Numero 31 - Ti Biblia (1973)

Ti pannacapatay dagiti Madianitas. Ti pannacabingay ti sinamsam.

¹ Ket ni Jehova nakisao ken Moises, a kinunana,

² Pagibalsem dagiti annac ti Israel cadagiti Madianitas: ti calpasanna maitiponcanto cadagidi cacabagiam.

³ Ket ni Moises imbagana iti ili, a kinunana, Pagigamenyo ti dadduma a lallaki cadacayo a maipaay iti gubat, ta incayo a maibusor iti Madian.

⁴ Cadagiti amin caputotan ti Israel ibaonyonto iti gubat ti sangaribu iti tunggal caputotan.

⁵ Iti casta naipan cadagiti rinibribu a Israel ti sangaribu iti tunggal caputotan, sangapulo ket dua a ribu ti nagigam a maipaay iti gubat.

⁶ Ket ni Moises imbaonna ida a makigubat, ti sangaribu iti tunggal caputotan, isuda ken ni Finees nga anac a lalaki ni Eleazar a padi, ti mapan iti gubat, nga incuyogda dagiti vasvaso ti santuario, ken dagiti tangguyob cadagiti im-imada nga agservi a pamagariwawa.

⁷ Ket isuda nakigubatda a nakibusor iti Madian, cas imbilin ni Jehova ken Moises: ket pinatayda amin a lallaki.

⁸ Ket pinatayda dagiti ar-ari ti Madian a nairaman cadagiti pinatayda; ni Evi, ken ni Recem, ken ni Zur, ken ni Hur, ken ni Reba, ti lima nga ar-ari ti Madian: ni Balaam met nga anac a lalaki ni Beor pinatayda iti igam.

⁹ Ket dagiti annac ti Israel innalada a kinayawan dagiti babbai iti Madian ken dagiti babassitda; ket amin nga an-animalda ken amin a pangpangenda, ken amin a sansanicuada, innalada a samsam.

¹⁰ Ket amin dagiti il-ilida cadagiti disdisso a nagnaedanda, ken amin a nagpacpacarsuanda, pinuuranda, iti apuy.

¹¹ Ket innalada amin a samsam ken amin a nacayawan, tao man ken animal.

¹² Ket impanda dagiti cayawda, ken ti natucmaan, ken ti samsam iti yan da Moises ken Eleazar a padi, ken iti yan ti gimong dagiti annac ti Israel, iti yan ti pacarso iti tantanap ti Moab, nga adda iti abay ti Jordan sadi Jerico.

¹³ Ket ni Moises, ken ni Eleazar a padi, ken amin dagiti pangpangoloen ti gimong, napanda sinabat ida iti ruar ti pacarso.

¹⁴ Ket ni Moises nagunget cadagiti turturayen ti buyot, a capcapitan dagiti rinibribu, ken capcapitan dagiti ginasut, a naggapu iti panagservi iti gubat.

¹⁵ Ket ni Moises kinunana cadacuada, Biniagyo met la amin a babai?

¹⁶ Adtoy, dagitoy ti nacaaramidan ti salungasing dagiti annac ti Israel, a maicaniwas ken Jehova, gapu iti ballaag ni Balaam, iti panggep ni Peor, ket isu ti gapuna ti caadda idi ti angol iti gimong ni Jehova.

¹⁷ Ita ngarud, patayenyo amin a lallaki cadagiti ub-ubbing, ken patayenyo amin a babbai a nacaammo iti lalaki iti pannakicaiddana kencuana.

¹⁸ Ngem dagup amin a babbai nga ub-ubbing, a dina pay naramanan ti lalaki iti pinnakicaidda kencuana, biagenyo ida cadacayo.

¹⁹ Ket agtaengcayo iti ruar ti pacarso iti pito nga aldaw: siasinoman a nacapatay iti siasinoman a tao ken siasinoman a simmagid iti napapatay, dalusanyo dagiti bagbagiyo iti maicatlo, ken iti maicapito nga aldaw, dacayo ken dagiti kinayawanyo.

²⁰ Ket ti maipapan iti tunggal pagan-anay, ken amin a naaramid iti lalat, ken amin a naaramid iti dutdut ti calding, ken amin a naaramid iti cayo, dalusanyo dagiti bagbagiyo.

²¹ Ket ni Eleazar a padi kinunana cadagiti lallaki ti gubat, a napan iti gubatan, Daytoy ti alagaden ti linteg nga ni Jehova imbilinna ken Moises:

²² Ngem ti balitoc, ken ti pirac, ti suer, ti landoc, ti estano, ken ti buli,

²³ Amin a di marunaw iti apuy, pailabasyonto iti apuy, ket nadalusto; nupay casta madalusanto iti danum ti kinarugit, ket amin a marunaw iti apuy, isawsawyonto iti danum.

²⁴ Ket dacayo labaanyonto dagiti pagan-anayyo iti maicapito nga aldaw, ket nadaluscayto, ket iti calpasanna sumreccayto iti pacarso.

