Numero 29 - Ti Biblia (1973)

Datdaton ti maicapito a bulan.

¹ Ket iti maicapito a bulan, iti umuna nga aldaw ti bulan, addanto maysa a nasantoan a panaguummongyo; dicayto agaramid iti trabajo a panggedan isu ti maysa nga aldaw a panagaweng dagiti tangguyob cadacayo.

² Ket idatagyonto ti maysa a daton a mapuuran a maipaay a nabanglo a sayamusom ken Jehova, maysa a bumaro a vaca, maysa a carnero a lalaki, pito a cordero a lallaki a maysa ti tawenda, nga awan ti pilawda:

³ Ket ti datonda a macan, namayecmec nga harina a nagamayan iti lana, tallo nga apagcapullo a nayon ti vaca, dua nga apagcapullo a nayon ti carnero.

⁴ Ken maysa nga apagcapullo a nayon ti tunggal cordero cadagiti pito a cordero;

⁵ Ken maysa a calding a lalaki a maipaay a daton gapu iti basol, tapno aramiden a pacaabbonganyo.

⁶ Sabali laeng ti daton a mapuuran iti baro a bulan, ken ti datonna a macan, ken ti cancanayon a daton a mapuuran ken ti datonna a macan, ken dagiti datdatonda a mainum, cas mayannurot iti alagadenda, a maipaay a nabanglo a sayamusom, maysa a daton a maaramid iti apuy ken Jehova.

⁷ Ket iti maicasangapullo nga aldaw ti daytoy maicapito a bulan, addanto maysa a nasantoan a panaguummongyo; ket agladingitto dagiti cararuayo; dicayto agaramid iti uray ania a pagbannogan;

⁸ Ngem mangipaaycayto iti maysa a daton a mapuuran ken Jehova, a maipaay a nabanglo a sayamusom; maysa a bumaro a vaca, maysa a carnero a lalaki, pito a cordero a lallaki nga apagtawenda, isuda awanto cadacayo ti pacapilawanda;

⁹ Ket ti datonda a macan, namayecmec nga harina a nagamayan iti lana, tallo nga apagcapullo a nayon ti vaca, dua nga apagcapullo a nayon ti carnero,

¹⁰ Maysa nga apagcapullo a nayon ti tunggal cordero cadagiti pito a cordero;

¹¹ Maysa a calding a lalaki a maipaay a daton gapu iti basol; sabali laeng ti daton gapu iti basol ti pannacaabbong, ket ti daton mapuuran a cancanayon, ken ti datonna a macan, ken dagiti datdatonda a mainum.

¹² Ket iti maicasangapullo ket lima nga aldaw ti maicapito a bulan, addanto maysa a nasantoan a panaguummongyo; dicayto aramiden ti nadagsen a panagbannog, ket ngilinenyonto ti maysa a fiesta ken Jehova cadagiti pito nga aldaw:

¹³ Ket ipaayyonto ti maysa a daton a mapuuran, a maysa a daton a maaramid iti apuy, a nabanglo a sayamusom ken Jehova; sangapulo ket tallo a bumbumaro a vaca, dua a carnero a lallaki, sangapulo ket uppat a cordero a lallaki a maysa ti tawenda; isuda awanto ti pilawda.

¹⁴ Ket ti datonda a macan, namayecmec nga harina a nagamayan iti lana, tallo nga apagcapullo a nayon ti tunggal vaca cadagiti sangapulo ket tallo a vaca, dua nga apagcapullo a nayon ti tunggal carnero cadagiti dua a carnero.

¹⁵ Ken maysa nga apagcapullo a nayon ti tunggal cordero cadagiti sangapulo ket uppat a cordero:

¹⁶ Ken maysa a calding a lalaki a maipaay a daton gapu ti basol; sabali laeng ti cancanayon a daton a mapuuran, ti datonna a macan, ken ti datonna a mainum.

¹⁷ Ket iti maicadua nga aldaw idatagyonto ti sangapulo ket dua a bumbumaro a vaca, dua a carnero a lallaki, sangapulo ket uppat a cordero a lallaki a maysa ti tawenda, nga awan ti pilawda.

¹⁸ Ket ti datonda a macan, ken dagiti datdatonda a mainum a nayon dagiti vacvaca, nayon dagiti carcarnero, ken nayon dagiti corcordero, cas mayannurot iti bilangda, a mayalubog iti alagadenda:

¹⁹ Ken ti maysa a calding a lalaki a maipaay a daton gapu iti basol; sabali laeng ti cancanayon a daton a mapuuran, ken datonna a macan ken datonda a mainum.

