Numero 28 - Ti Biblia (1973)

Linlinteg cadagiti datdaton a nadumaduma.

¹ Ket ni Jehova nakisao ken Moises, a kinunana,

² Ibilinmo cadagiti annac ti Israel, ket saoem cadacuada, Ti panagdaton caniac ti tinapayco a maipaay cadagiti datdaton caniac a maaramid iti apuy, a nabanglo a sayamusom caniac, tungpalenyonto nga idaton ida caniac iti rebbengna nga aldawda.

³ Ket sica cunamto cadacuada, Daytoy ti daton a maaramid iti apuy nga irucbabyonto ken Jehova; corcordero a lallaki nga apagtawen, nga awan pilawda, dua iti inaldaw-aldaw iti maipaay a maysa a daton a mapuuran a cancanayon.

⁴ Ti maysa a cordero idatonmonto iti bigat, ket ti caduana idatonmonto iti sumipnget.

⁵ Ken apagcasangapulo ti maysa nga efa ti namayecmec nga harina, a maipaay a daton a macan, a nagamayan iti apagcapat ti maysa nga hin a lana a naladdit.

⁶ Daytoy ti maysa a daton a mapuuran a cancanayon, a naibilin idiay bantay Sinai, maipaay a nabanglo a sayamusom, maysa a daton a maaramid iti apuy ken Jehova.

⁷ Ket ti daton a mainum maysanto nga apagcapat ti maysa a hin a nayon ti maysa a cordero: iti nasantoan a disso, ibucbucmonto ti maysa a daton a mainum a naingel a mainum ken Jehova.

⁸ Ket ti maysa a cordero idatonmonto iti sumipnget: cas iti daton a macan iti bigat, ken cas ti datonna a mainum, idatonmonto, a maysa a daton a maaramid iti apuy, a maysa a nabanglo a sayamusom ken Jehova.

⁹ Ket iti aldaw a panaginana, dua a cordero a lallaki a tumawenen, nga awan ti pilawda, ken dua nga apagcapullo ti maysa nga efa ti namayecmec nga harina a maipaay a daton a macan, a nagamayan iti lana, ken iti daton a mainum a nayonna:

¹⁰ Daytoy isu ti daton a mapuuran iti tunggal aldaw a panaginana, sabali laeng ti daton a cancanayon a mapuuran, ken iti daton a mainum.

¹¹ Ket cadagiti pangrugian dagiti bulbulanyo, mangidatagcayto iti maysa a daton a mapuuran ken Jehova; dua a bumbumaro a vaca, ken maysa a carnero a lalaki, pito a cordero a lallaki a maysa ti tawenda, nga awan ti pilawda;

¹² Ken tallo nga apagcasangapullo ti maysa nga efa ti namayecmec nga harina, a daton a macan a nalaocan iti lana, a nayon ti tunggal bumaro a vaca; ken dua nga apagcapullo ti namayecmec nga harina, nga agservi a daton a macan a nalaocan iti lana, a nayon ti maysa a carnero a lalaki:

¹³ Ken maysa nga apagcapullo ti namayecmec nga harina a nagamayan iti lana, nga agservi a daton a macan, a nayon ti tunggal cordero; a maipaay a daton a mapuuran a nabanglo a sayamusom, maysa a daton a maaramid iti apuy ken Jehova.

¹⁴ Ket dagiti datdatonda a mainum isudanto ti guddua ti maysa nga hin ti arac, a nayon ti maysa a bumaro a vaca, ken ti apagcatlo ti maysa nga hin a nayon ti maysa a carnero, ken ti apagcapat ti maysa nga hin a nayon ti maysa a cordero: daytoy isu ti daton a mapuuran iti tunggal bulan iti isu-amin a bulbulan ti tinawen.

¹⁵ Ket maysa a calding a lalaki nga agservi a daton gapu iti basol ken Jehova; isu ti maidatonto, sabali laeng ti daton a mapuuran a cancanayon, ken ti datonna a mainum.

¹⁶ Ket iti umuna a bulan, iti maicasangapulo ket uppat nga aldaw ti bulan isu ti pascua ni Jehova.

¹⁷ Ket iti maicasangapulo ket lima nga aldaw ti daytoy a bulan isunto ti maysa a fiesta: cadagiti pito nga aldaw, tinapay nga awan levadurada ti macanto.

¹⁸ Iti umuna nga aldaw isu ti nasantoan a panaguummong; dicay agaramidto ti trabajo a panggedan;

¹⁹ Ngem mangirucbabcayto iti maysa a daton a maaramid iti apuy, a daton a mapuuran ken Jehova: dua a bumbumaro a vaca, ken maysa a carnero a lalaki, ken pito a cordero a lallaki nga apagtawen: addadanto cadacayo nga awan ti pacapilawanda:

²⁰ Ket ti datonda a macan, namayecmec nga harina nga nagamayan iti lana: tallo nga apagcapullo idatonyonto a nayon ti maysa a vaca, ken dua nga apagcapullo a nayon ti carnero;

²¹ Maysa nga apagcapullo ti idatonmonto a nayon ti tunggal cordero cadagiti pito a cordero:

²² Ken maysa a calding a lalaki nga agservi a daton gapu iti basol, tapno aramidenyo ti pacaabbonganyo.

²³ Dacayo idatagyonto dagitoy, sabali laeng ti daton a mapuuran iti bigat, nga isu ti maipaay a daton a mapuuran a cancanayon.

²⁴ Cas mayalagad itoy inaldaw nga idatonyonto iti pito nga aldaw ti tinapay a daton a maaramid iti apuy, a nabanglo a sayamusom ken Jehova: maidatonto a sangcasabali laeng ti cancanayon a daton a mapuuran, ken ti datonna a mainum.

²⁵ Ket iti maicapito nga aldaw, addanto maysa a nasantoan a panaguummongyo; dicayto agaramid iti trabajo a panggedan.

²⁶ Casta met iti aldaw ti umuna a bungbunga, no idatagyo ti daton a macan ken Jehova, iti fiestayo iti lawlawas, addanto maysa a nasantoan a panaguummongyo; dicayto agaramid iti trabajo a panggedan;

²⁷ Ngem ipaayyonto ti maysa a daton a mapuuran, a nabanglo a sayamusom ken Jehova; dua a bumbumaro a vaca, maysa a carnero a lalaki, pito a cordero a lallaki a maysa ti tawendan;

²⁸ Ken ti datonda a macan, ti namayecmec nga harina a nalaocan iti lana, tallo nga apagcapullo a nayon ti tunggal vaca, dua nga apagcapullo a nayon ti maysa a carnero a lalaki,

²⁹ Maysa nga apagcapullo a nayon ti tunggal maysa a cordero cadagiti pito a cordero;

³⁰ Maysa a calding a lalaki nga aramiden a pacaabonganyo.

³¹ Sabali laeng ti cancanayon a daton a mapuuran, ken ti datonna a macan, ipaayyonto ida (alaenyonto ida nga awan ti pamilawan), ken dagiti datdatonda a mainum.