Numero 34 - Ti Biblia (1973)

Dagiti bedbeddeng ti Canaan. Dagiti tattao a mangbingbingay ti daga.

¹ Ket ni Jehova nakisao ken Moises, a kinunana,

² Ibilinmo cadagiti annac ti Israel, ket cunam cadacuada, No sumreccayto iti daga a Canaan (daytoy ti daga a maibilangto cadacayo a maysa a tawid, nga isu ti daga ti Canaan, cas mayannurot cadagiti bedbeddengna.)

³ Iti casta ti pagingaanyo iti abagatan a bangir manipudto iti tay-ac ti Zin, nga aglayon iti abay ti Edom, ket ti beddengyo iti abagatan manipudto iti pungto ti Baybay ti Asin iti daya;

⁴ Ket ti beddengyo lawlawennanto ti abagatan ti sang-atan ti Acrabbim, ket aglayon agingga iti Zin; ket ti pagruaranna idiay itinto abagatan ti Cades-barnea; ket agturongto agingga iti Hasar-adar, ket aglayonto agingga iti Asmon:

⁵ Ket ti beddeng agsicconto manipud Asmon agingga iti ayus ti Egipto, ket ti pagruarannanto iti taaw.

⁶ Ket ti taaw a dackel isunto cadacayo ti pagbeddengan iti laud ken ti igidna: daytoy isunto ti beddengyo iti laud.

⁷ Ket daytoy isunto ti inggayo iti amianan: manipud ti taaw a dackel idulonyonto ti bantay Hor cadacayo;

⁸ Manipud iti bantay Hor idulonyonto inggana iti pagsercan ti Hamat; ket dagiti pagruaran idiayto Sedad;

⁹ Ket ti pungto agtarusto iti Zifron, ket dagiti pagruaranna idiayto Hasarenan: daytoy ti akinamianan a beddengyo.

¹⁰ Ket dulonenyonto a beddengyo iti daya manipud Hasar-enan inggana iti Sefam;

¹¹ Ket ti beddeng agsalugto manipud Sefam inggana ti Ribla, a dayaen ti Ain; ket ti pagbeddengan agsalugto ket aglayon agingga iti abay ti baybay a Cinneret nga akindaya;

¹² Ket ti pagbeddengan agsalugto iti Jordan, ket dagiti pagruaranna idiayto Baybay ti Asin; daytoy isunto ti dagayo a mayannurot cadagiti nagbeddenganna a naglawlaw.

¹³ Ket ni Moises imbilinna cadagiti annac ti Israel, a kinunana, Daytoy ti daga a tawidenyonto iti panaggiginnasanggasat isu nga ni Jehova imbilinna nga ited cadagiti siam a capcaputotan ken iti guddua ti maysa a caputotan:

¹⁴ Ta ti caputotan dagiti annac ni Ruben a mayannurot cadagiti balbalay dagiti ammada, ken ti caputotan dagiti annac ni Gad cas mayannurot iti balbalay dagiti ammada immawatdan, ket ti guddua ti caputotan ni Manases inawatdan ti tawidda:

¹⁵ Dagiti dua a capcaputotan ken ti guddua a caputotan inawatdan ti tawidda iti ballasiw ti Jordan sadi Jerico nga agpadaya, iti agpaleleggacan ti init.

¹⁶ Ket ni Jehova nakisao ken Moises, a kinunana,

¹⁷ Dagitoy ti nagnagan dagiti lallaki a mangbingbingayto iti daga nga agpaay cadacayo a tawid: ni Eleazar a padi, ken ni Josue nga anac ni Nun.

¹⁸ Ket mangalacayto iti maysa nga agpangolo iti intunggal caputotan a mangbingay iti daga a tawiden.

¹⁹ Ket dagitoy dagiti nagnagan dagiti lallaki: iti caputotan ni Juda, ni Caleb nga anac ni Jefone.

²⁰ Ket iti caputotan dagiti annac ni Simeon, ni Samuel nga anac ni Ammiud.

²¹ Iti caputotan ni Benjamin, ni Elidad nga anac ni Cislon.

²² Ket iti caputotan dagiti annac ni Dan, maysa a pangolo, ni Buqui nga anac ni Jogli.

²³ Cadagiti annac ni Jose: iti caputotan dagiti annac ni Manases, maysa a pangolo, ni Haniel nga anac ni Efod.

²⁴ Ket iti caputotan dagiti annac ni Efraim, maysa a pangolo, ni Kemuel nga anac ni Siftan.

²⁵ Ket iti caputotan dagiti annac ni Zabulon, maysa a pangolo, ni Elisafan, nga anac ni Parnah.

²⁶ Ket iti caputotan dagiti annac ni Issacar maysa a pangolo, ni Paltiel nga anac ni Azan.

²⁷ Ket iti caputotan dagiti annac ni Aser, maysa a pangolo, ni Ahiud nga anac ni Selome.

²⁸ Ket iti caputotan dagiti annac ni Neftali maysa a pangolo, ni Pedael nga anac ni Ammiud.

²⁹ Dagitoy isuda ti binilin ni Jehova iti tawid cadagiti annac ti Israel sadiay daga a Canaan.