Numero 36 - Ti Biblia (1973)

Ti linteg maipapan iti panagasawa dagiti babbai nga agtawid.

¹ Ket dagiti pangpangolo dagiti balbalay dagiti amma ti familia nga annac ni Galaad, nga anac a lalaki ni Maquir, nga anac a lalaki ni Manases, cadagiti famfamilia dagiti annac ni Jose, immasidegda ken nagsaoda iti sango ni Moises ken iti sango dagiti agturturay a pangpangoloen dagiti balbalay dagiti amma dagiti annac ti Israel:

² Ket kinunada, Ni Jehova imbilinna iti apoc nga itedna ti tawid iti ginnasanggasat, cadagiti annac ti Israel: ket ti apoc nabilin ken Jehova iti panangitedna ti tawid ni Zelofehad a cabsatmi a lalaki cadagiti annacna a babai.

³ Ket no maasawaanda iti siasinoman cadagiti annac ti sabali a capcaputotan dagiti annac ti Israel, ti tawidda maiccatto ngarud iti tawid dagiti ammami ket mainayonto iti tawid ti capcaputotan a pacaicamanganda: casta ti pannacaipusaydanto iti naipagasat a tawidmi.

⁴ Ket no ti jubileo dagiti annac ti Israel madanunanto, ti tawidda ngarud mainayonto iti tawid ti caputotan a pacaicamangandanto: casta ti pannacaipusayto ti tawidda iti tawid ti caputotan dagiti ammami.

⁵ Ket ni Moises imbilinna cadagiti annac ti Israel cas mayannurot iti sao ni Jehova, a kinunana, Ti caputotan dagiti annac ni Jose nalinteg ti saoda.

⁶ Daytoy ti ibilin ni Jehova maipapan cadagiti annac a babbai ni Zelofehad, a cunana, Makiasawada coma cadagiti isisipenda a casasayaatan; iti laeng familia ti caputotan ni amada ti pakiasawaandanto.

⁷ Ti casta dinto agalis-alis iti caputotan ken caputotan ti tawid dagiti annac ti Israel: ta dagiti anac ti Israel tunggal maysa petpetannanto ti tawid ti caputotan dagiti ammana.

⁸ Ket tunggal anac a babai nga agtagicua iti maysa a tawid iti uray asinoman a caputotan dagiti annac ti Israel, asawaento ti maysa iti familia ti caputotan ni amana, tapno dagiti annac ti Israel, tunggal maysa a lalaki tagicuaenna ti tawid dagiti ammana.

⁹ Casta ti dinto panagalis-alis iti pinutonputot ti tawid; ta dagiti capcaputotan dagiti annac ti Israel, cupicupanto ti tunggal maysa ti bucodna a tawid.

¹⁰ Cas met la ti panangibilin ni Jehova ken Moises, casta ti inaramid dagiti annac a babbai ni Zelofehad:

¹¹ Ta da Maala, Tirsa, ken Hogla, ken Milcha, ken Noa, nga annac a babbai ni Zelofehad, nakiasawada cadagiti annac dagiti cacabsat ni amada.

¹² Isuda naasawaanda cadagiti famfamilia dagiti annac ni Manases, nga anac ni Jose, ket ti tawidda nagbati iti caputotan ti familia ti amada.

¹³ Dagitoy isuda dagiti bilbilin ken linlinteg nga intuyang ni Jehova iti ima ni Moises cadagiti annac ti Israel, iti tantanap ti Moab nga asideg ti Jordan sadi Jerico.