Paltiing 11 - Ti Biblia (1973)

Dagiti dua a sacsi agipadtoda.

¹ Ket naited caniac ti maysa a runo, nga umasping iti maysa a sarucod ket kinunada caniac: Tumacderca ket rucudem ti templo ti Dios, ken ti altar, ken dagiti agdaydayaw sadiay.

² Ket ti paraangan iti ruar ti Templo, lacsidem, ket dica rucuden; ta naiteden cadagiti gangannaet ket ipayatdanto ti nasantoan a ciudad cadagiti uppat a pulo ket dua a bulan.

³ Ket itdecto ti palubos cadagiti dua a sacsic, ket agipadtodanto cadagiti sangaribo dua gasut ket innem a pulo nga aldaw, a sipapanesda cadagiti lupot a nakersang.

⁴ Dagitoy isuda dagidi dua a cayo ti olivo ken dagidi dua a pagsilawan, nga actatacderda iti sangoanan ti Apo ti isu-amin a daga.

⁵ Ket no adda manggayagay a mangranggas cadacuada, rummuar ti apuy cadagiti ngiwatda, ket alununenna dagiti cabusorda; ket no adda manggayagay a mangranggas cadacuada, masapul a mapapatay iti castoy.

⁶ Dagitoy adda pannacabalinda a mangrikep iti langit, tapno saan a tumudo iti bayat dagiti aldaw ti panagpadtoda; ket adda pannacabalinda cadagiti dandanum, tapno pagbalinenda ida a dara, ken tapno saplitenda toy daga iti isu-amin a kita ti rigat, uray mano a daras ti cayatda.

⁷ Ket no inton malpasda ti panangsacsidan, ti animal nga umuli nga aggapu iti mangliwengliweng gubatennanto ida, ket abakennanto ida, ket papatayenna ida.

⁸ Ket dagiti bangcayda maiwalangdanto iti dalan ti dackel a ciudad nga iti naespirituan a caipapananna managan ti Sodoma ken Egipto, isu met a nacaicruzan ni Apoda.

⁹ Ket dagiti bangcayda buybuyaen dagiti naggapu cadagiti il-ili ken capututan ken pagsasao ken pagpagarian bayat ti tal-lo nga aldaw ket guddua, ket dida ipalubos a dagiti bangcayda maitanemda.

¹⁰ Ket dagiti agnaed ditoy daga agragragoda maipuon cadacuada ket agrarambacda; ket agsisinnagutda; ta dagiti dua a mammadto pinarigatda dagiti agnaed ditoy daga.

¹¹ Ket idi calpasan dagidi tal-lo nga aldaw ket guddua, daydi anges ti biag, a naggapu iti Dios, simrec cadacuada, ket timmacderda; babaen cadagiti sacsacada; ket nagbutengda iti napalalo dagiti nacakita itoy.

¹² Ket nangngegda ti maysa a dackel a timec, a naggapu sadi langit, a nagcuna cadacuada: Umulicayo ditoy. Ket immulida sadi langit babaen ti ulep, a kitkitaen ida dagidi cabusorda.

¹³ Ket idi nga horas immay ti maysa a dackel a gingined, ket natuang ti apagcapul-lo ti ciudad, ket natayda iti gingined dagiti pito ribo a tattao; ket dagidi natidda, nagbutengda, ket impaayda ti panagdaydayaw iti Dios ti langit.

¹⁴ Daydi naicadua nga Ay! Ay napalabasen ket adtoy ti maicatlo nga ay! ayen! umay daras.

Ti maicapito nga angel pagunienna ti trompeta.

¹⁵ Ket daydi maicapito nga angel nagtangguyob: ket simmaruno dagiti dacdackel a timec idiay langit, ket kinunada: Ti pagarian ti lubong nagbalin a cucua ni Apotayo ken ni Cristona: Ket agoninto nga awan ingana.

¹⁶ Ket dagiti duapulo ket uppat a lallacay nga situtugaw cadagiti tronoda iti sangoanan ti Dios, nagrucnoyda agingga iti baba ket nagdaydayawda iti Dios,

¹⁷ A cuncunada: O Apo Dios a Mannacabalin-amin agiamancam kenca ta addaca ita ket addaca idi, agsipud ta innalam ti dackel a pannacabalinmo ket nagarica.

¹⁸ Ket nacapungtot dagiti pagpagarian, ket dimtengen ti pungtotmo, ken ti aldaw dagiti natay a maipaay iti pannacaocom, ken ti pannacaited ti gonggona cadagiti adipenmo a mammadto ken cadagiti sasanto, ken cadagiti agbuteng iti naganmo, babassit ken dadackel, ken ti panangdadael dagiti mangrebbec iti daga.

¹⁹ Ket naluctan daydi templo ti Dios idiay langit, ket nakita idiay templona ti lacasa daydi tulagna: ken naadda idi kimkimat, ken ririaw, ken gurgurrood, ken maysa a gingined, ken dackel a tudo ti uraro.