Numero 6 - Ti Biblia (1973)

Ti linteg iti ag-Nazareo. Ti bendicion a saoento ti padi.

¹ Ket ni Jehova nakisao ken Moises, a kinunana,

² Ibagam cadagiti annac ti Israel, ket cunam cadacuada, No ti lalaki wenno babai agcari iti naisangayan a cari ti Nazareo tapno ipaayna ti bagina ken Jehova.

³ Iyadayunanto ti bagina iti arac ken naingel nga inumen; saanto nga umin-inum iti suca ti arac, wenno suca ti naingel nga inumen, dinto met uminum iti tubbog ti uvas, wenno mangan iti naganus nga uvas wenno nagango.

⁴ Amin dagiti al-aldaw a pannacayadayuna awanto ti canenna nga agtaud iti puon ti uvas, manipud bucbukel agingga iti ukis.

⁵ Amin dagiti al-aldaw ti carina a pannacayadayu, awan ti pangiskis a dumanonto iti olona: inggana ti aggibus dagiti al-aldaw ti pannacayadayuna a maipaay ken Jehova, isu nasantoanto; isu baybay-annanto nga agatiddug ti buoc ti olona.

⁶ Dagup dagiti al-aldaw ti pannacayadayuna a maipaay ken Jehova, dinto umadani iti bangcay a natay.

⁷ Dinanto mulitan ti bagina gapu ken amana, wenno gapu ken inana, gapu ken cabsatna a lalaki wenno gapu ken cabsatna a babai, no natayda; gapu ta ti pannacayadayuna a maipaay iti Diosna adda kencuana.

⁸ Iti dagup dagiti al-aldaw ti pannacayadayuna isu ti nasantoan ken Jehova.

⁹ Ket no siasino a tao matay a pettat iti abayna, ket mulitanna ti olo ti pannacayadayuna; iti casta kiskisannanto ti olona iti aldaw a panagdalusna, iti maicapito nga aldaw ti panagkiskisnanto.

¹⁰ Ket iti maicawalo nga aldaw mangyegto iti dua a pagaw wenno dua nga urbon ti calapati iti padi iti ruangan ti tolda ti gimong:

¹¹ Ket ti padi idatonnanto ti maysa a maipaay a daton gapu iti basol, ket ti sabali maipaay a daton a mapuuran, ket aramidennanto ti pannacaabbong a maipaay kencuana gapu ta nacabasol maipanggep iti natay, ket pasantoennanto ti olona iti daydiay met la nga aldaw.

¹² Ket isu ilasinnanto a maipaay ken Jehova dagiti al-aldaw ti pannacayadayuna ket mangyegto iti maysa a cordero a lalaki a maysa ti tawenna a maipaay a daton gapu iti salungasing: ngem dagiti immuna nga al-aldaw awanto ti pategda, gapu ta ti pannacayadayuna namulitan.

¹³ Ket daytoy ti linteg ti Nazareo, no dagiti al-aldaw ti pannacayadayuna maungpotda: mayegto iti ruangan ti tolda ti gimong,

¹⁴ Ket idatagnanto ti datonna ken Jehova, maysa a cordero a lalaki a maysa ti tawenna, nga awan pilawna a maipaay a daton a mapuuran, ken maysa cabayan a cordero a maysa ti tawenna, nga awan pilawna a maipaay a daton gapu iti basol, ken maysa a lalaki a carnero nga awan pilawna, datdaton gapu iti cappia.

¹⁵ Ken maysa a labba ti di-nalevaduraan a tinapay, bibbibingca a bellaay a namayecmec a nagamayan iti lana, ken cancancanen a di-nalevaduraan a nasapsapoan iti lana, ken ti datdaton a macan, ken dagiti datonna a mainum.

¹⁶ Ket ti padi idatagnanto ida iti sango ni Jehova, ket ipaaynanto ti datonna gapu iti basol, ken ti daton a mapuuran:

¹⁷ Ket ipaaynanto ti cordero a sacrificio dagiti datdaton ti cappia ken Jehova, agraman ti labba ti di-nalevaduraan a tinapay: ti padi irucbabnanto met ti datonna a macan, ken ti datonna a mainum.

¹⁸ Ket ti Nazareo kiskisannanto ti olo ti pannacayadayuna iti ruangan ti tolda ti gimong, ket alaennanto ti buoc ti olo ti pannacayadayuna, ket icabilnanto iti apuy nga adda iti babaen ti sacrificio dagiti datdaton iti cappia.

¹⁹ Ket ti padi alaennanto ti nalingta nga abaga ti carnero a lalaki ken maysa a bibingca a di-nalevaduraan iti labba, ken maysa a di-nalevaduraan a cancanen, ket icabilnanto ida iti rabaw dagiti im-ima ti Nazareo, calpasan ti pananagkiskisna iti olo ti pannacayadayuna;

²⁰ Ket ti padi ililinanto ida a maipaay a maysa a daton a maitayag iti saclang ni Jehova, daytoy isu ti nasantoan iti padi agraman ti barucong a mailili, ken ti luppo a maitayag: iti calpasanna ti Nazareo mabalinnan ti uminum iti arac.

²¹ Daytoy ti linteg ti Nazareo nga agcari, ken ti datonna ken Jehova a maipaay iti pannacayadayuna, sabalipay ti mabalinna a gun-oden: a mayannurot iti carina nga isu icarina, casta ti rebbengna nga aramiden mayabuloy iti linteg ti pannacayadayuna.

²² Ket ni Jehova nakisao ken Moises, a kinunana,

²³ Ibagam ken Aaron ken cadagiti annacna a lallaki, a cunam, Castoy ti panangbendicionyonto cadagiti annac ti Israel: cunayonto cadacuada,

²⁴ Ni Jehova bendicionannaca, ken saluadannaca coma:

²⁵ Ni Jehova, paraniagenna coma ti rupana kenca, ken paraburannaca:

²⁶ Ni Jehova itannaawna coma ti rupana kenca, ket iccannaca ti talna.

²⁷ Casta ti panagicabildanto iti naganco cadagiti annac ti Israel, ket siac bendicionacto ida.