Numero 8 - Ti Biblia (1973)

Dagiti pito a silsilaw. Ti pannacadalus dagiti Levitas.

¹ Ket ni Jehova nakisao ken Moises a kinuna,

² Ibagam ken Aaron ket saoem kencuana, No seggedam dagiti pagsasaingan dagiti pito a pagsaingan silawandanto ti sangoanan ti candelero.

³ Ket ni Aaron inaramidna a casta; pinasgedanna dagiti pagsaingan tapno silawanda ti sangoanan ti candelero, cas imbilin ni Jehova ken Moises.

⁴ Ket daytoy isu idi ti naaramid a candelero, pinitpit a balitoc; iti poonna, ken iti sabsabongna aramid a pinitpit: cas mayannurot iti pagwadan a ni Jehova imparangna ken Moises, casta ti inaramidna a candelero.

⁵ Ket ni Jehova nakisao ken Moises, a kinunana,

⁶ Alaem dagiti Levitas cadagiti annac ti Israel, ket dalusam ida.

⁷ Ket castoy ti aramidemto cadacuada, tapno dalusam ida: warsiam ida iti danum a paggugoran, ket paipagnada ti nabajas iti amin a lasagda, ket labaanda dagiti pagan-anayda, ket dalusanda dagiti bagbagida.

⁸ Sada alaen ti maysa a bumaro a vaca ken ti datonda a macan, a namayecmec a bellaay a nagamayan iti lana; ken sabali a bumaro a vaca ti alaemto a daton gapu iti basol.

⁹ Ket idatagmonto dagiti Levitas iti sango ti tolda ti gimong; ket ummongemto amin a gimong dagiti annac ti Israel;

¹⁰ Ket iparangmonto dagiti Levitas iti sango ni Jehova. Ket dagiti annac ti Israel ipataydanto dagiti im-imada cadagiti Levitas:

¹¹ Ket ni Aaron idatonnanto dagiti Levitas iti sango ni Jehova, a maipaay iti daton a mailili, iti biag dagiti annac ti Israel, tapno buddongda ti agaramid iti panagservi ken Jehova.

¹² Ket dagiti Levitas ipataydanto dagiti im-imada cadagiti ol-olo dagiti vacvaca a lallaki: ket idatonmo ti maysa a maipaay a daton gapu iti basol, ket ti caduana maiservi a daton a mapuuran ken Jehova tapno maaramid a pacaabbongan dagiti Levitas.

¹³ Ket iparangmonto dagiti Levitas iti sango ni Aaron, ken iti sango dagiti annacna a lallaki, ket idatagmonto ida a mailili ken Jehova.

¹⁴ Castoy ti panangilasinmonto cadagiti Levitas cadagiti annac ti Israel; ket cucuacto dagiti Levitas.

¹⁵ Ket iti calpasan daytoy, dagiti Levitas sumbrecdanto nga agaramid iti panagannong iti tolda ti gimong: ket dalusamto ida, ken idatonmo ida a daton a mailili.

¹⁶ Ta isuda maitedda nga awan labas caniac nga aggapuda cadagiti annac ti Israel; innalac ida a maisuno cadagiti amin a manglucat iti aanacan, a dagiti inauna nga annac met laeng dagiti amin nga annac ti Israel.

¹⁷ Ta amin dagiti inaunaan cadagiti annac ti Israel, cucuac ida, tao man ken animal: iti aldaw a pinangcabilco iti isu-amin nga annac nga inauna iti daga nga Egipto, sinantificarco ida a maipaay caniac met laeng.

¹⁸ Ket innalac dagiti Levitas a suno dagiti amin nga inauna cadagiti annac ti Israel.

¹⁹ Ket intedco dagiti Levitas a cas sagut ken Aaron ken cadagiti annacna a lallaki, a naggapuda cadagiti annac ti Israel, tapno aramidenda ti annong dagiti annac ti Israel iti tolda ti gimong, ken mangaramid iti pannacaabbong a maipaay cadagiti annac ti Israel; tapno ti didigra awanto cadagiti annac ti Israel, no dagiti annac ti Israel umadanida iti santuario.

²⁰ Castoy ti inaramid da Moises, ken Aaron ken amin a gimong dagiti annac ti Israel, cadagiti Levitas: cas mayannurot iti isu-amin nga imbilin ni Jehova ken Moises maipapan cadagiti Levitas, casta ti inaramid dagiti annac ti Israel cadacuada.

²¹ Ket dagiti Levitas ginugoranda dagiti bagbagida manipud iti basol, ket linabaanda dagiti cawcawesda; ket ni Aaron indatagna ida a daton a mailili iti sango ni Jehova; ket ni Aaron inaramidna ti pannacaabbong a maipaay cadacuada tapno dalusanna ida.

²² Ket iti calpasan dayta, simrec dagiti Levitas a mangakem iti annongda iti tolda ti gimong iti imatang ni Aaron ken imatang dagiti annacna a lallaki: cas ni Jehova imbilinna ken Moises iti maipapan cadagiti Levitas, casta ti inaramidda cadacuada.

²³ Ket ni Jehova nakisao ken Moises a kinunana,

²⁴ Daytoy isu ti casasaad dagiti Levitas: manipud agtawen iti duapulo ket lima ken agpangato sumrecdanto nga agannong iti panagservi iti trabajo iti tolda ti gimong:

²⁵ Ket manipud agtawen iti limapulo agsardengdanto nga agannong iti trabajo, ket didanto agannongen,

²⁶ Ngem agservidanto agraman cacabsatda iti tolda ti gimong, a mangsalimetmet iti panagaywan, ket dida agannong. Castoy ti aramidem cadagiti Levitas maipapan iti servicioda.