Numero 32 - Ti Biblia (1973)

Ni Ruben ken ni Gad ken ti guddua ti caputotan ni Manases pagtaenganda ti Galaad.

¹ Ita dagiti annac ni Ruben ken dagiti annac ni Gad addaanda idi iti nagpaiduma a caadu nga an-animal: ket idi nakitada ti daga a Jazer, ken ti daga a Galaad, nga adtoy, lugar idi a maysa a maipaay iti an-animal;

² Dagiti annac ni Gad ken dagiti annac ni Ruben immayda ket nakisaoda cada Moises ken Eleazar a padi, ken cadagiti pangpangoloen ti gimong, a kinunada,

³ Ti Atarot ken ti Dibon ken ti Jazer ken ti Nimra, ken ti Hesbon ken ti Eleale, ken ti saban ken ti Nabo, ken ti Beon.

⁴ Ti daga a ni Jehova dinadaelna iti sango ti gimong ti Israel, isu ti maysa a daga a tumutop iti animal, ket dagiti ad-adipenmo adda an-animalda.

⁵ Ket isuda kinunada, No nasaracanmi coma ti parabur iti imatangmo, ipalubosmo coma a maited daytoy a daga cadagiti ad-adipenmo a maysa a tagicuaenda, ta dinacami ipan iti ballasiw ti Jordan.

⁶ Ket ni Moises kinunana cadagiti annac ni Gad ken cadagiti annac ni Ruben, Mapanto dagiti cacabsatyo iti gubat, ket dacayo agtutugawcayto ditoy?

⁷ Ket ania ti gapuna a pagtacrotenyo ti puso dagiti annac ti Israel a mapan iti daga nga inted cadacuada ni Jehova?

⁸ Castoy ti inaramid dagiti ammayo idi imbaonco ida nanipud Cades-barnea a mangkita iti daga.

⁹ Ta idi simmang-atda iti lobong ti Escol, ket nakitada ti daga, pinatacrotda ti puso dagiti annac ti Israel, tapno dida sumrec iti daga nga inted cadacuada ni Jehova.

¹⁰ Ket ti unget ni Jehova simged iti daydi nga aldaw ket insapatana, a kinunana,

¹¹ Pudno nga awan cadagiti tattao a naggapu sadi Egipto manipud agtawen iti duapulo ken agpangato, ti macakitanto iti daga nga insapatac ken Abraham, Isaac ken Jacob; gapu ta saanda a simmurot a naananay caniac:

¹² Malacsid ni Caleb nga anac a lalaki ni Jefone a Cenezeo, ken ni Josue nga anac a lalaki ni Nun, gapu ta sinurotda a naananay ni Jehova.

¹³ Ket ti pungtot ni Jehova simged a naibusor iti Israel, ket inaramidna ida nga agpagnapagna nga agalla-alla iti let-ang itu uppat a pulo a tawen, nga inggana iti di-naibus ti amin a caputotan a nagaramid iti dakes iti sango ni Jehova.

¹⁴ Ket, adtoy, dacayo timmacdercayo a sono dagiti ammayo, a maysa a nayon dagiti managbasol a tattao, tapno degdeganyo ti nacaro nga unget ni Jehova iti Israel.

¹⁵ Tanno simmiasicay kencuana, isu baybay-an nanto manen ida iti let-ang; ket dacayo dadaelenyonto amin daytoy nga ili.

¹⁶ Ket isuda immasidegda kencuana, ket kinunada, Mamangoncamto ditoy iti pagap-aponan dagiti an-animalmi, ken cadagiti il-ili a maipaay cadagiti babassitmi:

¹⁷ Ngem no dacami sisasaganacamto laeng a siigam a mapan iti sangoanan ti Israel, inggana iti maiyegmi ida iti lugarda: ket dagiti babassitmi agtaengdanto cadagiti il-ili a nabacudan, maipuon cadagiti agnaed iti daga.

¹⁸ Dicamto agsubli cadagiti balbalaymi inggana iti di-agtagicua dagiti annac ti Israel, tumunggal maysa a tao, iti tawidna.

¹⁹ Ta dicamto makipagtawid cadacuada iti sabali a bangir ti Jordan ken sangoananna: gapu ta naibatang cadacami a tawidmi daytoy bangir a dayaen ti Jordan.