²⁵ Ket ni Jehova nagsao ken Moises, a kinunana,

²⁶ Alaenyo ti dagup ti samsam a naalayo, tao man ken animal, sica ken ni Eleazar a padi, ken dagiti pangpangoloen ti balbalay dagiti amma ti gimong:

²⁷ Ket binglayenyo ti samsam iti agcadua nga apag: cadagiti lallaki a nasursuroan iti gubat, a rimmuar iti bacal, ken iti dagup ti gimong:

²⁸ Ket mangituyangcayo iti maysa a buis ken Jehova cadagiti lalaki ti gubat a rimmuar a nakibacal: maysa a cararua iti lima gasut, agpadpadada dagiti tattao ken dagiti vacvaca a lallaki, ken dagiti as-asno, ken dagiti pangpangen.

²⁹ Alaem iti daytoy ti caguddua, ket itedmo ken Eleazar a padi a maipaay a daton a maitayag ken Jehova.

³⁰ Ket iti caguddua a biang dagiti annac ti Israel, alaemto ti maysa iti tunggal limapulo cadagiti tattao, cadagiti vacvaca, cadagiti as-asno, ken cadagiti pangen, a cadagiti met laeng amin nga an-animal, ket itedmo ida cadagiti Levitas, a mangsalimetmet ti panagannong iti tabernaculo ni Jehova.

³¹ Ket ni Moises ken ni Eleazar a padi inaramidda ti cas imbilin ni Jehova ken Moises.

³² Ita ti natucmaan, malacsid ti maisuroc a samsam nga innala dagiti lallaki ti gubat, innem a gasut pito pulo, ket lima a ribu a carcarnero,

³³ Ken pitopulo ket dua a ribu a vacvaca,

³⁴ Ken innem a pulo ket maysa a ribu nga as-asno,

³⁵ Ken tallopulo ket dua a ribu a tattao a dagup dagiti babbai a di nacaammo iti lalaki iti pannakicaddana kencuana.

³⁶ Ket ti guddua nga isu ti binglay dagiti rimmuar iti gubat, ti bilangda isu ti tallo gasut tallopulo ket pito a ribu, ken limagasut a carcarnero:

³⁷ Ket ti carcarnero a buis ken Jehova, innem a gasut ket pitopulo ket lima.

³⁸ Ket dagiti vacvaca, tallopulo ket innem a ribu; cadagitoy, pitopulo ket dua ti buis ken Jehova.

³⁹ Ket dagiti as-asno tallopulo a ribu ket limagasut; cadagitoy, innem a pulo ket maysa ti buis ken Jehova.

⁴⁰ Ket dagiti tattao sangapulo ket innem a ribu; cadacuada, tallopulo ket dua a tattao ti buis ken Jehova.

⁴¹ Ket ni Moises intedna ken Eleazar a padi ti buis a daton a maitayag ken Jehova, cas imbilin ni Jehova ken Moises.

⁴² Ket iti caguddua a biang dagiti annac ti Israel, nga inlasin ni Moises cadagiti lallaki a nakigubat,

⁴³ (Ita ti caguddua a bagi ti gimong, tallogasut tallopulo ket pito a ribu ken lima gasut a carcarnero,

⁴⁴ Ken tallopulo ket innem a ribu a vacvaca,

⁴⁵ Ken tallopulo a ribu ken lima gasut nga as-asno,

⁴⁶ Ken sangapulo ket innem a ribu a tattao)

⁴⁷ A iti caguddua met laeng a biang dagiti annac ti Israel, innala ni Moises ti maysa iti tunggal limapulo, tao man ken animal, ket intedna ida cadagiti Levitas a mangaywan ti panagannong iti tabernaculo ni Jehova; cas imbilin ni Jehova ken Moises.

⁴⁸ Ket dagiti agtuturay a nagturay cadagiti rinibu a buyot, dagiti capcapitan ti rinibu, ken dagiti capcapitan dagiti ginasut immasidegda ken Moises.

⁴⁹ Ket kinunada ken Moises, Dagiti ad-adipenmo innalada ti bilang dagiti lallaki a makigubat nga adda iti babaen ti panagbilinmi, ket awan agcurang a maysa a tao cadacami.

⁵⁰ Ket inyegmi ti daton ken Jehova a tunggal maysa a tao nagun-odanna nga al-alicamen a balitoc, cawcawar, ken pulpulceras, singsingsing a pagmarca, ar-aritos, ken cucuentas, tapno aramiden a pannacaabbong ti cararuami iti sango ni Jehova.

⁵¹ Ket ni Moises ken ni Eleazar a padi inawatda cadacuada ti balitoc nga isu dagiti napanday nga al-alicamen.

⁵² Ket amin a balitoc ti daton a maitayag nga indatagda ken Jehova, iti cucua dagiti capcapitan ti rinibu, ken dagiti capcapitan dagiti ginasgasut, sangapulo ket innem a ribu, pito a gasut ket lima pulo a siclo.

⁵³ (Ta dagiti lallaki ti gubat nagsamsamda, tumunggal maysa iti agpaay kencuana.)

⁵⁴ Ket ni Moises ken ni Eleazar a padi inawatda ti balitoc cadagiti capcapitan dagiti rinibribu ken ginasgasut, ket inyegda iti tolda ti gimong a maysa a panglaglagipan a maipaay cadagiti annac ti Israel iti sango ni Jehova.