Oseas 6 - Ti Biblia (1973)

Ti sungbat iti panangtubngar ni Jehova. Ti panangidarum ni Jehova gapu iti di panagtalinaed ken kinadakes ti Efraim, Juda ken Israel.

¹ Umaycayo ket agsublitayo coma ken ni Jehova; ta isu nangpingis, ket agasannatayto; kimmabil, ket bedbedannatayto.

² Calpasan iti dua nga aldaw biagennatayto: iti maicatlo nga aldaw pagungarennatayto, ket agbiagtayto iti sangoananna.

³ Ammoentayo coma ket sumurottayto coma a mangammo ken ni Jehova: ti iruruarna di-bumurong a cas iti bigat; ket isu umayto cadatayo a cas iti tudo, a cas iti maududi a tudo a sibuganna ti daga.

⁴ Ania ti aramidecto kenca, O Efraim? Ania ti aramidecto kenca, O Juda? Ta ti kinaimbagmo mayarig iti ulep iti agsapa, ken cas iti linnaaw a pumanaw a masapa.

⁵ Gapuna tinagaac ida babaen cadagiti mammadto, pinatayco ida cadagiti sasao ti ngiwatco: ket dagiti panangocomco casda lawag nga agparang.

⁶ Ta tarigagayac ti kinaimbag, a saan ket a daton; ken ti panangbigbig iti Dios naimimbag pay ngem dagiti daton a mapuuran.

⁷ Ngem isuda cas ken ni Adam naglabsingda iti tulag: idiay nagaramidda a sigugulib iti maisalungasing caniac.

⁸ Ti Galaad isu ti ili dagiti agar-aramid iti kinadangkes; natulawan iti dara.

⁹ Ken cas cadagiti pangen dagiti mannanacaw sumanebda iti maysa a tao, casta ti gimong dagiti papadi mamapatayda iti dalan nga agturong idiay Sikem; wen nagaramidda iti kinaderrep.

¹⁰ Iti balay ti Israel naimatangac ti nacaarariec: idiay ti pannakicamalala nasaracan iti Efraim, marugitan ti Israel.

¹¹ Castamet, O Juda, adda maysa nga apit a nakedngan a maipaay kenca intono pasubliec ti ilic manipud iti pannacacayaw.