²⁰ Ket iti maicatlo nga aldaw, sangapulo ket maysa a bumbumaro a vaca, dua a carnero a lallaki, sangapulo ket uppat a cordero a lallaki nga agtawen iti maysa, nga awan ti pilawda;

²¹ Ken ti datonda a macan, ken datdatonda a mainum, a nayon dagiti vacvaca, a nayon dagiti carcarnero, ken nayon dagiti corcordero, cas mayannurot iti bilangda a mayalubog iti alagaden:

²² Ken maysa a calding a lalaki a maipaay a daton gapu iti basol; sabali laeng ti daton a mapuuran a cancanayon, ken datonna a macan, ken ti datonna a mainum.

²³ Ket iti maicapat nga aldaw, sangapulo a bumbumaro a vaca, dua a carnero a lallaki, sangapulo ket uppat a cordero a lallaki a maysa ti tawenda, nga awan ti pilawda:

²⁴ Ti datonda a macan, ken datdatonda a mainum a nayon dagiti vacvaca, a nayon dagiti carcarnero, ken nayon dagiti corcordero, cas mayannurot iti bilangda a mayalubog iti alagaden:

²⁵ Ken ti maysa a calding a lalaki a maysa a daton gapu iti basol; sabali laeng ti cancanayon a daton a mapuuran, ti datonna a macan ken ti datonna a mainum.

²⁶ Ket iti maicalima nga aldaw, siam a bumbumaro a vaca, dua a carnero a lallaki a maysa ti tawenda, nga awan ti pilawda;

²⁷ Ken ti datonda a macan, ken datdatonda a mainum a nayon dagiti vacvaca, a nayon dagiti carcarnero, ken nayon dagiti corcordero, a mayannurot iti bilangda, a mayalubog iti alagaden:

²⁸ Ken maysa a calding a lalaki a daton gapu iti basol; sabali laeng ti cancanayon a daton a mapuuran ken ti datonna a macan, ken ti datonna a mainum.

²⁹ Ket iti maicanem nga aldaw, walo a bumbumaro a vaca, dua a carnero a lallaki, sangapulo ket uppat a cordero a lallaki a maysa ti tawenda nga awan ti pilawda:

³⁰ Ken ti datonda a macan, ken datdatonda a mainum a nayon dagiti vacvaca, nayon dagiti carcarnero, ken nayon dagiti corcordero, cas mayannurot iti bilangda a mayalubog iti alagaden:

³¹ Ken maysa a calding a lalaki a daton gapu iti basol; sabali laeng ti daton a mapuuran a cancanayon, ti datonna a macan, ken ti datonna a mainum.

³² Ket iti maicapito nga aldaw, pito a bumbumaro a vaca, dua a carnero a lallaki, sangapulo ket uppat a cordero a lallaki a tumawenen nga awan ti pilawda:

³³ Ken ti datonda a macan, ken dagiti datdatonda a mainum, a nayon dagiti vacvaca, nayon dagiti carcarnero, ken nayon dagiti corcordero, cas mayannurot iti bilangda a mayalubog iti alagaden:

³⁴ Ken maysa a calding a lalaki a daton gapu iti basol; sabali laeng ti cancanayon a daton a mapuuran, ti datonna a macan, ken datonna a mainum.

³⁵ Ket iti maicawalo nga aldaw addanto maysa a gimong a nadaeg; dacayo dicayto agaramid iti trabajo a panggedan;

³⁶ Ngem ipaayyonto ti maysa a mapuuran, maysa a daton a maaramid iti apuy, a nabanglo a sayamusom ken Jehova: maysa a lalaki a vaca, maysa a carnero a lalaki, pito a cordero a lallaki, a tumawendan nga awan ti pilawda:

³⁷ Ti datonda a macan ken dagiti datonda a mainum a nayon ti vaca, nayon ti carnero a lalaki, ken nayon dagiti corcordero, mayannurotdanto iti bilangda, a mayalubog iti alagaden:

³⁸ Ken maysa a calding a lalaki a daton gapu iti basol; sabali laeng ti cancanayon a daton a mapuuran, ken ti daton a macan, ken datonna a mainum.

³⁹ Dagitoy ti ipaayyonto ken Jehova cadagiti natudingan a fifiestayo sabali laeng dagiti carcariyo, ken dagiti datdaton ti sibubulos a nakemyo, a mapuuran, ken maipaay a datdatonyo a macan, ken maipaay a datdatonyo a mainum, ken maipaay cadagiti datdatonyo iti cappia.

⁴⁰ Ket ni Moises imbagana cadagiti annac ti Israel cas mayannurot iti amin nga imbilin ni Jehova ken Moises.