Paltiing 12 - Ti Biblia (1973)

Pannacabuyana iti babai ken iti dragon.

¹ Ket maysa a dackel a pagilasinan nakita idiay langit: Maysa a babai a sicacawes iti init, ket ti bulan iti baba dagiti sacsacana ket iti olona maysa a balangat a sangapulo ket dua a bituen;

² Ket isu, masicog idi, ket agickis iti panagpasicalna, ken agrigrigat nga agpasngay.

³ Ket nakita ti sabali a nacascasdaaw sadi langit; ket adtoy ti maysa a dackel a dragon a nalabaga, nga adda pito nga olona ken sangapulo a sarana, ket iti rabaw dagiti ol-olona, pito a corona.

⁴ Ket ti ipusna guyudenna ti apagcatlo dagiti bitbituen sadi langit ket imbacalna ida iti daga: ket daydi dragon adda iti sangoanan daydi babai a nganngani aganac, tapno alun-unenna daydi anacna inton maipasngay.

⁵ Ket inyanacna ti maysa nga anac a lalaki, a mangiturayto cadagiti isu-amin a pagpagarian babaen ti maysa a sarucod a landoc; ket daydi anacna naitayab agingga iti Dios idiay tronona.

⁶ Ket daydi babai timmaray a nagcamang idiay let-ang, nga ayan ti disso nga insagana kencuana ti Dios, tapno taraonanda idiay cadagiti sangaribo duagasut ket innem a pulo nga aldaw.

⁷ Ket adda gubat idi sadi langit: Ni Miguel ken dagiti angelna nakigubatda idi dragon; ket daydi dragon ken dagiti angelna nakicabilda;

⁸ Ngem dida nangabac, ket di met nasaracan daydi dissoda sadi langit.

⁹ Ket naigarangogong daydi dackel a dragon, daydi uleg a cadaanan nga isu ti managan ti Diablo ken Satanas, isu a mangallilaw iti isu-amin a lubong; naitapuac itoy daga, ket dagidi angelna naitapuacda a naicanunong kencuana.

¹⁰ Ket nangngegco ti maysa a dackel a timec sadi langit, nga cuncunana: Ita immayen ti pannacaisalacan ken ti pannacabalin ken ti pagarian ti Diostayo, ken ti panagturay ni Cristona; ta ti mangidardarum cadagiti cacabsattayo naitapuaken, daydiay mangidardarum cadacuada iti sangoanan ti Diostayo bayat ti aldaw ken rabii.

¹¹ Ket isu inabacda gapu iti dara ti Cordero ken gapu iti sao ti pammanecnecda, ket dida kinailalaan dagiti biagda agingga ken patay.

¹² Gapuna, agragragocayo, O langlangit, ken dacayo nga agnaed cadacuada, Asicayo pay daga ken baybay; ta ti diablo immulog cadacayo, nga addaan dackel a pungtot, nga ammona a bassiten ti tiempona.

¹³ Ket idi nakita daydi dragon a naitappuac itoy daga, kinamatcamatna daydi babai a nangipasngay idi anac a lalaki.

¹⁴ Ket naited idi babai ti dua a payac ti dackel nga aguila, tapno manipud iti sangoanan di uleg tumayab coma nga agpalet-ang, idiay dissona, isu a pacataraonanna bayat ti maysa a pannawen ken panpannawen ken guddua ti maysa a pannawen.

¹⁵ Ket daydi uleg impugsona iti ngiwatna nga impasaruno idi babai, ti danum a cas la maysa a carayan, tapno mayanud coma iti carayan.

¹⁶ Ket ti daga tinulonganna daydi babai, ta ti daga naglucat ti ngiwatna ket sinagepsepna daydi carayan nga impugso ti ngiwat daydi dragon.

¹⁷ Ket nacapungtot daydi dragon idi babai, ket napanna ginubat ti natda iti capuonanna, a mangsalimetmet cadagiti bilbilin ti Dios ken addaanda ti pammanecnec ni Jesus: