Paltiing 13 - Ti Biblia (1973)

Ta animal a bimmangcag a naggapu iti taaw.

¹ Ket siac nagtactacderac iti cadaratan iti igid ti baybay. Ket nacakitaac ti maysa nga animal a sumang-at manipud idi baybay, isu nga adda sangapulo a sarana ken pito nga olona, ket iti rabaw dagidi sarsarana, sangapulo a balangat, ket idi rabaw dagidi ol-olona, dagiti nagnagan ti tabbaaw.

² Ket daydi animal a nakitac umas-asping iti maysa a leopardo, ket dagiti sacsacana cas la sacsaca ti oso, ket ti ngiwatna cas la ngiwat ti leon: ket inted daydi dragon kencuana ti pannacabalinna ken ti tronona, ken dackel a kinaturay.

³ Ket nakitac daydi maysa cadagidi ol-olona a cas la nasugatan ti ipatay ket daydi sugatna a macapatay naagasan; ket isu-amin a daga nagsidsiddaawda a simmurot idi animal.

⁴ Ket nagdaydayawda idi dragon gapu ta intedna ti turayna idi animal; ket nagdaydayawda idi animal a cuncunada: Siasino ti pumadpad itoy nga animal? Ket siasino ti macabalin a manggubat kencuana?

⁵ Ket naited kencuana ti maysa a ngiwat nga agsasao cadagiti banbanag a dadackel ken tabtabbaaw; ket naited kencuana ti kinaturayna nga agaramid iti bayat dagiti uppat a pulo ket dua a bulan.

⁶ Ket naglucat daydi ngiwatna tapno tabbaawanna ti Dios, tapno tabbaawanna ti naganna ken ti tabernaculona, ken cadagiti agnaed sadi langit.

⁷ Ket naipalubos kencuana ti pananggubatna cadagiti sasanto, ken mangabac cadacuada: ket naited kencuana ti panagturay iti isu-amin a capututan, ken ili, pagsasao, ken pagpagarian.

⁸ Ket isu-amin dagiti agnaed iti rabaw ti daga pagdaydayawandanto, dagidiay saan a naisurat dagiti nagnaganda iti libro ti biag ti Cordero a napapatay, nanipud idi pannacabangon toy lubong.

⁹ No ti siasinoman a tao adda pagdengngegna, dumngeg coma.

¹⁰ No ti siasinoman a tao mangipaay iti pannacacayaw; mapan iti pannacacayaw; no ti siasinoman a tao macapapatayto iti campilan, masapul nga isu mapapatay iti campilan. Adtoy, ti kinaanus ken ti pammati dagiti sasanto.

Ti animal a timpoar iti daga.

¹¹ Ket nacakitaac, iti sabali nga animal nga immuli manipud iti daga; ket adda dua a sarana a cas la ti maysa a cordero, ket agsasao idi a cas dragon.

¹² Ket aramatenna ti amin a kinaturay daydi immuna nga animal iti sangoananna. Ket ti daga ken dagiti isu-amin nga agnaed kencuana, pagdaydayawenna ida idi immuna nga animal, a ti sugatna nga ipatay, naagasan.

¹³ Ket agar-aramid cadagiti dadackel a datdatlag, nga uray pay pababaenna sadi langit ti apuy nga umay ditoy daga, iti imatang dagiti tattao.

¹⁴ Ket allilawenna dagiti agnaed iti rabaw ti daga, gapu cadagiti pagilasinan a naited kencuana nga aramiden, iti imatang daydi animal, a cuncunana cadagiti agnaed iti rabaw ti daga, a mangaramidda coma iti maysa a ladawan di animal a nasugatan iti campilan, ket nagbiag.

¹⁵ Ket naipalubus kencuana a mangted ti anges iti ladawan daydi animal, tapno daydi ladawan ti animal saan laeng nga agsao coma, no di ket papapatayna dagup dagidi saan nga agrucbab idi ladawan daydi animal.

¹⁶ Ket pamarcaanna dagiti isu-amin, babassit ken dadackel, babacnang ken napanglaw, dagiti siwayawaya ken dagiti paad-adipen, tapno adda marca iti imada a macanawan wenno iti mugingda;

¹⁷ Ket tapno awan coma ti tao a macabalin a gumatang wenno aglaco, no di laeng daydiay addaan marca, daydi nagan ti animal wenno daydi bilang ti naganna.

¹⁸ Adtoy ti kinasirib. Ti addaan pannacaawat, imutectecanna coma ti bilang daydi animal, ta isu ti bilang ti maysa a tao; ket ti bilangna innem a gasut innem a pulo ket innem.