Oseas 11 - Ti Biblia (1973)

Ti panagtawataw ti Israel.

¹ Idi ubing pay ti Israel, isu inayatco, ket nanipud idiay Egipto inayabac ti anacco.

² No casano caadu ti panangayab dagiti mammadto cadacuada, adadu pay ti yaadayuda cadacuada, nagidatdatonda cadagiti Baales, ket nagpuurda iti incienso cadagiti kinitikitan a ladladawan.

³ Nupay casta insuroc ti Efraim a magna; inaracupco ida cadagiti tackiagco; ngem saanda a naammoan a siac ti nangagas cadacuada.

⁴ Inyasidegco ida babaen cadagiti tali a natao-an babaen cadagiti singalut ti ayat; ket siac idi cadacuada ti cas cadagiti mangiccat iti bosal cadagiti sangida; ket incabilco ti canen ti sangoananda.

⁵ Saandanto nga agsubli idiay daga ti Egipto; no di ket ti Asirio isunto ti arida, gapu ta madida nga agsubli caniac.

⁶ Ket agtinnagto ti campilan cadagiti il-ilida, ket ibusennanto dagiti balunetda, ket alun-unennanto ida, a gapu cadagiti bucodda a patigmaan.

⁷ Ket ti ilic ipamaysana ti aglicud caniac: uray pa awaganda ida nga agturong iti ngato, awan a pulos ti agpangato.

⁸ Casano ti panang bay-bay-acto kenca Efraim? Ipurruaccanto, aya Israel? Casano ti panangaramidconto kenca a cas iti Adma? Icabilcanto aya a cas iti Zeboim? Ti pusoc mariribuc iti unegco, dagiti panangngaasic mapasgedda a padapada.

⁹ Diacto aramiden ti rungsot ti pungtotco, diacto sublianan a dadaelen iti Efraim: ta siac Diosac, a saan a tao; ti Santo nga adda iti catengaam; ket diacto umay a sipupungtot.

¹⁰ Magnadanto a sumurot ken ni Jehova, isu nga agungorto a cas leon; ta isu agungorto, ket dagiti annac umaydanto a sipipigerger manipud iti laud.

¹¹ Umaydanto a sipipigerger cas tumatayab manipud idiay Egipto, ken cas calapati manipud iti daga ti Asiria; ket pagnaedecto ida cadagiti balbalayda, cuna ni Jehova.

¹² Linawlawnac ti Efraim iti ulbod, ket ti balay ti Israel iti allilaw; ket ti Juda agallaalla pay laeng iti Dios, ken iti Santo a mapagtalcan.