Oseas 8 - Ti Biblia (1973)

Ti dusa gapu iti kinadakes ken panagrucbab ti Israel cadagiti didiosen.

¹ Isaadmo ita ngiwatmo ti tangguyob. Umayto a cas aguila a bumusor iti balay ni Jehova, agsipud ta naglabsingda iti tulagco, ken simmalungasingda iti lintegco.

² Umawagdanto caniac Diosco, dacami Israel, bigbigendaca.

³ Ti Israel imbellengna ti imbag: ti cabusor camatennanto.

⁴ Isuda namangonda cadagiti ar-ari ngem saan a gapu caniac: inaramidda dagiti panguloen, ket diac naammoan: cadagiti piracda ken balitocda nagaramidda cadagiti didiosenda, tapno pacapucawanda.

⁵ Imbellengna ti urbonmo a vaca; O Samaria, ti pungtotco mapasged a maibusor cadacuada; casano ti cabayagnanto ti pananggon-udda iti kinadalus?

⁶ Ta naggapu iti Israel met laeng daytoy, isu inaramid ti managaramid, ket saan a ti Dios; wen, maburburacto ti urbon a vaca ti Samaria.

⁷ Gapu ta nagmulada iti angin, ken agapitdanto iti alipugpug: awanandanto cadagiti dawa, ti bulong dinto mangted ti bellaay; no cas mangtedto, isu alun-unento dagiti gangannaet.

⁸ Maalun-un ti Israel; ita addada cadagiti nasnacion a cas maysa nga alicamen a saan a macaay-ayo iti siasinoman.

⁹ Ta isuda simmang-atda idiay Asiria, cas la asno nga atap nga awan ti caduana ti Efraim tinangdananna dagiti caayan-ayat.

¹⁰ Wen, nupay manangdanda cadagiti nasnacion, ngem urnongecto ida; ket mangrugida a mapabassit gapu iti awit ti ari dagiti piprincipe.

¹¹ Agsipud ta pinaadu ti Efraim dagiti al-altar a pagbasolan, adda kencuana al-altar idi tapno pagbasolan.

¹² Insuratco kencuana dagiti sangalacsa a banbanag ti lintegco; ngem maibilangda a cas banag a gangannaet.

¹³ No maipapan cadagiti pannacaidatag dagiti daton caniac, agidatdatonda iti lasag ket canenda met laeng; ngem saan nga awaten ida ni Jehova: ngem malagipnanto ti kinadakesda, ket sucnalannanto dagiti basbasolda; isuda agsublidanto idiay Egipto.

¹⁴ Ta ti Israel nalipatanna ti Namarsua kencuana, ket nangbangon cadagiti palacio; ket ti Juda pinaaduna dagiti ili a nasarikedkedan: ngem siac ipawitconto ti apuy cadagiti il-ilina, ket isu lamutennanto dagiti palacioda.