Numero 4 - Ti Biblia (1973)

Rebbengen dagiti Coathitas, Gersonitas ken Meraritas. Ti bilang dagiti Levitas nga agtawen iti nagbaetan ti tallopulo ken limapulo.

¹ Ket ni Jehova nakisao cada Moises ken ni Aaron a kinunana.

² Alaenyo ti dagup dagiti annac a lallaki ni Coat cadagiti annac a lallaki ni Levi, iti finamfamiliada cadagiti balbalay dagiti ammada,

³ Manipud agtawen iti tallopulo ken agpangato uray agingga iti limapulo ti tawenna, isuda amin sumrecda iti panagservi tapno agtrabajoda iti tolda ti gimong.

⁴ Daytoy ti annongen dagiti annac ni Coat iti tolda ti gimong maipapan cadagiti casasantoan a bambanag:

⁵ No lumuas ti pacarso, ni Aaron sumrecto agraman cadagiti annacna a lallaki ket acasendanto ti abbong a panglinged ket yarpawdanto iti lacasa ti pamanecnec,

⁶ Ket icabildanto iti rabawna ti maysa abbong a lalat ti foca, ket yaplagdanto iti rabawna ti maysa a lupot a bin-ig nga azul, sadanto yusoc dagiti pagassiwan.

⁷ Ket iti rabaw ti lamisaan ti tinapay ti pamarang yaplagdanto ti lupot nga azul, sada iparabawto idiay dagiti pingpinggan, ken dagiti cutcuchara, ken dagiti malmalocong, ken dagiti copcopa a pagibuyat: ket ti cancanayon a tinapay addanto laeng idiay rabawna:

⁸ Ket yaplagdanto iti rabawda ti maysa a lupot nga escarlata, ket arpawandanto daydiay met laeng iti abbong a lalat ti foca, sada icabilto dagiti pagassiwan.

⁹ Ket mangaladanto iti maysa a lupot nga azul, ket abbongandanto ti candelero ti silaw, ken dagiti pagsainganna ken dagiti pagarsangna ken dagiti pagyarsangan ken amin a paglanaanna, isu a pagannonganda kencuana:

¹⁰ Ket icabildanto agraman amin a vasvasona iti uneg ti maysa nga abbong a lalat ti foca, sada icabilto iti rabaw ti tarimban.

¹¹ Ket iti rabaw ti altar a balitoc yaplagdanto ti azul a lupot, ket cumotandanto iti abbong a lalat ti foca, sada yusocto dagiti pagassiwan:

¹² Ket alaendanto amin dagiti vasvaso ti panagannong isuda a pagservi iti santuario, ket icabildanto iti maysa a lupot nga azul, ket bungonendanto ida iti pagbungonan a lalat ti foca ket iparabawdanto ida iti tarimban.

¹³ Ket iccatendanto dagiti dapo iti altar ket yaplagdanto iti rabawna ti maysa a lupot a purpura:

¹⁴ Sada idissonto iti rabawna amin dagiti ar-aruatenna a pagservida idiay dagiti pagiccan iti beggang, ken dagiti pagadaw iti lasag, ken dagiti sopsoplad ken dagiti bacbacca, amin dagiti ar-aruat ti altar; ket yaplagdanto iti rabawna ti abbong a lalat ti foca, sada yusocto dagiti pagassiwan.

¹⁵ Ket no ni Aaron ken dagiti annacna a lallaki naabbongandan ti santuario ken amin dagiti al-alicamen ti santuario, no panagluas ti buyot; iti calpasanna dagiti annac a lallaki ni Coat umaydanto awiten; ngem didanto sagsagiden ti santuario, di la ket ta matayda. Dagitoy isuda ti awiten dagiti annac a lallaki ni Coat iti tolda ti gimong.

¹⁶ Ket ti aywanan ni Eleazar nga anac a lalaki ni Aaron a padi isunto ti lana ti silaw, ken ti nasayamusom nga incienso, ken ti cancanayon a daton a macan, ken ti lana a sapsapo, ti pannacaaywan ti amin ti tabernaculo ken amin nga adda kencuana, ti santuario ken amin nga al-alicamenna.

¹⁷ Ket ni Jehova nakisao cada Moises ken ni Aaron, a kinunana,

¹⁸ Dicayo ipusay ti caputotan dagiti famfamilia dagiti Coatitas cadagiti Levitas:

¹⁹ Ngem castoy ti aramiden cadacuada tapno agbiagda ken dida matay, no umadanida cadagiti casasantoan a banbanag: ni Aaron ken dagiti annacna a lallaki sumrecdanto ket ipatodanto ida tumunggal maysa iti annongna ken awitna:

²⁰ Ngem dida sumrecto a cumita iti santuario uray iti apagdaricmat laeng, di la ket ta matayda.

²¹ Ket ni Jehova nakisao ken Moises a kinunana,

²² Alaem met ti dagup dagiti annac a lallaki ni Gerson cadagiti balbalay dagiti ammada, iti finamfamiliada,

²³ Manipud agtawen iti tallopulo ken agpangato agingga iti limapulo ti tawenna, bilangem ida; isuda amin sumrecda nga agannong iti panagservi tapno aramidenda ti rebbengen iti tolda ti gimong.

²⁴ Daytoy ti aramid dagit famfamilia dagiti Gersonitas iti panagservi ken panagawit:

²⁵ Awitendanto dagiti bengbeng ti tabernaculo, ken ti tolda ti gimong, ti linongna ken ti abbong ti lalat ti foca nga adda iti ngatoenna, ken ti cortina iti ruangan ti tolda ti gimong.

