagiti aramid a nalinteg dagiti sasanto.

⁹ Ket isu kinunana caniac: Agsuratca: Nagasat dagidiay naawis iti pangrabi-i a pagbodaan ti Cordero. Ket kinunana caniac: Dagitoy napudnoda a sao ti Dios.

¹⁰ Ket nagrucnoyac cadagiti sacsacana tapno agdaydayawac kencuana. Ket isu kinunana caniac: Kitaem, dica aramiden dayta. Siac ti adipen a caduam ken cadua dagiti cacabsatmo, a mangsalimetmet iti pammanecnec ken Jesus. Agdaydayawca iti Dios ta ti pammanecnec ken Jesus isu ti espiritu ti pammadto.

Panagbal-ligi ni Cristo idi animal ken saan a pudno a mammadto.

¹¹ Ket nakitac ti langit a silulucat; ket adtoy ti maysa a cabayo a puraw, ket daydi nagsacay kencuana, managan idi ti Matalec ken Napudno; ket maipuon iti kinalinteg mangocom ken agaramid iti gubat.

¹² Ket dagiti matana cas la darang ti apuy, ket iti olona adda adu a balbalangat; ket adda maysa a naganna a naisurat nga awan ti nacaammo no di isu met laeng,

¹³ Ket nagcawes iti maysa a pagananay a naparparsiacan iti dara; ket ti naganna isu ti VERBO TI DIOS.

¹⁴ Ket dagiti buybuyot sadi langit sumursurotda kencuana, a nagsacayda cadagiti cacabayo a puraw, nagcawesda ti lupot a nalapat, puraw ken natarnaw.

¹⁵ Ket iti ngiwatna rummuar ti maysa a campilan a natadem, tapno pangdunorna cadagiti pagpagarian, ket iturayanna ida babaen ti maysa a sarucod a landoc; ket isu payatenna ti pagpespesan ti kinaunget ti pungtot ti Dios a Mannacabalin-amin.

¹⁶ Ket iti cawesna ken idi rabaw di luppona adda a naisurat daytoy a nagan: ARI DAGITI AR-ARI, KEN APO DAGITI AP-APPO.

¹⁷ Ket nakitac ti maysa nga angel nga agtatacder iti init, isu a pimmuccaw babaen ti dackel a timec, a cuncunana cadagiti isu-amin a tumatayab nga agtaytayab iti nagtangatangan: Umaycayo aguunnongcayo iti dackel a pangrabiian ti Dios;

¹⁸ Tapno canenyo ti lasag dagiti ar-ari, ken ti lasag dagiti cacapitan ken ti lasag dagiti mannacabalin a lallaki, ken ti lasag dagiti cacabayo ken dagiti nagsacay cadacuada, ken ti lasag dagiti isu-amin a tattao, agwayawayada man wenno paad-adipen, babassit ken dadackel.

Ti Verbo ti Dios.

¹⁹ Ket nakitac daydi animal, ken dagiti ar-ari ti daga ken dagiti buybuyotda, a naurnongda tapno gubatenda daydiay nagsacay idi cabayo, ken daydi buybuyotna.

²⁰ Ket natiliw daydi animal, ket nairaman kencuana daydi saan a pudno a mammadto a nagar-aramid cadagiti datdatlag iti sangoananna, isuda a pinangalallilawna cadagiti immawat iti marca daydi animal, ken dagidi nagrucrucbab iti ladawanna. Dagitoy dua naitappuacda a sibibiag idi danaw ti apuy a dumardarang nga addaan azufrena:

²¹ Ket dagidi dadduma napapatayda babaen ti campilan daydi nagsacay idi cabayo, daydi campilan a rummuar idi ngiwatna: ket isu-amin dagiti tumatayab nagbussogda cadagiti laslasagda.