Numero 30 - Ti Biblia (1973)

Ti linlinteg cadagiti carcari.

¹ Ket ni Moises nakisao cadagiti pangpangolo dagiti capcaputotan dagiti annac ti Israel, a kinunana, Daytoy ti imbilin ni Jehova.

² No ti maysa a tao mangipaay iti maysa a cari ken Jehova, wenno ipanecnecna iti sapata ti panangisinggalutna iti cararuana iti maysa, a singgalut, dinanto labsingen ti saona: aramidennanto cas mayanatup iti amin nga agaon iti ngiwatna.

³ Casta met ti maysa a babai no ipaayna ti maysa a cari ken Jehova, ket isinggalutna ti bagina iti maysa a singgalut, idinto nga adda iti balay ni amana iti kinaubingna,

⁴ Ket mangngeg ni amana ti carina, ken ti singgalut a nangisinggalutanna iti cararuana, ket ni amana nagulimec kencuana: no casta amin a carina matungpalto, tunggal singgalutna a nangisinggalutanna iti cararuana mapasingkedanto.

⁵ Ngem no ni amana tubngarenna iti aldaw a pannacangngegna: awan cadagiti carina, wenno singgalutna a nangisinggalutanna iti cararuana, ti mapasingkedanto: ket ni Jehova pacawanennanto, gapu ta pawilan ni amana.

⁶ Ngem no ti babai maasawaan iti caadda kencuana dagiti carina, wenno ti napasindayag a balicas dagiti bibigna, a nangisinggalutanna iti cararuana;

⁷ Ket ti asawana agdengdengngeg ket agulimec kencuana iti aldaw a pannacangngegna: no casta dagiti carcarina mapatuloydanto, ket dagiti singgalutna a nangisinggalutanna iti cararuana matungpalto.

⁸ Ngem no ti asawana a lalaki iparitna kencuana iti aldaw a pannacangngegna; no casta paubbawennanto ti cari nga inaramid ti babai ken ti napasindayag a balicas dagiti bibigna, a nangisinggalutanna iti cararuana: ket ni Jehova pacawanennanto.

⁹ Ngem ti cari ti maysa a balo a babai wenno ti nakisina, pudno a tunggal maysa a nangisinggalutanna iti cararuana mapatalgedanto kencuana.

¹⁰ Ngem no ti babai nagcari iti balay ni asawana, wenno insinggalutna ti cararuana, iti singgalut a sinapataan,

¹¹ Ket ni asawana nangngegna, ket nagulimec kencuana, ket saanna a pinaritan; no casta amin dagiti carcarina mapatuloyto, ken tunggal singgalut a nacaisinggalutan ti cararuana mapatuloyto.

¹² Ngem no ni asawana inucasna ida ken inucasanna iti aldaw a pannacangngegna; uray ania ngarud a nagtaud cadagiti bibigna a maipapan cadagiti carcarina, wenno maipapan ti nacaisinggalutan ti cararuana, dinto agpatuloy: ni asawana inucasna ida; ket ni Jehova pacawanennanto.

¹³ Tunggal cari ken tunggal insapata a singgalut tapno agladingit ti cararua, ni asawana a lalaki mabalinna a patalgedan, wenno ni asawana a lalaki mabalinna a ucasen.

¹⁴ Ngem no ni lalaki nga asawana cancanayon nga agulimec kencuana iti inaldawaldaw; no casta patalgedanna amin a carcari ti babai, wenno amin a singgalut nga adda kencuana: isu pinatalgedanna ida, gapu ta nagulimec kencuana iti aldaw a pannacangngegna cadagita.

¹⁵ Ngem no ucasenna ida, ken saawenna calpasan ti pannacangngegna cadagita; no casta isu ti mangawitto iti kinadakes ti babai.

¹⁶ Dagitoy isuda ti al-alagaden nga imbilin ni Jehova ken Moises, agpaay iti lalaki ken iti asawana, iti ama ken iti anac a babai, iti kinaubingna ti balay ni amana.