Paltiing 14 - Ti Biblia (1973)

Ti Cordero ken dagiti sumurot kencuana.

¹ Ket kimmitaac, ket adtoy ti Cordero agtatacder iti rabaw ti bantay Sion, ket naicuyogda kencuana dagiti sangagasut uppat a pulo ket uppat a ribo, nga addaan iti naganna ken ti nagan ni Amana, a naisurat cadagiti mugmugingda.

² Ket nangngegco ti maysa a timec a naggapu iti langit, a cas la iti daranudor dagiti adu a dandanum, ken cas iti uni ti maysa a dackel a gurruod; ket daydi timec a nangngegco cas la timec dagiti agtoctocar cadagiti arpada.

³ Ket agcancantada ti cas la maysa a canta a baro iti sangoanan ti trono, ken iti sangoanan dagiti uppat a parsua a sibibiag ken dagiti lallacay; ket awan idi ti macabalin a mangadal idi a canta, no di laeng dagidi sangagasut uppat a pulo ket uppat a ribo, isuda a nasubbut itoy daga.

⁴ Dagitoy dagiti saan a natulawan cadagiti babbai; ta virgenda. Dagitoy dagiti sumursurot iti Cordero uray adino a papananna. Dagitoy nasubbotda cadagiti tattao, a cas da umuna a bungbunga a maipaay iti Dios ken iti Cordero.

⁵ Ket iti ngiwatda saan a nasaracan ti ulbod; ta awan tulawda.

Panangiwarragawag dagiti tal-lo nga angel ti panangocom ti Dios.

⁶ Ket nacakitaac ti sabali nga angel a tumaytayab iti tangatang, nga adda ipacaammona a naimbag a damag nga agnanayon cadagiti agnaed iti rabaw ti daga, ken cadagiti amin a pagpagarian ken capututan, ken pagsasao ken ilili.

⁷ Ket cunana iti dackel a timec: agbutengcay iti Dios ket isu dayawenyo: ta dimteng ti horas ti panangocomna; ket agdaydayawcayo iti nangaramid iti langit ken iti daga, ken iti baybay ken cadagiti ubbog dagiti dandanum.

⁸ Ket ti sabali nga angel, a maicadua, simmaruno a kinuna: Narba, narba ti dackel a Babilonia, isu a nangpainum cadagiti isu-amin a pagpagarian iti arac ti pungtot gapu iti pannakicamalalana.

⁹ Ket sabali nga angel, daydi maicatlo, sinurotna ida a cuncunana iti dackel a timec: No ti asinoman a tao agrucbab iti animal ken iti ladawanna, ket pamarcaan iti mugingna, wenno iti imana.

¹⁰ Isu met uminumto iti arac ti pungtot ti Dios, nga adda a naisagana nga awan aniaman a lalaocna iti copa ti pungtotna; ket matuocto iti apuy ken azufre, iti imatang dagiti santo nga angelna, ken iti imatang ti Cordero:

¹¹ Ket ti asuc ti tutuocda agpangpangato iti agnanayon; ket awan ti panaginanada iti aldaw ken rabii dagiti agrucbab iti animal ken iti ladawanna ken uray siasino nga umawat iti marca ti naganna.

¹² Daytoy ti kinaanus dagiti sasanto, nga salimetmetanda dagiti bilbilin ti Dios, ken ti pammati ken Jesus.

¹³ Ket nangngegco ti maysa a timec a naggapu iti langit nga agcuncuna caniac: Isuratmo: Nagasat dagiti natay a matay iti Apo, manipud ita nga agnanayon: Wen, cuna ti Espiritu; tapno aginanada cadagiti banbannogda, ta dagiti aramidda sumursurotda cadacuada.

Panagparaspas iti uvas.

¹⁴ Ket kimmitaac ket adtoy ti maysa nga ulep a napudaw, ket iti ulep adda a nagtugaw ti maysa nga umas-asping iti anac ti tao, nga adda iti olona ti maysa a balangat a balitoc, ket iti imana maysa a cumpay, a natadem.

¹⁵ Ket sabali nga angel rimmuar iti templo, a pucpuccawanna iti dackel a timec daydi nagtugaw iti ulep: Iserrecmo ta cumpaymo, ket agparaspasca; ta dimteng ti horas a panagani: ta ti anien ti daga natangkenanen.

¹⁶ Ket daydi adda a nagtugaw iti ulep inaramatna daydi cumpayna iti daga: ket ti daga naparaspasan.

¹⁷ Ket sabali nga angel rimmuar iti templo nga adda sadi langit, nga adaan met ti maysa a cumpay a natadem.

¹⁸ Ket sabali nga angel rimmuar iti altar isu nga adda pannacabalinna iti apuy; ket pinuccawanna iti dackel a timec daydi addaan ti cumpay a natadem, a kinunana: Aramatem dayta cumpaymo a natadem, ket purusem dagiti bungbunga ti uvas ti daga, ta dagiti uvasna naluumdan.

¹⁹ Ket daydi angel inaramatna daydi cumpayna itoy daga, ket inurnongna ti apiten nga uvas ti daga; ket impisocna iti pagpespesan, daydi dackel a pagdapilan ti pungtot ti Dios.

²⁰ Ket nabaddebaddec daydi pagpespesan iti ruar ti ciudad ket timbug ti dara idi pagpespesan a nagtenganna dagiti freno dagiti cabayo, iti caatiddug ti sangaribo ket innem a gasut nga estadio.