Oseas 4 - Ti Biblia (1973)

Ti pannakisuppiat ni Jehova a maibusor iti kinadakes ti Israel.

¹ Denggenyo ti sao ni Jehova, dacayo nga annac ti Israel; ta ni Jehova makisuppiat cadagiti agtaeng iti daga, ta awan ti kinapudno, uray kinaimbag, uray pannacaammo ti Dios iti daga.

² Awan ti uary ania no di laeng panagsapata a natiri ken panagdadael iti cari; ken panagpapatay, panagtacaw, ken pannakicamalala: rumsuada, ket ti dara maiparucpuc iti dara.

³ Gapuna nga agpanesto ti daga, ket amin dagiti agtaeng kencuana cumapuydanto, agraman cadagiti an-animal ti away ken dagiti tumatayab iti tangatang; wen dagiti ic-ican ti baybay met maiccatdanto.

⁴ Nupay casta awan coma ti tao a makisusic, ket awan met coma ti tao a mangtubngar; ta ti ilim casda la cadagidiay makisupiat iti padi.

⁵ Ket maitibcolcanto iti aldaw, ket ti mammadto met maitibcolto agraman kenca iti rabii; ket ni inam pucawecto.

⁶ Ti ilic madadaelda gapu iti curang ti pannacaammo: agsipud ta sica pinaidmo ti pannacaammo, siac paidencanto met, tapno saancanto a padi caniac: gapu ta linipatam ti linteg ti Diosmo, siac met lipatecto dagiti annacmo.

⁷ Cas iti yaaduda casta ti pannacabasolda caniac; sucatacto ti dayawda iti pannacaibabain.

⁸ Agtaraonda iti basol ti ilic, ket isimpada ti pusoda iti kinadangkesda.

⁹ Ket cas cadagiti tattao, castanto met iti padi; ket dusaecto ida gapu cadagiti cadawyanda, ket subadacto cadacuada dagiti ar-aramidda.

¹⁰ Ket mangandanto, ngem didanto mabsugen; agbalangcantisdanto, ket saandanto nga umadu; agsipud ta sinardenganda nga impangag ni Jehova.

¹¹ Ti pannakicamalala ken arac ken ti baro nga arac ipanawda ti pannacaawat.

¹² Ti ilic makiumanda iti cayo, ket ti sarucodda sumungbat cadacuada; ta ti espiritu ti pannakicamalala pinabiddutna ida, ket nagbalangcantisda, a pimmanaw iti biang ti Diosda.

¹³ Isuda agidatonda iti tapaw dagiti bantay, ket agpuurda iti incienso iti rabaw dagiti turturod, cadagiti siroc dagiti lugo, alamo, ken terebinto, ta ti linongda nasayaat: gapuna a dagiti annacyo a babbai agbalangcantisda, ket dagiti noviayo makicamalalada.

¹⁴ Saanconto a dusaen dagiti annacyo a babbai no agbalangcantisda, ket uray met dagiti noviayo no makicamalalada, ta dagiti met laeng lallaki tumiponda cadagiti babalangcantis, ket agidatonda agraman cadagiti babbai a mannakiabig; ket ti ili nga awanan pannacaawatna matuangto.

¹⁵ Nupay sica, Israel, agbalangcantisca, nupay casta ti Juda saan coma a bumiddut; ket dicayo umay agingga iti Galgal, ken dicayo met sumang-at idiay Beth-aven, ken saancayto met nga agsapata, Cas sibibiag ni Jehova.

¹⁶ Ta ti Israel nagaramid a sisusungit, a cas ti maysa a nasukir nga urbon ti vaca: ita ni Jehova taraonannanto ida a cas maysa a cordero iti nalawa a disso.

¹⁷ Ti Efraim maitipon cadagiti didiosen; isu baybay-am.

¹⁸ Ti inumenda nagbalin a naalsem; agbalangcantisda iti cancanayon; dagiti agturturayna ayatenda unay ti bain.

¹⁹ Isu binalcut ti angin cadagiti payacna; ket maibabaindanto gapu cadagiti datdatonda.