Oseas 10 - Ti Biblia (1973)

Ti basol ti Israel apitenna ti supapacna.

¹ Ti Israel maysa a narucbus nga uvas, a pataudenna ti bungana; no casano ti caadu ti bungana casta ti panamaaduna cadagiti altarna, no casano ti cawadwad ti imbag iti dagada casta ti panagaramidda cadagiti napintas a monmon.

² Ti pusoda nabingay; ita masaracanto ida a nacabasol: isu dadaelennanto dagiti altarda, rebbaennanto dagiti monmonda,

³ Awan duadua cunadanto: Awan ti arimi; ta dicami mabuteng ken ni Jehova; ket ti ari ania ti mabalinna nga aramiden a maipaay cadacami?

⁴ Agsaoda cadagiti ubbaw a sasao, agsapatada a siuulbod iti panagtutulag: gapuna a ti panangocom tumubonto a cas iti ajenjo cadagiti gulgulis ti talon.

⁵ Dagiti agnaed idiay Samaria mapabutengdanto gapu cadagiti urbon a vaca ti Beth-aven; ta dagiti tattaona agpanesdanto gapu kencuana, ken castamet dagiti papadina a nagragragsac kencuana gapu iti kinadayagna, agsipud ta isu naisina kencuana.

⁶ Ket isu maipanto pay idiay Asiria, a maipaay a sagut ken ari Jareb: ti Efraim awatennanto ti pannacaibabain, ket ti Israel maibabainto iti bucodna a balacad.

⁷ No maipapan iti Samaria, ti arina madadael, a cas luag iti rabaw ti danum.

⁸ Dagiti met nangato a disso ti Aven, ti basol ti Israel, madadaeldanto; ti siit ken casumba tumubodanto iti rabaw dagiti altarda; ket cunadanto cadagiti banbantay, gaburandacami; ket cadagiti turturod, Agtinnagcayo cadacami.

⁹ O Israel, nagbasolca nanipud cadagidi al-aldaw ti Gabaa: idiay nagtacderda; ti gubat a maibusor cadagiti annac ti kinadakes saanna a maabut ida idiay Gabaa.

¹⁰ Ket intono tarigagayac, dusaecto ida; ket dagiti il-ili maurnongdanto a maibusor cadacuada, intono mareppetda cadagiti dua a salungasingda.

¹¹ Ket ti Efraim maysa a bumalasang a vaca a maisuro, a mayat nga agiric; ngem siac timmalaytayac iti rabaw ti nataraki a teltelna: mangicabilacto iti maysa a sumacay iti Efraim; ti Juda agaradonto, ti Jacob burakennanto dagiti bingcolna.

¹² Agmulacayo a maipaay cadacayo met laeng iti kinalinteg, aganicayo iti mayannurot iti kinaimbag; gugubaenyo ti daga a binaybay-anyo; ta pannawen ti panagsapulyo ken ni Jehova, inggana iti isu umay ket patudoenna ti kinalinteg cadacayo.

¹³ Nagaradocayo iti kinadakes, naganicayo iti kinadangkes; kinnanyo ti bunga dagiti ul-ulbod; ta sica nagtalecca iti dalanmo, iti caadu dagiti nabileg a tattaom.

¹⁴ Gapuna a rumsuanto ti gulogulo cadagiti il-ilim, ket amin dagiti sarikedkedmo marbecdanto, cas ni Salman rinebbecna ti Beth-arbel iti caaldawan ti bacal: ti ina naitupac a napispisang a naicanunung cadagiti annacna.

¹⁵ Castanto met ti aramiden cadacayo ti Beth-el gapu iti kinadakesyo: intono agbannawag ti ari ti Israel madadaelto a matalipupus.