Paltiing 16 - Ti Biblia (1973)

Dagiti pito a malocong a napno iti pungtot.

¹ Ket nangngegco ti maysa a dackel a timec a naggapu iti templo a cuncunana cadagidi pito nga angel: Incayo ket ibuyatyo dagiti pito a malocong ti pungtot ti Dios iti rabaw ti daga.

² Ket rimmuar daydi umuna, ken imbuyatna daydi malocongna iti daga; ket nagbalin a derder a nacaar-ariec ken nasaem cadagidi tattao nga addaan iti marca daydi animal, ken nagrucbab idi ladawanna.

³ Ket daydi maicadua imbuyatna daydi malocongna iti baybay, isu a nagbalin a dara a cas la dara ti maysa a natay; ket isu-amin a cararua a sibibiag natay uray pay dagiti adda iti baybay.

⁴ Ket daydi maicatlo imbuyatna daydi malocongna cadagiti carcarayan ken ub-ubbog ti danum, ket nagbalinda a dara.

⁵ Ket nangngegco daydi angel dagiti danum a cuncunana: Sica nalintegca, O Santo nga addaca, ita ket addaca idi, agsipud ta nangipatoca a castoy.

⁶ Gapu ta imbuyatda ti dara dagiti sasanto ken dagiti mammadto, ket sica impainummo met cadacuada ti dara: caicarianda.

⁷ Ket nangngegco ti timec a naggapu idi altar a cuncunana: Wen, O Apo Dios a Mannacabalin-amin, dagiti panangipatom isuda dagiti napudno ken nalinteg.

⁸ Ket ti maicapat imbuyatna daydi malocongna idi init; ket naipalubos kencuana ti panangkesset cadagiti tattao iti apuy.

⁹ Ket dagidi tattao nacsetda iti napalalo a pudot, ket tinabbaawanda ti nagan ti Dios, isu nga adda pannacabalinna cadagitoy a pannaplit: ket saanda a nagbabawi tapno agdayawda coma kencuana.

¹⁰ Ket daydi maicalima imbuyatna daydi malocongna idi trono daydi animal: ket daydi pagarianna nagsipnget; ket nagngaretngetanda dagidi dildilada gapu iti rigatda.

¹¹ Ket tinabbaawanda ti Dios ti langit, gapu cadagiti rigrigatda ken dagiti derderda; ket saanda a nagbabawian dagidi ar-aramidda.

¹² Ket daydi maicanem imbuyatna daydi malocongna idi dackel a carayan nga Eufrates ket nagmaga daydi danumna, tapno maisagana coma ti dalan dagiti ar-ari nga aggapu iti leleggacan ti init.

¹³ Ket nakitac a rumrummuar idi ngiwat daydi dragon, ken idi ngiwat daydi animal ken idi ngiwat daydi saan a pudno a mammadto dagiti tal-lo nga espiritu a narugit, a cas da la tucac:

¹⁴ Ta isuda dagiti espiritu dagiti demonio, nga agar-aramid cadagiti datdatlag; isuda a mapan cadagiti ar-ari ti amin a lubong tapno urnungenda ida a maisagana iti gubat ti dackel nga aldaw ti Dios a Mannacabalin-amin.

¹⁵ (Adtoy, siac umayac a cas la mannanacaw. Nagasat daydiay agsalucag ket aywananna dagiti pagan-anayna; di la ket magna a silalamolamo, ket makitada ti ibainna.)

¹⁶ Ket inurnongda ida amin idiay disso nga iti Hebreo managan Armagedon.

¹⁷ Ket daydi maicapito imbuyatna daydi malocongna iti angin; ket rimmuar ti maysa a dackel a timec idi templo manipud idi trono a cuncunana: Naaramiden!

¹⁸ Ket adda kimkimat idi ken ririaw ken gurgurrood; ket immay ti maysa a dackel a gingined, nga awan capadana nanipud idi adda tattao iti rabaw ti daga, maysa a gingined a nagdackel, casta unay a nagbileg.

¹⁹ Ket ti dackel a ciudad nasayyasayya iti tal-lo a paset, ket dagiti ciudad cadagiti pagpagarian narbada ket ti dackel a Babilonia naipalagip iti sangoanan ti Dios, tapno maited kencuana idi ti copa ti arac ti kinaunget ti pungtotna.

²⁰ Ket napucaw ti amin a puro, ket dagiti banbantay saanda a nasaracan.

²¹ Ket nagtinnag cadagiti tattao manipud langit dagiti dadackel nga uraro a cas ti cadagsen ti maysa a talento: ket dagiti tattao tinabbaawanda ti Dios gapu iti pannaplit nga uraro; ta daydi a pannaplitna a dackel unay.