Numero 5 - Ti Biblia (1973)

Ti linteg a maipanggep iti narugit; maipapan iti salungasing ken panagipulang. Ti pannacapalutpot ti pannakicamalala.

¹ Ket ni Jehova nakisao ken Moises, a kinuna,

² Ibilinmo cadagiti annac ti Israel a paruarenda iti a pacarso tunggal agcucutel, ken tunggal agtotot, ken siasinoman a saan a nadalus gapu iti natay:

³ Lalaki man ken babai agpadada a paruarenyo iti ruar ti pacarso ti pangipananyo cadacuada; tapno dida mamulitan ti pacarso, nga iti tengngana pagnaedac.

⁴ Ket dagiti annac ti Israel inaramidda a casta, ket impanda ida iti ruar ti pacarsoda; cas ni Jehova sinaona ken Moises, casta ti inaramidda dagiti annac ti Israel.

⁵ Ket ni Jehova nakisao ken Moises, a kinunana,

⁶ Ibagam cadagiti annac ti Israel, no maysa a lalaki, wenno babai macaaramid iti uray ania a basol nga aramiden dagiti tattao a pagsalungasingda iti maicaniwas ken Jehova, ket dayta a tao macabiddutto;

⁷ Ipudnonanto ngarud ti basolna nga inaramidna: ket aramidennanto ti panagipulang a naananay gapu iti basolna, ket inayonnanto pay ti apacalimana, ket itednanto ken nacabasolanna.

⁸ Ngem no ti maysa a tao awan ti cabagianna a pagipulangan gapu iti biddut, ti ipulang gapu iti basol a naaramid ken Jehova cucuanto ti padi sabali pay ti carnero a lalaki ti pannacaabbong, isu a maaramidto a pacaabbongganna.

⁹ Ket amin a daton a maitayag ti dagup dagiti banbanag a nasantoan dagiti annac ti Israel, dagidiay nga idatagda iti padi cucuananto.

¹⁰ Ket dagiti napasanto a banbanag amin a tao, cucuananto: uray ania nga ited ti siasinoman a tao, iti padi, dayta cucuananto.

¹¹ Ket ni Jehova nakisao ken Moises, a kinunana,

¹² Ibagam cadagiti annac ti Israel, ket cunam cadacuada, no ti asawa ti siasinoman a lalaki sumiasi, ket aramidenna ti salungasing a maicaniwas kencuana,

¹³ Ket no maysa a lalaki makiabig kencuana, ket mailimed cadagiti mata ni asawana, ket maitalimeng, ket isu natulawan, ket awanto ti sacsi a maicaniwas kencuana, ket di met matiliw iti dayta nga aramid:

¹⁴ Ket ti espiritu ti panagimon umapay iti lalaki, ket agimon ken asawana ket ti babai natulawan: wenno no ti espiritu ti imon umapay kencuana, ket agimon ken asawana, ket ti babai saan a natulawan:

¹⁵ No casta ti lalaki yegnanto ti asawana iti padi, ken yegnanto ti datonna a maipaay kencuana ti apagcapulo ti maysa nga efa ti bel-laay ti cebada; dinanto buyatan iti lana ti rabawna wenno dina parabawanto iti incienso; ta isu ti daton a macan maipuon iti imon, maysa a daton a macan a pacalaglagipan a panglagip ti kinadakes.

¹⁶ Ket ti padi yadaninanto ti babai ket idatagnanto iti sango ni Jehova:

¹⁷ Ket ti padi mangalanto iti nasantoan a danum iti maysa a bacca a damili: ket iti nayon ti tapuc nga adda iti datar ti tabernaculo ti padi mangalanto ket icabilnanto iti danum.

¹⁸ Ket ti padi ipannanto ti babai iti sango ni Jehova, ket pawacraynanto ti booc ti babai ken icabilnanto cadagiti im-imana ti daton a macan a pacalaglagipan, nga isu ti daton a macan gapu iti imon: ket ti padi addanto iti imana ti danum ti pait a mamataud iti lunod.

¹⁹ Ket ti padi pagsapataennanto ti babai, ket cunananto kencuana, No awan ti lalaki a nakicaidda kenca, ket dica simmiasi a napan iti kinarugit, idinto a paiturayanca ken asawam, mailiclicca iti daytoy a danum ti pait a macailunod:

²⁰ Ngem no simmiasica iti caaddam iti biang ni asawam, ket no natulawanca, ket maysa a lalaki, a saan la a ni asawam, nakicaidda kenca:

²¹ Iti casta ti padi pagsapataennanto ti babai, tapno agsapata iti sapata ti lunud, ket ti padi cunananto iti babai, Ni Jehova pagbalinennaca a maysa a lunod, ken maysa a tabbaaw iti baet ti ilim, no ni Jehova aramidenna nga agkebbet ti luppom, ken agebbal ti bagim;

²² Ket daytoy nga danum a macailunod mapanto cadagiti lalaemmo, ket pagebbalennanto ti bagim, ket pakebbetennanto ti luppom. Ket ti babai cunananto, Sapay coma, Sapay coma ta casta.

²³ Ket ti padi isuratnanto dagitoy a lunlunod iti maysa a pagbasaan ket punasennanto ida iti danum ti pait:

²⁴ Ket ipainumnanto iti babai ti danum ti pait a macailunod: ket ti danum a macailunod sumbrecto kencuana, ket agbalinto a napait.

²⁵ Ket ti padi alaennanto ti macan a daton ti imon iti ima ti babai, ket ililinanto ti macan a daton iti sango ni Jehova ket yegnanto iti altar:

²⁶ Ket ti padi mangalanto iti sangarakem iti macan a daton cas pacalaglagipan iti daytoy, ket puuranna iti rabaw ti altar, ket iti calpasanna ipainumnanto ti danum iti babai.

²⁷ Ket no maipainumna ti danum kencuana, maaramidto ngarud a no ti babai natulawan, ket nacaaramid iti maysa a salungasing ken asawana, ti danum sumbrecto kencuana, ket agbalinto a napait ket ti bagina agebbalto, ket ti luppona cumbetto: ket ti babai isunto ti maysa a lunod iti ilina.

²⁸ Ket no ti babai saan a natulawan, ngem nadalus ket di, no casta ti babai agwayawayanto ket mangisicugto ti anac.

²⁹ Daytoy ti linteg ti imon no ti asawa a babai nga adda iti babaen ti asawana mangliput, ket natulawan;

³⁰ Wenno ti espiritu ti imon umapay iti maysa a lalaki, ket agimon iti asawana; ipannanto ngarud ti babai iti sango ni Jehova ket ti padi aramidennanto iti daydiay a babai ti dagup daytoy a linteg.

³¹ Ket ti lalaki mailiclicto iti kinadakes, ket ti babai ti mangbaclay iti kinadakesna.