Numero 33 - Ti Biblia (1973)

Dagiti nagtoltoldaan ti Israel nanipud Rameses agingga iti Abelsitim. Ti ipapatay ni Aaron. Maipapan iti pannacaparmec ti daga a Canaan.

¹ Dagitoy dagiti nagnagnaan dagiti annac ti Israel idi pimmanada iti daga nga Egipto iti binuyonbuyotda, babaen ti ima da Moises ken Aaron.

² Ket ni Moises insuratna dagiti panagluluasda a mayannurot iti panagpagnapagnada gapu iti panagbilin idi ni Jehova: ket dagitoy dagiti barbariw-asda, a mayannurot cadagiti panagluluasda.

³ Ket isuda, nagluasda nanipud Rameses iti umuna a bulan, iti maicasangapulo ket lima nga aldaw ti umuna a bulan; iti bigat, calpasan ti pascua, dagiti annac ti Israel, pimmanawda agraman natayag nga ima, iti imatang ti isu-amin a taga Egipto,

⁴ Bayat a dagiti taga Egipto agiponponda idi cadagiti inauna nga annacda a dinadael ni Jehova iti nagtengngaanda; a ni Jehova inaramidna met ti panangocom cadagiti didiosda.

⁵ Ket dagiti annac ti Israel nagnada nanipud Rameses ket nagtoldada idiay Succot.

⁶ Ket nagluasda nanipud Succot, ket nagtoldada idiay Etam, nga adda iti pungto ti let-ang.

⁷ Ket nagluasda nanipud Etam ket nagsublida iti Pi-hahirot nga adda iti sango ti Baalsefon idi: ket nagtoldada iti sangoanan ti Migdol.

⁸ Ket nagluasda nanipud iti sango ti Pi-hahirot, ket linasatda ti tengnga ti baybay a simrecda iti let-ang; ket tallo nga al-aldaw ti pannagnada iti let-ang ti Etam, ket nagtoldada idiay Mara.

⁹ Ket nagluasda nanipud Mara, ket dimtengda iti Elim: ket idiay Elim adda sangapulo ket dua nga ub-ubbog ti danum ken pitopulo a palma, ket nagtoldada sadiay.

¹⁰ Ket nagluasda sadiay Elim, ket nagtoldada iti abay ti Baybay a Nalabaga.

¹¹ Ket nagluasda nanipud Baybay a Nalabaga, ket nagtoldada iti let-ang ti Sin.

¹² Ket nagluasda nanipud let-ang ti Sin ket nagtoldada idiay Dofia.

¹³ Ket nagluasda nanipud Dofia ket nagtoldada idiay Alus.

¹⁴ Ket nagluasda nanipud Alus, ket nagtoldada sadiay Refidim, idiay awan idi iti danum nga inumen dagiti tattao.

¹⁵ Ket nagluasda nanipud Refidim, ket nagtoldada iti let-ang ti Sinai.

¹⁶ Ket nagluasda nanipud let-ang ti Sinai, ket nagtoldada idiay Kibrot-hataava.

¹⁷ Ket nagluasda nanipud Kibrot-hataava, ket nagtoldada idiay Haserot.

¹⁸ Ket nagluasda nanipud Haserot, ket nagtoldada idiay Ritma.

¹⁹ Ket nagluasda nanipud Ritma, ket nagtoldada idiay Rimmon-peres.

²⁰ Ket nagluasda nanipud Rimmon-peres, ket nagtoldada idiay Libna.

²¹ Ket nagluasda nanipud Libna, ket nagtoldada idiay Rissa.

²² Ket nagluasda nanipud Rissa ket nagtoldada idiay Ceelata.

²³ Ket nagluasda nanipud Ceelata ket nagtoldada idiay bantay Sefer.

²⁴ Ket nagluasda nanipud bantay a Sefer ket nagtoldada idiay Harada.

²⁵ Ket nagluasda nanipud Harada ket nagtoldada idiay Maselot.

²⁶ Ket nagluasda nanipud Maselot ket nagtoldada idiay Tahat.

²⁷ Ket nagluasda nanipud Tahat ket nagtoldada idiay Tara.

²⁸ Ket nagluasda nanipud Tara, ket nagtoldada idiay Mitca.

²⁹ Ket nagluasda nanipud Mitca ket nagtoldada idiay Hasmona.

