Obadias 1 - Ti Biblia (1973)

Ti kinatangsit ti Edom mapagpacumbabanto. Ti dakes a panagragsacna iti nacalcaldaang a casasaad ti Israel. Ti Israel maitan-octo.

¹ Ti sirmata ni Abdias. Castoy ti cuna ni Jehova nga Apo a maipapani ti Edom: Nangngegmi dagiti damdamag a naggapu ken Jehova, ket adda naibaon cadagiti nasnacion, a cunana, Tumacdercayo ket tumacdertayo coma a maibusor kencuana iti gubat.

² Adtoy, inaramidca a bassit cadagiti nasnacion; ket malaisca unay.

³ Ti kinatangsit ta pusom liniputannaca, sica nga agnaed cadagiti birri ti bato a ti pagtaenganna nangato; a cunaenna iti pusona, Siasinonto ti macaipadaga caniac?

⁴ Nupay addaca a mangalalimpatoc a cas aguila ken nupay ti umucmo maisaad cadagiti bitwen, itinnagcanto manipud idiay cuna ni Jehova.

⁵ No dagiti mannanacaw immayda coma kenca, wenno dagiti tultulisan iti rabii, (Anian ti pannacadadaelmo!) saanda ngata coma nga agtacaw laeng agingga iti mapnecda? No dagiti mangnguvas serkendaca coma, saanda ngata a mangibati cadagiti uvas a banbanaen?

⁶ Anian ti pannacasukimat dagiti banag ni Esau! Anian a pannacaamiris dagiti nailemmeng a gamengna!

⁷ Amin dagiti tattao a cacannaponmo insangpetdaca iti dalanmo agingga met laeng iti beddeng; dagiti tattao a nakicappia kenca liniputandaca, ket inatiwdaca; dagiti mangan ti tinapaymo pasbangandaca; awan ti pannacaawat kencuana.

⁸ Diacto aya dadaelen dagiti mamasirib iti Edom, iti dayta nga aldaw, cuna ni Jehova, ken dagiti mannacaammo idiay bantay ni Esau?

⁹ Ket dagiti tattaom a nabileg, O Teman, mapagcullayawdanto a ti tungpalna tumunggal maysa madadael coma idiay bantay ni Esau babaen ti pannacapapatay.

¹⁰ Gapu iti ranggas nga inaramidmo ken Jacob a cabsatmo, sica mabungoncanto ti bain, ket madadaelcanto iti agnanayon.

¹¹ Idi aldaw a panagtacdermo iti bangir ken idi aldaw a panangipanaw dagiti sangsangaili iti sanicuana, ken dagiti gangannaet simrecda cadagiti ruanganna, ket naggiginnasatanda ti maipapan iti Jerusalem, maysaca met laeng a cas cadacuada.

¹² Ngem dica imatangan ti aldaw ni cabsatmo iti aldaw ti kinadacsangasatna; ket dica agrag-o cadagiti annac ni Juda iti aldaw a pannacadadaelda; dica met agpalangguad iti aldaw ti liday.

¹³ Dica sumrec iti ruangan ti ilic iti aldaw ti pannacariribucda: wen, dica imatangan ti ladingitda iti aldaw ti pannacariribucda, dica met mangala cadagiti cucuada iti aldaw ti pannacariribucda.

¹⁴ Dica agtacder iti pagcruzan ti dalan tapno agpapatay cadagiti tattaona nga aglisi; ket dica yawat dagiti tattaona a mabati iti aldaw ti rigat.

¹⁵ Ta ti aldaw ni Jehova umadani cadagiti amin a nacion: ti cas inaramidmo, maaramidto met kenca; ti namay-am cadagiti tattao castanto met ti pacapay-an ta olom met laeng.

¹⁶ Ta cas iti panaginumyo idiay nasantoan a bantayco, castanto met dagiti amin a nacion uminumda a cancanayon; wen, uminumdanto, ket alimunendanto, ket agbalindanto, a cas la saan a timmao.

¹⁷ Ngem idiay bantay Sion addanto dagiti macalisi, ket isu nasantoanto; ket ti balay ni Jacob tagicuaendanto ti cucuada.

¹⁸ Ket ti balay ni Jacob maysanto nga apuy, ket ti balay ni Jose maysanto a gil-ayab, ket ti balay ni Esau punget ti garami, ket isuda puurandanto ket ikisapdanto ida; ket awanto a pulos ti matda iti balay ni Esau ta casta ti sinao ni Jehova.

¹⁹ Ket dagiti taga Abagatan, tagicuaendanto ti bantay ni Esau, ket dagiti adda iti tanap tagicuaendanto ti daga dagiti Filisteos; ket tagicuaendanto met ti daga ti Efraim, ken ti daga ti Samaria; ket ti Benjamin tagicuaennanto ti Galaad.

²⁰ Ket dagiti nacayawan ti daytoy a buyot ti annac ti Israel, nga adda cadagiti Cananeo, tagicuaendanto ti dagada inggana iti Sarepta; ket dagiti nacayawan ti Jerusalem, nga add a diay Sefarad tagicuaendanto dagiti il-ili iti Abagatan.

²¹ Ket dagiti manangispal sumang-atdanto idiay bantay Sion, a mangocom iti bantay ni Esau; ket ti pagarian cucuanto ni Jehova.