Oseas 1 - Ti Biblia (1973)

Ti caipapanan ti pannakiasawa ni Oseas iti maysa a babai a mannakicamalala.

¹ Ti sao ni Jehova a dimteng ken ni Oseas, anac ni Beri, cadagiti al-aldaw ni Ozias, Jotan, Acaz, ken Ezekias, ar-ari ti Juda, ken cadagiti al-aldaw ni Jeroboam, anac ni Joas, ari ti Israel.

² Idi immuna a panagsao ni Jehova babaen ken ni Oseas, ni Jehova kinunana ken ni Oseas, Inca mangalaca iti maipaay kenca ti maysa nga asawa ti pannakicamalala ken annac ti pannakicamalala; ta iti daga agaramid ti dackel a pannakicamalala a sumina ken ni Jehova.

³ Iti casta napan ket innalana ni Gomer, anac a babai ni Diblaim, ket nagsicug, ket inyanacna kencuana ti maysa a lalaki.

⁴ Ket ni Jehova imbagana kencuana: Ipanaganmo kencuana ti Jezrael; ta iti mabiit manipud ita, siac ibalesconto ti dara ni Jezrael iti balay ni Jehu, ket pasardengecto iti pagarian ti balay ti Israel.

⁵ Ket maaramidto iti dayta nga aldaw a bungtolecto ti ba-i ti Israel idiay lobong a Jezrael.

⁶ Ket nagsicug manen ken inyanacna ti maysa a babai. Ket imbaga ni Jehova kencuana, Ipanaganmo kencuana ti Lo-ruhama; ta siac, awanen ti caasic iti balay ti Israel, nga uray casano diac coma pacawanen ida.

⁷ Ngem addanto asic iti balay ti Juda, ket isalacanconto ida babaen ken Jehova a Diosda, a diacto ket icanawa ida a maaramat ti ba-i, uray campilan, uray bacal, uray cabcabayo, ken uray tattao nga agcabayo.

⁸ Ket idi a napusotna ni Lo-ruhama, nagsicug, ket impasngayna ti maysa a lalaki.

⁹ Ket kinuna ni Jehova, Ipanaganmo kencuana ti Lo-ammi; gapu ta saancayo nga ilic, ken saanacto a Diosyo.

¹⁰ Nupay casta ti bilang dagiti annac ti Israel caslanto iti darat ti baybay, a di-mabalin a sucaten ken bilangen; ket maaramidto iti lugar a naisao cadacuada, Saancayo nga ilic, maibaganto cadacuada, Dacayo ti annac ti Dios a sibibiag.

¹¹ Ket dagiti annac ti Juda ken dagiti annac ti Israel maurnongdanto, ket dutokendanto cadacuada met laeng ti maysa a pangolo, ket sumang-atdanto nga aggapu iti daga; ta dackelto ti aldaw ni Jezrael.