Numero 3 - Ti Biblia (1973)

Ti pannacabilang dagiti Levitas. Ti pannacasubbot dagiti inauna nga annac.

¹ Dagitoy ita dagiti capcaputotan ni Aaron ken ni Moises iti aldaw a pannakisao idi ni Jehova ken Moises idiay bantay Sinai.

² Ket dagitoy dagiti nagnagan dagiti annac a lallaki ni Aaron: Ni Nadab nga inauna, ni Abiu, ni Eleazar, ken ni Itamar.

³ Dagitoy dagiti nagnagan dagiti annac a lallaki ni Aaron, dagiti papadi a napolotan, isuda a kinonsagrarna nga agannong iti takem ti padi.

⁴ Ket ni Nadab ken ni Abiu natayda iti saclang ni Jehova idi nangidatonda iti apuy a sabali iti sango ni Jehova idiay let-ang ti Sinai, ket ni Eleazar ken ni Itamar nagannongda iti takem ti padi iti imatang ni Aaron nga amada.

⁵ Ket ni Jehova nakisao ken Moises, a kinunana,

⁶ Yasidegmo ti caputotan ni Levi, ket ipanmo ida iti sango ni Aaron a padi tapno agservida kencuana.

⁷ Ket isuda salimetmetandanto ti italecna ken ti italec ti dagup ti gimong iti sango ti tolda ti gimong tapno aramidenda ti annongen iti tabernaculo.

⁸ Ket isuda aywanandanto amin dagiti al-alicamen ti tolda ti gimong, ken ti italec dagiti annac ti Israel, a panagservi iti tabernaculo.

⁹ Ket sica itedmonto dagiti Levitas ken Aaron, ken cadagiti annacna a lallaki: isuda maiteddanto amin kencuana iti biang dagiti annac ti Israel.

¹⁰ Ket tudingamto ni Aaron ken dagiti annacna a lallaki, ket salimetmetandanto ti kinapadida: ket ti gangannaet nga umasideg mapapatayto.

¹¹ Ket ni Jehova nagsao ken Moises, a kinunana,

¹² Ket adtoy, siac, innalac dagiti Levitas cadagiti annac ti Israel a sucat dagiti amin nga inauna nga anac, a manglucat iti aanacan cadagiti annac ti Israel; ket dagiti Levitas isudanto ti cucuac:

¹³ Ta amin nga inauna nga anac cucuac ida; idi aldaw a panangcabilco iti isu-amin nga inauna nga anac iti daga nga Egipto, a pinasantoca maipaay caniac ti dagup ti inauna nga anac iti Israel, tao man ken animal; cucuacto ida: siac ni Jehova.

¹⁴ Ket ni Jehova nakisao ken Moises idiay let-ang ti Sinai, a kinunana.

¹⁵ Bilangem dagiti annac ni Levi cadagiti balbalay dagiti ammada, cadagiti finamfamilia cadacuada: tunggal lalaki nga agtawen manipud iti maysa a bulan ken agpangato bilangem ida.

¹⁶ Ket ni Moises binilangna ida cas iti sao ni Jehova, cas naibilin kencuana.

¹⁷ Ket dagitoy dagiti annac a lallaki ni Levi iti nagnaganda: ni Gerson, ni Coat ken ni Merari.

¹⁸ Ket dagitoy ti nagnagan dagiti annac ni Gerson iti finamfamiliada; ni Libni ken ni Simei.

¹⁹ Ket dagiti annac a lallaki ni Coat iti finamfamiliada: ni Amram, ni Izhar, ni Hebron, ken ni Uziel.

²⁰ Ket dagiti annac a lallaki ni Merari iti finamfamiliada: ni Mahali ni Musi. Dagitoy isuda dagiti famfamilia dagiti Levitas a mayannurot cadagiti balbalay dagiti ammada.

²¹ Iti Gerson adda idi ti familia dagiti Libnitas ken ti familia dagiti Semitas: dagitoy isuda ti famfamilia dagiti Gersonitas.

²² Dagidiay a nabilang cadacuada a mayannurot iti bilang ti amin a lallaki nanipud agtawen iti maysa a bulan ken agpangato, a dagidiay met laeng nabilang cadacuada, pito a ribu ket lima a gasutda.

²³ Dagiti famfamilia dagiti Gersonitas agpacarsodanto iti licudan ti tabernaculo iti bangirna iti laud.

²⁴ Ket ti pangolo ti balay dagiti amma dagiti Gersonitas isunto ni Eliasaf nga anac a lalaki ni Lael.

²⁵ Ket dagiti annac a lallaki ni Gerson iti tolda ti gimong aywanandanto ti tabernaculo, ken ti Tolda ken linungna ken ti bengbe iti ruangan ti tolda ti gimong.

²⁶ Ken dagiti cortina ti parangan nga adda iti sikigan ti tabernaculo, ken iti sikigan nga aglawlaw ti altar, ken dagiti lublubidna a maipaay iti amin a pacaiservianna.

²⁷ Ket iti Coat adda idi ti familia dagiti Amramitas, ken ti familia dagiti Izeharitas, ken ti familia dagiti Hebronitas, ken ti familia dagiti Ozielitas: dagitoy isuda dagiti famfamilia dagiti Coatitas.

