Oseas 14 - Ti Biblia (1973)

Bagbaga iti panagbabawi; carcari iti pammacawan.

¹ O Israel, agsublica ken ni Jehova a Diosmo; ta natnagca gapu iti kinadakesmo.

² Icuyogyo dagiti sasao, ket agpulangcayo ken ni Jehova; cunaenyo kencuana, Iccatem amin a kinadakes, ket awatennacami a sicacaasi; iti casta idatagminto cas vacvaca a daton dagiti bibigmi.

³ Ti Asiria saannacaminto a maispal; dicamto sumacay cadagiti cabayo; ket dicamto met agsaon iti inaramid dagiti im-imami, Dacayo dagiti didiosmi; ta kenca ti ulila macasarac iti caasi.

⁴ Agasacto ti panaglicudda, ayatecto ida a nawadwad; ta iti pungtotco maiccaten kencuana.

⁵ Siac caslaacto la linnaaw iti Israel; isu agsabongto a cas iti lirio, ket isacnapnanto dagiti ramutna a cas iti Libano.

⁶ Dagiti sangana agsalumpayacto, ket ti sayaatna casto la iti cayo ti oliva, ket ti banglona cas Libano.

⁷ Dagiti agnaed iti linongna agsublidanto, isuda mapungardanto a cas iti bukel, ken agsabongdanto a cas ti uvas: ti banglona casto ti arac ti Libano.

⁸ Ti Efraim cunananto, Ania pay laeng aya ti bibiangco cadagiti didiosen? Simmungbatac, ket isunto ti imatangac: siac caslaac la nalangto a cayo ti parwa; caniac masaracanto ti bungam.

⁹ Asino ti masirib a macaawat cadagitoy a banbanag? manakem, tapno maammoanna ida? Ta dagiti daldalan ni Jehova nalintegda, ket dagiti nalinteg magnadanto cadacuada; ngem dagiti managsalungasing matnagdanto cadacuada.