Paltiing 15 - Ti Biblia (1973)

Dagiti pito nga angel ken dagiti pito a rigat.

¹ Ket nakitac ti sabali a pagilasinan sadi langit, dackel ken nacascasdaaw; dagiti pito nga angel nga addaan cadagiti pito a camaudianan a pannaplit; ta cadacuada manungpal ti pungtot ti Dios.

² Ket nacakitaac iti maysa a cas la baybay a sarming a nalaocan ti apuy; ket dagidiay nagbal-ligi iti daydi animal ken ti ladawanna, ken ti bilang ti naganna, agtatacderda iti igid daydi baybay a sarming nga addaanda cadagiti arpa ti Dios.

³ Ket cancantaenda daydi canta ni Moises, nga adipen ti Dios, ken ti canta ti Cordero, a cuncunada: Dadackel ken nacascasdaawda dagiti ar-aramidmo, O Apo Dios, a Mannacabalin-amin; nalinteg ken napudno dagiti daldalanmo, Sica Ari cadagiti panpannawen.

⁴ Siasino ti di agbutengto kenca, O Apo, ken saan a mangidaydayawto iti naganmo? Ta sicsica laeng ti santo: ta isu-amin dagiti pagpagarian umaydanto ket agdayawdanto iti sangoanam; ta dagiti ar-aramidmo a nalinteg naiparangarangda.

⁵ Ket idi nalpas dagitoy nakitac a naluctan daydi templo ti tabernaculo ti pammanecnec sadi langit:

⁶ Ket rimmuar idi templo dagidi pito nga angel nga addaan cadagiti pito a pannaplit, a nagcawesda cadagiti napateg a batbato a napudaw ken macapurar ket nabaricsan dagiti barucongda cadagiti barikes a balitoc.

⁷ Ket maysa cadagidi uppat a parsua a sibibiag intedna cadagidi pito nga angel dagiti pito a malocong a balitoc, a napno iti pungtot ti Dios, isu nga agbiag iti agnanayon.

⁸ Ket napno daydi templo iti asuc a nagtaud iti dayag ti Dios ken naggapu iti pannacabalinna: ket awan ti nacabalin a simbrec idi templo, agingga iti natungpal dagiti pito a pannaplit dagiti pito nga angel.