²⁰ Ket ni Moises kinunana cadacuada, No aramidenyonto daytoy, no agigamcayto tapno incayo iti sangoanan ni Jehova a makigubat,

²¹ Ket tunggal tao a nagigam cadacayo lasatennanto ti Jordan iti sango ni Jehova, agingga iti dina mapacsiat dagiti cabcabusorna iti sangoananna,

²² Ket ti daga maiturayanto iti sangoanan ni Jehova: iti calpasanna, agsublicayto ket awanto ti basolyo ken Jehova ken iti Israel; ket daytoy a daga cucuayonto a pagtagicuaan iti sango ni Jehova.

²³ Ngem no dicayto aramiden ti casta, adtoy, macabasolcayo ken Jehova: ket dinto bumurong a ti basolyo sarakennacayto.

²⁴ Mamangoncayo cadagiti il-ili a maipaay cadagiti babassityo, ken pagapaponan dagiti carcarneroyo; ket aramidenyonto dagidiay a nagaon iti ngiwatyo.

²⁵ Ket dagiti annac ni Gad, ken dagiti annac ni Ruben nakisaoda ken Moises, a kinunada, Dagiti ad-adipenmo aramidendanto ti cas ibilin ti apoc.

²⁶ Dagiti annacmi a babassit, assawami, dagiti pangpangenmi ken ar-arbanmi agyandanto cadagiti il-ili ti Galaad:

²⁷ Ngem dagiti ad-adipenmo, tunggal lalaki a nagigam a makigubat, agballasiwdanto iti sangoanan ni Jehova, tapno makibacalda cas sao ni apoc.

²⁸ Casta ti panangited ni Moises iti bilin a maipapan cadacuada ken Eleazar a padi, ken ni Josue nga anac a lalaki ni Nun, ken cadagiti pangpangolo dagiti balbalay dagiti amma dagiti capcaputotan dagiti annac ti Israel.

²⁹ Ket ni Moises sinaona cadacuada, No dagiti annac ni Gad ken dagiti annac ni Ruben makipagbaliwdanto cadacayo iti Jordan, tunggal lalaki a nagigam tapno makibacal iti sangoanan ni Jehova, ket ti daga maparmecto iti sangoyo; no casta itedyonto cadacuada a tagicuaenda ti daga ti Galaad:

³⁰ Ngem no isuda saandanto a makipagbaliw cadacayo a nagigam, makipagtagicuadanto cadacayo iti daga a Canaan.

³¹ Ket dagiti annac ni Gad ken dagiti annac ni Ruben simmungbatda, a kinunada, Cas ni Jehova sinaona cadagiti ad-adipenmo, casta ti aramidenminto.

³² Dacami bumallasiwcamto a siiigam iti sangoanan ni Jehova iti daga a Canaan, ket ti cucua a tawidmi mabatinto cadacami iti ballasiw ti Jordan.

³³ Ket ni Moises intedna cadacuada, nga isuda dagiti annac ni Gad ken annac ni Ruben, ken iti caguddua ti caputotan ni Manases, nga anac ni Jose, ti pagarian ni Sehon, nga ari dagiti Amorreo, ken ti pagarian ni Og nga ari ti Basan, ti daga maisacup cadagiti il-ilina agraman bedbeddengda, a dagiti met laeng il-ilina ti daga a nailawlaw.

³⁴ Ket dagiti annac ni Gad binangonda ti Dibon, ken Atarot, ken Aroer;

³⁵ Ken ti Atrot-sofan, ken Jazer, ken ti Jogbaa;

³⁶ Ken Bet-nimra, ken Betaran: dagiti il-ili a nasarikedkedan, ken pagaponan dagiti carcarnero.

³⁷ Ket dagiti annac ni Ruben binangonda ti Hesebon, ken Eleale, ken Kiriataim;

³⁸ Ken Nebo, ken Baal-meon, (dagiti nagnaganda nasuctanda), ken Sibma, ket binaliwanda ti nagnagan dagiti il-ili a binangonda.

³⁹ Ket dagiti annac ni Maquir nga anac a lalaki ni Manases, napanda idiay Galaad, ket innalada, ket sinallinanda dagiti Amorreo a nagyan idiay.

⁴⁰ Ket ni Moises intedna ti Galaad ken Maquir nga anac a lalaki ni Manases, ket isu nagnaed idiay.

⁴¹ Ket ni Jair nga anac a lalaki ni Manases napan ket innalana dagiti il-ili sadiay, ket ninaganda ida iti Havoth-jair.

⁴² Ket ni Noba napan ket innalana ti Kenat, ken dagiti purpurocna, ket ninaganna iti Noba cas ti naganna met laeng.