²⁸ Cas mayannurot iti bilang ti amin a lalaki, manipud agtawen iti maysa a bulan ken agpangato, adda walo a ribu ket innem a gasutda a mangaluad iti pannacaaywan ti santuario.

²⁹ Dagiti famfamilia dagiti annac a lallaki ni Coat agpacarsodanto iti sikigan nga abagatan ti tabernaculo.

³⁰ Ket ti pangolo cadagiti balbalay dagiti amma dagiti famfamilia dagiti Coatitas isunto ni Elizefan nga anac a lalaki ni Uzziel.

³¹ Ket aywanandanto ti lacasa, ken ti lamisaan, ken ti candelero, ken dagiti alaltar, ken dagiti vasvaso ti santuario a pagannonganda, ken ti abbong ken amin nga al-alicamenna.

³² Ket ni Eleazar nga anac a lalaki ni Aaron a padi isunto ti pangolo dagiti pangpangolo dagiti Levitas ket imatonanna ida a mangsalsalimetmet ti pannacaaluad ti santuario.

³³ Iti Merari adda idi ti familia dagiti Mahalitas, ken ti familia dagiti Musitas: dagitoy isuda dagiti famfamilia ni Merari.

³⁴ Ket dagidiay nabilang cadacuada a mayannurot iti bilang ti amin a lalaki, nanipud agtawen iti maysa a bulan ken agpangato, innem a ribu ket duagasutda.

³⁵ Ket ti pangolo ti balay dagiti amma dagiti famfamilia ni Merari isu idi ni Suriel nga anac a lalaki ni Abihail: isudanto ti agpacarso iti akinamianan a sikigan ti tabernaculo.

³⁶ Ket ti natuding nga aywanan dagiti annac ni Merari isunto dagiti tabtabla ti tabernaculo, ken dagiti balbalunetna, ken dagiti adadigina, ken dagiti batbatayna, ken amin nga ar-aruatna, ken amin nga iservi kencuana;

³⁷ Ken dagiti adadigi ti paraangan nga aglawlaw ken dagiti batbatayda, ken dagiti paspasocda ken dagiti lublubidda.

³⁸ Ket dagiti agpacarso iti sango ti tabernaculo iti daya a sangoanan ti tolda ti gimong nga agpaleleggacan ti init, isudanto da Moises ken Aaron, ken dagiti annacna a lallaki a mangaluad ti pannacaaywan ti santuario nga aywanan dagiti annac ti Israel; ket ti gangannaet nga umasideg mapapatayto.

³⁹ Amin dagiti nabilang cadagiti Levitas a binilang da Moises ken Aaron iti panagbilin ni Jehova, a finamfamiliada dagup dagiti lallaki nanipud iti maysa a bulan ken agpangato duapulo ket dua a ribuda.

⁴⁰ Ket ni Jehova kinunana ken Moises, Bilangem amin nga inauna nga annac a lallaki cadagiti annac ti Israel, manipud iti agtawen iti maysa a bulan ken agpangato, ket alaem ti bilang dagiti nagnaganda.

⁴¹ Ket alaemto nga agservi caniac dagiti Levitas (siac ni Jehova) a sunoanda dagiti isu-amin nga inauna nga annac cadagiti annac ti Israel; ken ti an-animal dagii Levitas a sucat dagiti inauna nga annac cadagiti an-animal dagiti anac ti Israel.

⁴² Ket ni Moises binilangna, cas imbilin ni Jehova kencuana, amin dagiti inauna cadagiti annac ti Israel.

⁴³ Ket amin nga inauna a nayanac a lallaki, cas mayannurot iti bilang dagiti nagnagan, nanipud agtawen iti maysa a bulan ken agpangato, cadagidiay a nabilang cadacuada duapulo ket dua a ribu, dua gasut ket pitopulo ket talloda.

⁴⁴ Ket ni Jehova nakisao ken Moises, a kinunana,

⁴⁵ Alaem dagiti Levitas a sucat dagiti amin nga inauna nga annac cadagiti annac ti Israel, ken dagiti an-animal dagiti Levitas a sucat dagiti an-animalda; ket dagiti Levitas isudanto ti cucuac: siac ni Jehova.

⁴⁶ Ket ti pannacasubbot dagiti dua gasut ket pitopulo ket tallo cadagiti inauna cadagiti annac ti Israel a suroc ken adaduana ngem iti bilang dagiti Levitas,

⁴⁷ Mangalacanto iti lima a siclo iti tunggal maysa nga olo; cas ti siclo ti santuario ti alaemto cadacuada, (ti siclo isu ti duapulo a gerah):

⁴⁸ Ket itedmonto ken Aaron ken cadagiti annacna a lallaki ti pirac a pangsubbot ti suroc ti bilangda.

⁴⁹ Ket ni Moises innalana cadacuada ti panubbot a pirac iti suroc ken ad-aduanna ngem dagiti nasubot gapu cadagiti Levitas;

⁵⁰ Cadagiti inauna cadagiti annac ti Israel, innalana ti pirac a sangaribu tallo gasut innem a pulo ket lima a siclo, a cas ti siclo ti santuario;

⁵¹ Ket ni Moises intedna ti panubbot a pirac ken Aaron ken cadagiti annacna a lallaki a mayabuloy iti sao ni Jehova, cas imbilin ni Jehova ken Moises.