³⁰ Ket nagluasda nanipud Hasmona ket nagtoldada idiay Moserot.

³¹ Ket nagluasda nanipud Moserot ket nagtoldada idiay Bene-jaacan.

³² Ket nagluasda nanipud Bene-jaacan, ket nagtoldada idiay bantay a Giddad.

³³ Ket nagluasda nanipud bantay a Giddad, ket nagtoldada idiay Jotbata.

³⁴ Ket nagluasda nanipud Jotbata, ket nagtoldada idiay Abrona.

³⁵ Ket nagluasda nanipud Abrona, ket nagtoldada idiay Esion-geber.

³⁶ Ket nagluasda nanipud Esion-geber; ket napanda idiay let-ang ti Zin, (isu met laeng ti Cades.)

³⁷ Ket nagluasda nanipud Cades, ket nagtoldada idiay bantay ti Hor, iti igid ti daga nga Edom.

³⁸ Ket ni Aaron a padi simmang-at iti bantay Hor iti panagbilin ni Jehova, ket natay idiay, iti maicapat a pulo a tawen a calpasan ti ipapanaw dagiti annac ti Israel iti daga nga Egipto iti maicalima a bulan, iti umuna nga aldaw ti bulan.

³⁹ Ket ni Aaron agtawen idi iti sangagasut, dua pulo ket tallo idi natay idiay bantay Hor.

⁴⁰ Ket ti Cananeo, nga ari ti Arad, a nagnaed iti Abagatan iti daga ti Canaan, naammoanna ti idadateng dagiti annac ti Israel.

⁴¹ Ket nagluasda nanipud bantay Hor, ket nagtoldada idiay Salmona.

⁴² Ket nagluasda nanipud Salmona, ket nagtoldada idiay Punon.

⁴³ Ket nagluasda nanipud Punon, ket nagtoldada idiay Obot:

⁴⁴ Ket nagluasda nanipud Obot, ket nagtoldada idiay Ige-abarim, iti igid ti Moab.

⁴⁵ Ket nagluasda nanipud Ige-abarim, ket nagtoldada idiay Dibon-gad.

⁴⁶ Ket nagluasda nanipud Dibon-gad, ket nagtoldada idiay Almondiblataim.

⁴⁷ Ket nagluasda nanipud Almondiblataim, ket nagtoldada idiay banbantay ti Abarim, iti sango ti Nebo.

⁴⁸ Ket nagluasda nanipud ti banbantay ti Abarim, ket nagtoldada iti tantanap ti Moab nga abay ti Jordan idiay Jerico.

⁴⁹ Ket nagtoldada iti asideg ti Jordan, nanipud Beth-jesimot agingga iti Abel-sitim iti tantanap ti Moab.

⁵⁰ Ket ni Jehova nakisao ken Moises idiay tantanap ti Moab iti abay ti Jordan, a kinunana,

⁵¹ Ibagam cadagiti annac ti Israel ket saoem cadacuada, No aglasatcayo iti Jordan a mapan iti daga a Canaan.

⁵² Pasiaenyonto ngarud amin nga agnaed iti daga manipud sangoananyo, ket dadaelenyonto amin a binalinbalin a batbatoda, ket dadaelenyonto amin dagiti sinocog a ladladawanda, ket rebbaenyonto amin a nangato a disdissoda:

⁵³ Ket alaenyonto a tagicuaen ti daga, ket agnaedcayo sadiay; ta cadacayo ti nangtedac iti daga tapno tagicuaenyo.

⁵⁴ Ket tawidenyonto ti daga iti ginasanggasat a mayannurot cadagiti famfamiliayo; cadagiti adadu ti pangtedanyonto iti ad-adu a tawid, ket cadagiti basbassit itedmonto ti basbassit a tawid: ti gasat a maipatang iti uray asino a tao, dayta ti cucuananto; iti mayannurot cadagiti capcaputotan dagiti ammayo tawidenyonto.

⁵⁵ Ngem no dicayto pasiaen dagiti agnaed iti daga manipud iti sangoyo, no casta dagidiay a batienyonto cadacuada isudanto ti cas macasulsulec cadagiti matmatayo, ken cas sisiit cadagiti bacbacrangyo, ket isudanto ti mangsingsinga cadacayo iti daga a pagnaedanyo.

⁵⁶ Ket agbanagto a cas pinanunotco nga aramiden cadacuada, casta ti aramidecto cadacayo.