²⁶ Ken dagiti cortina ti paraangan ken ti cortina iti ruangan ti pagsercan ti paraangan a sikigan ti tabernaculo ken iti sibay a naglawlaw ti altar, ken dagiti lublubidda, ken amin nga al-alicamen ti panagservida ken uray ania a maaramid cadagita: cadagitoy agservidanto.

²⁷ Iti babaen ti panagbilin ni Aaron ken dagiti annacna a lallaki agservinto iti isu-amin dagiti annac a lallaki dagiti Gersonitas iti amin nga awitda, ken iti isu-amin a panagservida; ket ikeddengyonto cadagiti akinrebbeng amin nga awitda.

²⁸ Daytoy ti aramid dagit famfamilia dagiti annac a lallaki dagiti Gersonitas iti tolda ti gimong: ket ti annongda addanto iti babaen ti panangidalan ni Itamar nga anac a lalaki ni Aaron a padi.

²⁹ Maipapan cadagiti annac ni Merari, bilangemto ida iti finamfamiliada, cadagiti balbalay dagiti ammada;

³⁰ Manipud agtawen iti tallopulo ken agpangato uray agpapan iti limapulo ti tawenna, bilangemto ida, tumunggal maysa sumbrec iti panagservi tapno sangoenna ti aramid iti tolda ti gimong.

³¹ Ket daytoy isu ti maitalec nga awitda, a mayannurot iti isu-amin a panagservida iti tolda ti gimong: dagiti tabtabla ti tabernaculo, ken dagiti balbalunet, ken dagiti adigi ken dagiti batbatayna,

³² Ken dagiti adadigi ti paraangan nga aglawlaw ken dagiti batbatayda, ken dagiti paspasocda ken dagiti lublubidda, agraman amin nga al-alicamenda ken amin nga agservi cadagitoy: ket kednganyonto nga inaganan dagiti al-alicamen a maitalec nga awitda.

³³ Daytoy ti annongen dagiti famfamilia dagiti annac a lallaki ni Merari a mayannurot iti amin a panagservida iti tolda ti gimong babaen ti panangidalan ni Itamar nga anac a lalaki ni Aaron a padi.

³⁴ Ket ni Moises ken ni Aaron ken dagiti pangpangolo ti gimong binilangda dagiti annac a lallaki dagiti Coatitas, iti finamfamiliada, ken cadagiti balbalay dagiti ammada.

³⁵ Nanipud agtawen iti tallopulo ken agpangato uray inggana iti agtawen iti limapulo, tumunggal maysa a simrec iti panagannong tapno agservi iti tolda ti gimong:

³⁶ Ket dagidiay nabilang cadacuada iti finamfamiliada, dua ribu ket pito gasut ket limapuloda.

³⁷ Dagitoy isuda ti nabilang cadagiti famfamilia dagiti Coatitas, amin dagiti nagannong iti tolda ti gimong a binilang da Moises ken Aaron a mayannurot iti panagbilin ni Jehova ken Moises.

³⁸ Ket dagidiay a nabilang cadagiti annac a lallaki ni Gerson iti finamfamiliada, ken cadagiti balbalay dagiti ammada,

³⁹ Nanipud iti agtawen iti tallopulo ken agpangato uray agingga iti agtawen iti limapulo, tumunggal maysa a simbrec nga agannong tapno agservi iti tolda ti gimong,

⁴⁰ A dagidiay met laeng a nabilang cadacuada iti finamfamiliada, ken cadagiti balbalay dagiti ammada, dua ribu ket innem a gasut ket tallopuloda.

⁴¹ Dagitoy isuda dagiti nabilang idi cadagiti famfamilia dagiti annac a lallaki ni Gerson, amin dagiti nagservi iti tolda ti gimong a binilang da Moises ken ni Aaron a mayannurot iti panagbilin ni Jehova.

⁴² Ket dagidiay a nabilang cadagiti famfamilia dagiti annac a lallaki ni Merari iti finamfamiliada, ken cadagiti balbalay dagiti ammada,

⁴³ Nanipud agtawen iti tallopulo ken agpangato inggana iti agtawen iti limapulo, tumunggal maysa a simrec iti panagannong tapno agservi iti tolda ti gimong.

⁴⁴ A dagidiay met laeng a nabilang cadacuada iti finamfamiliada tallo ribu ket dua gasutda.

⁴⁵ Dagitoy isuda dagiti nabilang cadagiti famfamilia dagiti annac a lallaki ni Merari a binilang da Moises ken Aaron a mayannurot iti panagbilin ni Jehova ken Moises.

⁴⁶ Amin dagidiay a nabilang cadagiti Levitas a binilang da Moises ken Aaron ken dagiti pangpangolo ti Israel iti finamfamiliada, ken iti balbalay dagiti ammada,

⁴⁷ Nanipud iti agtawen iti tallopulo ken agpangato, uray inggana iti agtawen iti limapulo, tunggal maysa a simbrec nga agannong iti panagservi, ken ti trabajo ti panagbaclay cadagiti aw-awiten iti tolda ti gimong,

⁴⁸ A dagidiay met laeng nabilang cadacuada walo a ribu, lima gasut ket walopuloda

⁴⁹ Cas ti panagbilin ni Jehova, binilang ida ni Moises, tunggal maysa cas mayannatop iti annongna ken cas mayannatop iti awitna: casta ti panangbilangna cadacuada cas imbilin idi ni Jehova ken Moises.